Mabasa 28 - Baiberi Magwaro Matȿene aMŋari 1949 (Doke)

Pauro paMerita.

¹ Ɀino takati taponeswa, tikaziʋa kuti ciwi cinonzi Merita.

² Ʋanhu ʋenyika iyo ʋakatiitira ʋunyoro kwaɀo; nokuti ʋakaɓatidza mŋoto, ʋakatigamucira tose, nokuɗa kwemvura yakaŋga icinaya, ʋuye nokuɗa kwecando.

³ Ɀino Pauro wakati aʋuŋganidza ȿiŋga roʋutsotso, akabguisa pamŋoto, kukaɓuɗa nyoka nokudziya, ikanamatira paruʋoko rwake.

⁴ Ʋanhu ʋenyika iyo ʋakati ʋaciʋona cikara cakaremberera paruʋoko rwake, ʋakataurirana, ʋaciti: Ɀirokwaɀo munhu uyu muʋurayi, nokuti kunyaŋge aɗoponeswa hake paguŋgwa, Kururama hakumutenderi kuti aʋe mupenyu.

⁵ Asi iye wakazuzira cikara mumŋoto, akasanzwa kurwadzwa.

⁶ Iʋo ʋakati ucaɀimba, kana kuwira pasi pakarepo, akafa; ɀino ʋakati ʋatarira ŋguʋa refu, ʋakaʋona kuti haana‐kusikirwa nenjodzi, ʋakashanduka ʋoti: Iye mŋari.

⁷ Ɀino pedyo ipapo paiʋa neminda yomukuru weciwi, wainzi Pubrio; iye wakatigamucira, akatigarisa ɀakanaka mazuʋa matatu.

⁸ Ɀino ɓaɓa ʋaPubrio ʋakaŋga ʋaʋete pasi, ʋakaɓatwa nefiviri nokuɓuɗisa ropa; Pauro akapinda kwaʋari, akanyeŋgetera, ndokuisa maʋoko ake pamsoro pake, akamuporesa.

⁹ Iɀo ɀakati ɀaitwa, naʋamŋe ʋo ʋeciwi, ʋairwara, ʋakaʋuya, ʋakaporeswa.

¹⁰ Ʋakatikudza nokukudza kukuru; ticizoenda, ʋakaisa pacikepe ɀinhu ɀatakaŋga ticishaiwa.

Pauro woenda Roma, kwaanogara makore maʋiri.

¹¹ Mŋedzi mitatu yakati yapfuʋura, tikaenda necikepe ceAreksandria, cakaŋga cagara cando paciwi, caiʋa neciratidzo cokuti Dioskuri.

¹² Ɀino tikaenda napaSirakuse, tikagara’po mazuʋa matatu.

¹³ Tikabva’po, tikapota, ndokuȿika Regio; zuʋa rimŋe rikati rapfuʋura, mhepo yaibva zasi ikamuka, tikaȿika Puteori nezuʋa repiri;

¹⁴ tikawana’po hama, dzakakumbira ɀikuru kuti tigare nadzo mazuʋa manomŋe; naiɀoɀo tikaȿika Roma.

¹⁵ Ɀino hama dzakati dzatinzwa, dzikabva’po, dzikaʋuya kuzoticiŋgamidza, dzikaȿika Apio Foro napaTaberne Nhatu; Pauro akati adziʋona idzo, akaʋoŋga Mŋari, akatsuŋga mŋoyo.

¹⁶ Ɀino takati tapinda Roma, Pauro akatenderwa kugara ari oga, anomurwi waimurinda.

¹⁷ Mazuʋa matatu akati apfuʋura, akakokera aʋo, ʋakaŋga ʋari ʋakuru ʋaʋaJuda. Ʋakati ʋaʋuŋgana, akati kwaʋari: Ʋarume, hama, ini kunyaŋge ndisina‐kuita cinhu cakatadzira ʋanhu, kana tsika dzamadziɓaɓa eɗu, ndakabva Jerusarema ndakasuŋgwa, ndaiswa pamaʋoko aʋaRoma;

¹⁸ iʋo, ʋakati ʋandibvunzisisa, ʋakaɗa kundisunuŋgura, nokuti pakaŋga pasinemhoȿa yorufu kwandiri.

¹⁹ Asi ʋaJuda ʋakaramba, ndikaroʋererwa kuɀiisa kunaKesari; kusi kuti ndaiʋa necinhu cokupomera rudzi rwaŋgu.

²⁰ Ɀino ndakakuɗanai pamsoro pemhoȿa iyi, kuti ndikuʋonei, nditaurirane nemi, nokuti ndakasuŋgwa neketani iri nokuɗa kwetariro yaʋaIsraeri.

²¹ Ʋakati kwaari: hatina‐kugamucira ŋwadi pamsoro pako, dzaibva Judea, ʋuye hakunomumŋe wehama wakaȿika akatiʋudza ɀako, kana kutaura ɀakaipa pamsoro pako.

²² Asi tinoɗa kunzwa kwauri ɀaunofuŋga; nokuti kana iri dzidziso iyi, tinoziʋa kuti inorambga kwose‐kwose.

²³ Ɀino ʋakati ʋamutarira zuʋa, ʋakaʋuya kwaari ʋari ʋazhinji, kwaakaŋga agere, akaʋaɗudzira, aciʋapupurira kwaɀo ʋushe bgaMŋari, akaʋagombedzera pamsoro paJesu, nomurairo waMosesi naʋaprofita, kubva maŋgwanani kuȿikira maɗekwana.

²⁴ Ʋamŋe ʋakatenda ɀakataurwa, asi ʋamŋe haʋana‐kutenda.

²⁵ Ɀino ɀaʋakaŋga ʋasiŋganzwani, ʋakaenda, Pauro ataura shoko rimŋe cete kwaʋari rokuti: Mŋeya Mutȿene wakataura ɀakanaka nomuprofita Isaya kunamadziɓaɓa enyu,

²⁶ aciti: Enda kuʋanhu aʋa uti: Nokunzwa mucanzwa, musiŋgatoŋgonzwisisi; Nokuʋona, mucaʋona, musiŋgaʋonesesi.

²⁷ Nokuti mŋoyo yaʋanhu aʋa yaʋa mikukutu, Nzeʋe dzaʋo hadzinzwi ɀakanaka, Ʋakatsinzina meso aʋo; Kuti ʋarege kutoŋgoʋona nameso aʋo, Nokunzwa nenzeʋe dzaʋo, Nokunzwisisa nemŋoyo yaʋo, Ʋatendeʋuke, Ndiʋaporese.

²⁸ Ɀino ziʋai imi, kuti ruponeso urwu rwakatumirwa ʋahedeni; iʋo ʋacanzwa ʋo.

²⁹ [Wakati ataura iɀoɀo, ʋaJuda ʋakaenda, ʋaciita nyaya huru pakati paʋo.]

³⁰ Iye akapedza makore maʋiri agere muimba yake yairipirwa mari, akagamucira ʋose ʋaipinda kwaari,

³¹ aciparidza ʋushe bgaMŋari, acidzidzisa ɀaShe Jesu Kristu, asiŋgatoŋgotyi, asiŋgadziʋiswi nomunhu.