1 Timoti 1 - Papang Yulni

Kalparasnin yulni

¹ Yang Pal, Jisas Krais aposnitel, Papang mailaihwi yakyang dawak Dawan Jisas Krais lani kau sihna kidika, mayang matahanik lani,

² adika wauhnitaya maultayang, Timoti, rahm kulnin lani yakat yang walakibis, Mapapangki dawak Madakiwan Jisas Krais kauna witingna minikun talnin lani, dalani lani dawak kulnin aslah lani bik duduwa kidika man mamatyakat lalakna karang.

Sumalna dauh balna kidika niningyakat baisa kau isningpakna

³ Macedonia sauni yakat yawik uman kalma dinit buknayang bahang, Efeso yakat wattah, muih buas balna yakat diyulna atnam kulnin lani dauh balna kidika sumalninna awas yulni

⁴ kisi balna dawak muihbararak balna yulnina bayakna kidika bik dakaninna awaski. Adika dini balna laih kalbilnin dini manah ki dawak ilp mayawas ki rahm kulnin lani karuk duna atnin Papang warkni yamnin kidika.

⁵ Kidika yamnin laih biri biri dalani kaltalnin ki isning as maisihni dis kaupak, kulnin lani yamni as kaupak dawak rahm kulnin lani as alas lani dis kaiwa kidika kaupak.

⁶ Muih balna buas laih adika tani kaupak kalalahna dawak kalbilnin dini awas kidika yakat didisna.

⁷ Witingna laih Papang lāni sumalyang balna atninna dukih diawi, witingna silp yul yulwi dawak sumalwi amanglalawas dadawa mani kat.

⁸ Mayang amangladi lā kidika laih yamni ki, amput yamnin kidika kaput yamdakat.

⁹ Mayang maisingkatnin ki lā as bik diski muih di yamni yayamwa kidika dinina. Lā kidika laih muih niningkauh yaklalauwa balna, yul dakakawas balna, dutni yamyang muihni balna, Papang yakat dawak suts yakat bik rispik yayamwas balna, papangnina yakat kidik awaskat nanangnina yakat ihiwa balna kidika, muih iyang balna bitik kau,

¹⁰ la munah kalduduwas balna kidika, ahal aslah kalduduwa balna, warau balna pa ūk kau wauhwi bakanyang balna, alas yulyang balna, alas yulwi pramis yamyang balna; yuldarang kat, sumalna yamni kidika niningyakat yaklalauwa balna kidika.

¹¹ Dawak adika dini sumalwi yul wisam yamni Papang yamni palni yaklau yamnin yayulna kidika.

Papang dalani lani duwa kidika yulni tingkih kalana

¹² Tingkih kalatayang paraski yana kidika muihni yakat, Madakiwan Jisas Krais yakat, kat barangni yakulwi witing warkni yamnin yana kidika yulni,

¹³ yang laih muhnilau kau witing niningyakat yul dudutni yultayang dai karang bik, usnit uitik dutni kalyamtayang dai. Kaunah Papang laih yang yakat mikun yatalna dai, kat yang laih baisa kulyang muihni awas yang dai dawak di balna yamtayang kidika bik amanglatasyang dai.

¹⁴ Dawak Madakiwan yaklau witing dalani lani duwa kidika minitbayak lakna dai yang mikityakat, dawak rahm kulnin lani kidika yana dawak Jisas Krais kaupak minikun talnin lani duda kidika kauna yana dai.

¹⁵ Adika laih rahm palni ki, dawak muih bitik rahm kulnamna ki: Jisas Krais laih sau akat kaina muih dutni yamyang balna yakat laihwi yakna atnin yulni, kidika balna laih yang kidika tatuna yang.

¹⁶ Kaunah Papang laih dalani yatalna dai, Jisas Krais parasni kidika yang yakat lāih kalahna atnin yulni. Kaput laih yang laih muih balna talninna aiwanayang witing yakat rahm kulwi sangka atnin ban kaput kidika duna atnin yulni.

¹⁷ ¡Ban kaput atnin kingni, sip dauwas, sip taldas dawak Papang aslah kidika yakat rispik dawak ayangni yaksihni yamna karang! Kaput karang.

^18-19 Timoti, yang walakibis, adika warkni matayang rahm kulnin lani dawak kulnin yamni lani karak bik kalbautah, muhnilau kau mawanaihki balna Papang ayangni kau duwi man yulma yuyulna dai kidika yulni balna karak. Buas balna kidika laih witingna kulninna diyulwa kidika yakat dakakawas dai kidika yulni rahm kulnin lani duduwa dai kidika dis dadana.

²⁰ Adika dini Himeneo dawak Alejandro yakat kaput dikalahna, sitan tingni yakat ānayang muihni balna kidika Papang niningyakat yulnina dutni kalyulninna awas yulni.