Maliko 13 - Ilagano Ipya Lya

Lulomelo lwa ha lugulu lwa Mizeituni (Mt. 24 na 25; Lk. 21 ) Kukandulwa kwa hekalu

¹ Aho akwingaga mu hekalu umo wa bahemba bakwe ungʼwila giki, Nangi, lolaga mawe aya! na manumba aya!

² Yesu ushosha ungʼwila giki, Wabona bebe manumba aya matale? Litalalekwa ho iwe higulya ya iwe liye, ilo litalakandulwa.

³ Aho wali wigashije ha lugulu lwa Mizeituni alolelile hekalu, Petro na Yakobo na Yohana na Andrea bumuja ha mhujo giki,

⁴ Tuwilage, mihayo iyi ilabiza ho nanali? na kimanikijo kilabiza ki aho yeniyi yose ilahaya kushikilijiwa?

Ya kushoka kwakwe

⁵ Yesu ushosha na wandia kubawila giki, Ilanghanagi munhu ose atizumulembalemba.

⁶ Iki bingi baliza mu lina lyane, balabyuhaya, Nene ndi ngʼwene; na balabalembalemba bingi.

⁷ Aliyo aho muligwa bulugu na nghulu ja bulugu, mutizufungʼwa ngholo; iki yeniyi italakija kubiza ho, aliyo mhelo itali.

⁸ Iki ihanga lilubukila ihanga liye, na butemi bulubukila butemi wiye; jilabiza ho nyahinga mapande gangi na gangi; na jilabiza ho nzala na makoye; mihayo iyi yene wandijo wa kulungʼwa busungu.

⁹ Aliyo ilanghanagi benekele; iki balamutuula ho ku mabanza na mu mabilingilo, mulatulagulwa; mulimilijiwa mu butongi wa batale na batemi kulwa nguno yane, mihayo iyi ibize bukaniji kubo.

¹⁰ Na evangeli shigelile ilomelwe tame mu mahanga gose.

¹¹ Aliyo aho balamutwala kumutuula ho ngʼwibanza, mutizandia kwiganilija iyo mulahaya, nulu mutizidedekanya; aliyo mhayo uyo mulinhiwa ngʼwikanza ilo u gwene mulahaya; iki muti bingʼwe abahaya, aliyo Moyo Ngʼwela:

¹² Hunaho ngʼwana wa ngʼwabo alantuula ho ngʼwana wa ngʼwabo kucha; na ise alantuula ho ngʼwana wakwe kucha; na bana balabubukila babyaji, balababulaga.

¹³ Na banhu bose balamukolwa kulwa nguno ya lina lyane; aliyo uyo wiyumilija kushisha ku mhelo, ngʼwene alapijiwa.

¹⁴ Aliyo aho mulabona i cha malofu cha bukenaguku ichaahayiwa na nghangi Danieli chimilile uko itigelile, (uyo akusomaga itegeleje) hunaho abo hali mu Buyudaya babungilage ku ngulu;

¹⁵ Uyo ali higulya ya numba atizika kwingila mu numba, nulu kwingila kusola kinhu chose mu numba yakwe;

¹⁶ Na uyo ali mu ngunda atizushishokela shikolo shakwe kusola kizwalo chakwe.

¹⁷ Aliyo balasangwa abali nda na abakonhyaga mu shiku ijo!

¹⁸ Aliyo lombagi u kubunga kwingʼwe kutizubiza mu shiku ja mbeho.

¹⁹ Iki mu shiku ijo kulabiza ho kuluhaluhiwa, gitumo kutinabiza ho kufuma kwandia kwa kusengʼwa uko Mulungu akasema, kushisha haha, nulu kutalabiza ho hangi.

²⁰ Na ulu Seba ni atajigehije shiku ijo, ni atapilile munhu nulu umo; aliyo kulwa nguno ya basolwa abo wali ubasola, wajigehije shiku jenijo.

²¹ Hunaho ulu munhu alamuwila giki, Lolaga Kristo ali aha; nulu giki, Ali uko; mutizuzunya.

²² Iki galabuka Makristo mamama na bahangi bamama, nabo balita shimanikijo na sha kukumya, kushisha nose balabalembalemba nulu basolwa, ulu yudulika.

²³ Aliyo bingʼwe ilanghanagi: lolagi, natonjaga kumuwila mihayo yose.

²⁴ Aliyo mu shiku jenijo, hanuma ya kuluhyaluhya kwenuko, limi lililabula, na ngʼweji gutalafunya kwela kwago,

²⁵ Na sonda ja ngʼwigulu jilabyugwa, na mabudula ga ngʼwigulu galanegenyiwa.

²⁶ Hunaho lulu balamona Ngʼwana wa munhu izile mu malunde na budula butale na magaka;

²⁷ Hunaho lulu alabatuula bamalaika bakwe, alababilinga basolwa bakwe kufuma ku miyaga ine, kufuma ku mhelo ya si kushisha ku mhelo ya igulu.

Kigemenghejo cha nti ntini

²⁸ Ilangagi lulu kigemenghejo cha nti ntini, aho itambi lyago lyubiza idoto, nago gufuluma madutu; mumanile ngʼwaka guli hihi:

²⁹ Giko na bingʼwe aho mulabona iyi yose yilonga, managi giki, ali hihi, ku nzwigi,

³⁰ Nghana namuwila giki, Kibyalilwe iki kitalabita kushisha iyi yose ilabiza ho.

³¹ Igulu na si shilabita aliyo mihayo yane italabita.

Ya kwikala miso

³² Aliyo mhayo gwa lushiku lwenulo, na ikanza ilo, ati ho uyo amanile, nulu bamalaika ba ngʼwigulu, nulu Ngʼwana, ulu ati Baba wike.

³³ Ilanghanagi, ikalagi miso, na kulomba, iki mutamanile ikanza aho Ulabiza ho.

³⁴ Ili giti munhu ubuka lugendo kuja ku si yingi, uleka kaya yakwe, ubinha basese bakwe budula wa bulindi, ku buli munhu nimo gwakwe, na unagila nindi wa nyango kwikala miso.

³⁵ Kulwa iyo ngʼwikale miso; iki mutamanile namugi aho aliza, hamo mhindi, hamo bujiku hagati, hamo mu ngoko jikuhilaga, hamo dilu;

³⁶ Atiziza kamo na kamo na kungʼwisanganija mutalile.

³⁷ Iyo namuwila bingʼwe, nabawila bose, Ikalagi miso.