Maliko 16 - Bibilia Ilagano Lya Kale 2015

Kūjūūka kwa ng'wa Yesu

¹ Aho yabīta ī sabato, ū Malia Magadalena nū Malia ū nina o ng'wa Yakobo, hamò na Salume, būgūla būgota bo ng'waso nsoga, gīkī balaaje bakagūbile ū mīlī go ng'wa Yesu.

² Ī dilū makīngo ū lūshikū lo kwandya nyuma, būbūūka bajile ū kū shigila. Aho līlīfuma ī līīmi nabo balīshikīīla hoi.

³ Gwike bandya kwibūja gīkī, “Nani akūlīpilingitya ī liwe, atwīngīje a ha nyango go shigila?”

⁴ Nguno lyalī itaale no! Alīyo aho baponya a miso, būlībona ī liwe lyamalaga kūpilingitiwa lyīnjiagwa ho.

⁵ Aho bingīla ū mu shigila bibakīla no, būjinjimala. Nguno bakabona sūmba azwalile ng'hanjo yape, igashije kū lwandī lo nkono gwa būlyo.

⁶ Ūbawīla gīkī, “Mutibakīlage tūhaya mulīnkooba Yesu ū muna Nazaleti ūyo walī wakomilwe ha nsalaba! Atīho a henaha, ojūūkaga. Nzūgi mulole aho baalī banaagije.

⁷ Hūna lūūlū, jagi mukabawīle a bahemba bakwe, pyī nū Petelo; gīkī watongaga kūja Galilaya, h'ūko mukūjūmona gīt'ūmo akamuwīlīla!”

⁸ Aho bīnga a ha shigila, bandya kūpeela kūnū bakūdetemaga, nīyo babbahaga. Būlemeelwa nūūlū kūwīla munhū mhayo gose gose, nguno baalī bogoha no! [

Yesu ūng'wilongela Malia Magadalena

⁹ Aho wajūūka ū Yesu, ī dilū ya lūshikū lwenūlo ū lwa kwandya mu nyuma, ūyo akang'wilongela kwandya walī Malia Magadalena, ūyo walī wang'wīngīja masamva mpungatī.

¹⁰ Ū nkīma ng'wenūyo, aho oja kūbawīla abo bikalaga nū Yesu, ūbasanga bataalī mu būpīna bakūlīlaga ng'hūngū.

¹¹ Na lūūlū nūūlū aho bigwa, gīkī wamonaga alī mpanga batazunije.

Yesu kūbilongela bahemba babīlī

¹² Hama hangī akīīta ūbilongela babīlī babo alī mu suso yīngī, a bene bashimīzaga bajile kū malaale.

¹³ Nabo aho bashoka ū kū bichabo būbawīla, alīyo batabazunīlīgije.

Yesu ūbilongela bahemba na kūbatūma

¹⁴ Ha numa ya henaho ūbilongela a bahemba abo ikūmi na ūmò, bakūlyaga. Ūbahūgūla kūlwa būtūzunya na būgang'hanazu bong'holò jabo. Nguno baalī batazunije īyo bakawīlwa na a babo baalī batonga ū kūmona aho wajūūka.

¹⁵ Hūna ūbawīla gīkī, “Jagi hose pyī ū mu sī, ng'ūjilomeela ī Ng'hūlū Jawiza kū banhū bose.

¹⁶ Ū wa kūzunya ūbatīījiwa akūpīla, ū wa kūlema akūgwīlwa nsango.

¹⁷ Ī shimanīkījo īshi shikūbiza hamò nabo a bazunya: Bakūyūpeeja masamva na kūlūngalūnga mu ndīmi jingī, mu lina lyane.

¹⁸ Bakūdima nūūlū nzoka na makono gabo, nīyo nūūlū būng'wa shikolo īsho shidūgije kūbūlaga, shitūbakenaagūla. Na a basaatu bakūyūbatūūlīla makono bapīla.”

Kūja ng'wigūlū kwa ng'wa Yesu

¹⁹ Hūna lūūlū ū Seeba Yesu aho wamala ū kūbawīla, wanukūlwa ng'wigūlū. Wigasha kū nkono go būlyo go ng'wa Mulungu.

²⁰ Alīyo a boi bandya kūja hose hose bakūlomeelaga, nang'hwe ū Seeba ūyūtūmama hamò nabo, mu koolecha shimanīkījo kūlwa kūgūguzuhya ū mhayo.]