Maliko 15 - Ilagano Ipya Lya

Yesu ngʼwibanza lya ngʼwa Pilato

¹ Na dilu bagabiji batale bulomana haho na haho na banamhala na bandiki na ba ibanza bose, buntunga Yesu, buntwala, bungʼwinha ko kuli Pilato.

² Na Pilato umuja giki, Angu, Bebe uli ntemi wa Bayudaya? Nanghwe ushosha ungʼwila giki, Ili chene, wahayaga.

³ Na bagabiji batale bunsayila mihayo mingi.

⁴ Aliyo Pilato umuja hangi, uhaya giki, Angu, utushoshaga mhayo? Lolaga mihayo iyi mingi balikukanilija.

⁵ Aliyo Yesu walatanshokegije mhayo hangi; kushisha nose Pilato ukumya.

Yesu nulu Barabba

⁶ Ku Pasaka shali shimile shakwe kubataligulilila ntungwa umo, uyo balanombe.

⁷ Walali ho umo uwitanwa Barabba, walatungilwe hamo na biye abali bita bugomi, abo mu bugomi wabo bali bubulaga.

⁸ Hunaho ibita lyuyombagila, bandia kunomba ite gitumo akabitilaga na kale.

⁹ Aliyo Pilato ubashokeja uhaya giki, Mutogilwe namulekelele ntemi wa Bayudaya?

¹⁰ Iki walamanile giki, bagabiji batale bali bangʼwinha ko kulwa wilu.

¹¹ Aliyo bagabiji batale bulihuhuta ibita giki, hambuhambu abalekelele Barabba.

¹² Pilato ushosha hangi, ubawila giki, Ali, mutogilwe nangʼwitile kinahe Uyo mulinghaya Ntemi wa Bayudaya?

¹³ Buhamuka hangi giki, Nkomage.

¹⁴ Pilato ubawila giki, Kulwa ki? witaga bubi ki? Aliyo boi bongeja kuhamuka higulya kutinda giki, Nkomage.

¹⁵ Hunaho Pilato, iki ukoba nzila ya kuliyeja ibita, ubataligulilila Barabba, aliyo aho wamala kuntula na mikoba, ungʼwinha ko Yesu akongʼwe.

Yesu ugimva kichilu

¹⁶ Hunaho lulu bashilikale buntwala mu kibuga ichitanwa Praitorio; na bulitana ibita lyose lya bashilikale.

¹⁷ Bunzwika joho yaza, bunzwika ngikili ya kitemi ya mihwa iyo bali buluka;

¹⁸ Bandia kungisha giki, Lama, Ntemi wa Bayudaya!

¹⁹ Buntula ku ntwe na idete, bunswila mate, butuja mazwi, bunamya.

²⁰ Aho bumala kungimba kichilu bunzula joho yaza, bunzwika shizwalo shakwe, bumfunya hanze bakankome.

Yesu ukongʼwa

²¹ Na munhu umo Simoni, muna Kurene, ise wa Aleksandero na Rufu, walabitile afumilile ku magunguli, ngʼwenuyo bunghadika anseselele nsalaba gwakwe.

²² Na bungʼwenha kwipande lya Golgota, kushomelejiwa kwaho kuli giki, Ipande lya lupanga.

²³ Bungʼwinha cha kungʼwa minzi ga mizabibu agasangije ngazu; aliyo Wei walatuganukula.

²⁴ Aho bumala kunkoma bugabanha shizwalo shakwe, bushesa, buli munhu gitumo alashikome.

²⁵ Yali yubiza saa ya kadatu aho bali bunkoma.

²⁶ Na chandikile cha kubulwa kwakwe chali chandikwa higulya giki, NTEMI WA BAYUDAYA.

²⁷ Na basambo babili bubakoma hamo nanghwe, umo ku nkono gwa bulyo, na umo ku nkono gwa lumoso.

²⁸ Hunaho lulu Shandikwa shali shushikilijiwa ishuhaya giki, Wali ubalilwa hamo na bagomi.

²⁹ Na abo abubita bundukagula, bushingisha mitwe yabo, buhaya giki, Ahaa! Bebe wa kukandula hekalu, na kuyizenga mu shiku idatu;

³⁰ Ipijage ngʼwenekele, wike ku nsalaba.

³¹ Giko hangi na bagabiji batale bungilolagi, mba kichilu hamo na bandiki, biwila benekele na benekele giki, Walubapijaga bangi, atudula kwipija ngʼwenekele.

³² Kristo, Ntemi wa ba Israeli, ni ikage lulu ku nsalaba, tuhone, huna tuzunye. Na benabo abali bukongʼwa hamo nanghwe nabo bumbyeda.

Kucha kwa ngʼwa Yesu

³³ Aho yali yushika saa itandatu chubiza ho giiti mu si jose kushisha saa kenda.

³⁴ Na ha saa kenda Yesu uhamuka na ilaka itale, uhaya giki, Eloi, Eloi, lama sabakthani? kushomelejiwa kwaho kuli giki, Mulungu wane, Mulungu wane, wanilekanija nguno ki?

³⁵ Na bamo ba mu benabo abimilile ho, aho bigwa iyi, buhaya giki, Lola, alingʼwitana Eliya!

³⁶ Hunaho ngʼwichabo upela ulilobya ibupya na siki, ulituula ku idete, ungʼwinha angʼwe, uhaya giki, Leke tulole ulu Eliya akwiza kungʼwicha.

³⁷ Aliyo Yesu aho uhamuka na ilaka itale, winha ko moyo gwakwe.

³⁸ Na iselema lya mu hekalu lyutanduka hagati kufuma higulya kushisha ha si.

³⁹ Ntale wa bashilikale igana, uyo wali wimila ho anolelile, aho ubona gitumo wali uhamuka, na ugufunya ko moyo gwakwe, uhaya giki, Nghana munhu Uyu wali Ngʼwana wa Mulungu.

⁴⁰ Bali bubiza ho na bakima bakulolelaga ka kule ho; mu benabo bali bali ho Mariamu Magdalene, na Mariamu nina wa Yakobo u ndo na Yose, na Salome.

⁴¹ Abo, aho walali mu Galilaya, bubyunondela na kungʼwinhilija; na bakima bangi bingi abali bulinha kwiza Yerusalemi hamo nanghwe.

Yesu ujikwa

⁴² Na aho yubiza mhindi, iki lwali luli lushiku lwa kulonjalonja, lwene ulutongije Sabato,

⁴³ Wiza Yusufu wa Arimathaya, namhala wa ibanza, nkumuku, uyo nanghwe wali ulindila butemi wa Mulungu, wingila kuli Pilato na bugimu, ugulomba mimba gwa ngʼwa Yesu.

⁴⁴ Pilato ukumya, ulu wamalaga kucha; ungʼwitana ntale wa bashilikale igana, umuja ulu wamalaga kucha ikanza itale.

⁴⁵ Na aho umanikijiwa na ntale wa bashilikale igana, huna ungʼwinha mimba u Yusufu.

⁴⁶ Nanghwe ugula ngʼwenda gwa kitani, unsungula, uningha mu ngʼwenda gwa kitani, unaja mu nze iyali yupunzwa mu kiganga; na ulipilingitija iwe ha nyango gwa nze.

⁴⁷ Mariamu Magdalene na Mariamu, nina wa ngʼwa Yose, bubona umo wali utuulwa.