Maliko 2 - Ilagano Ipya Lya

Yesu umpija nemehazu

¹ Hanuma ya shiku ndo wali wingila mo hangi mu Kapernaumu, yigwiwa giki, ali mu numba.

² Haho na haho bingi bibilingila hamo, kushisha nose ngʼwanya gugaya nulu ha nyango: nanghwe ubalungalungila mhayo.

³ Nabo biza kuli Wei, bungʼwenha munhu alemahalile, abuchiwe na banhu bane.

⁴ Aho bali bulemelwa kungʼwegela kulwa ibita, bigula higulya ya numba umo ali; aho bumala kupigula, bicha bulili ubo abulalilile u nema.

⁵ Aho Yesu ubona kuzunya kwabo ungʼwila nema giki, Ngʼwana wane, shibi shako shalekejiwa.

⁶ Aliyo bali bali ho bamo ba bandiki bigashije ho, na bubyidedekanya mu ngholo jabo giki,

⁷ Munhu Uyu alilungalunga giko nguno ki? Akudukaga. Nani wadula kulekeja shibi ulu ati umo wike, Ngʼwene Mulungu?

⁸ Haho na haho Yesu umana mu moyo gwakwe giki, bidedekanya giko mu ngholo jabo, ubawila giki, Mulidedekanya iyo mu ngholo jingʼwe nguno ki?

⁹ Changu kili he, kungʼwila u nema giki, Shibi shako shalekejiwa; nulu kuhaya giki, Bukaga, ubuche bulili wako, ushiminze?

¹⁰ Aliyo mumane giki, Ngʼwana wa munhu ali na budula mu si kulekeja shibi, (ungʼwila nema giki,)

¹¹ Nakuwila giki, Bukaga, ubuche bulili wako, uje ku kaya yako.

¹² Nanghwe ubuka haho na haho, ubucha bulili, winga mu miso gabo bose; nose bukumya bose, bunkuja Mulungu, buhaya giki, Tutinabona giko na kamo.

Yesu ungʼwitana Levi

¹³ Utuma hangi, uja mu mbalama ya nyanza, na ibita lyose lyiza kuli Wei, ubalanga.

¹⁴ Aho ubyubita, umona Levi ngʼwana wa ngʼwa Alfayo, igashije ngʼwitobelo, ungʼwila giki, Nilondelage. Nanghwe ubuka, unondela.

¹⁵ Na yubiza giki, aho wali wigashije akulyaga mu numba ya ngʼwenuyo, batobisha bingi na ba shibi bigasha hamo na Yesu na bahemba bakwe; iki bali bali bingi, nabo bunondela.

¹⁶ Bandiki na Bafarisayo aho bumona akulyaga hamo na batobisha na ba shibi, bubawila bahemba bakwe giki, Akulyaga na kungʼwa hamo na batobisha na ba shibi nguno ki?

¹⁷ Yesu aho wigwa iyi, ubawila giki, A bapanga bati na nimo na naguji, aliyo abasatile; natizile kubitana batungilija, aliyo ba shibi bashike mu koya.

Mhayo gwa kudila nzala

¹⁸ Na bahemba ba ngʼwa Yohana na ba Bafarisayo bali bubyudila nzala; huna biza bungʼwila giki, Ni buli bahemba ba ngʼwa Yohana na bahemba ba Bafarisayo bakudilaga nzala, aliyo bahemba bako batadilaga nzala?

¹⁹ Yesu ubawila giki, Biye ba ntoji badula kinahe kudila nzala aho ntoji atali ali hamo nabo? aho batali bali hamo na ntoji, batudula kudila nzala.

²⁰ Aliyo shiku jiliza, aho ntoji alamala kwinjiwa mu bo, hunaho lulu baladila nzala mu shiku ijo.

Kigemenghejo cha ngʼwenda na mhinda ja makunza

²¹ Ati ho munhu uyo usumila kidaso cha ngʼwenda mpya ku kizwalo kikulukulu: ulu wita giko, icho chasumilwa kipya chutandula icho kikulukulu, na butanduke waho bongeja.

²² Hangi ati ho munhu uyo utuula minzi ga mizabibu mapya mu mhinda nghulukulu: ulu wita giko, minzi ga mizabibu mapya gakutumula mhinda, na minzi ga mizabibu gidika, na mhinda najo jukenaguka; aliyo shigelile kutuula minzi ga mizabibu mapya mu mhinda mhya.

Bahemba bunuka masha ha Sabato

²³ Yubiza giki, wali ubita mu migunda ya ngano ha Sabato; na bahemba bakwe bandia kuja, bubyuhulula mangala.

²⁴ Bafarisayo bungʼwila giki, Lolaga, bakwitaga icho cha ngilo ha Sabato nguno ki?

²⁵ Nanghwe ubawila giki, Mutasomaga na kamo iyo akita Daudi aho wali ugayiwa na utuba, wei, na benabo abali bali hamo nanghwe?

²⁶ Gitumo wali wingila mu numba ya Mulungu mu shiku ja ngʼwa Abiathar ngabiji ntale, na ulya migati iyufunyiwa kuli Mulungu, iyo ya ngilo kwilya ulu iti bagabiji bike, na ubinha na benabo abali bali hamo nanghwe?

²⁷ Ubawila giki, Sabato yaabejiwa kulwa munhu, iti munhu kulwa Sabato.

²⁸ Giko Ngʼwana wa munhu ali Seba nu ku Sabato.