Mabasa 20 - Baiberi Magwaro Matȿene aMŋari 1949 (Doke)

Pauro unoenda ɀe kunyika yeMakedonia neGirisi. Unomutsa Yutiko paTroa.

¹ Ƃopoto rakati ranyarara, Pauro akaɗana ʋadzidzi, akaʋaraira, ndokuwonekana naʋo, akabva aciɗa kuenda Makedonia.

² Akagura namatiʋi enyika idzo, akaraira ʋatendi namashoko mazhinji, ndokuȿika panyika yaʋaGiriki.

³ Akati agara mŋedzi mitatu, raŋgano yakaipa ikaitwa naʋaJuda pamsoro pake, oɗa kuenda Siria necikepe, akati ndodzokera napaMakedonia.

⁴ Akaperekedzwa naSopatro weBerea, mŋanakomana waPiro; naAristarko naSekundo ʋeTesaronika; naGayo weDerbe, naTimotio; ʋuye Tikiko naTrofimo ʋeAsia.

⁵ Iʋo ʋakatuŋgamira, ʋakatimirira paTroa.

⁶ Isu tikabva Firipi necikepe mazuʋa eɀiŋgwa ɀisinembiriso apfuʋura; tikasika kwaʋari paTroa namazuʋa mashanu; tikagara’po mazuʋa manomŋe.

⁷ Ɀino nomusi wokutaŋga weviki, takaʋuŋgana kuti timeɗure ciŋgwa, Pauro akataurirana naʋo, aciɗa kuenda maŋgwana; akaramba aciparidza shoko kuȿikira pakati poʋusiku.

⁸ Kwakaŋga kunemŋenje mizhinji muimba yokumsoro, matakaŋga taʋuŋgana.

⁹ Ɀino pawindi pakaŋga pagere rimŋe jaya, rainzi Yutiko, rikaɓatwa nehope kwaɀo; ɀino Pauro, wakati aciŋgoramba aciparidza, iye akaɓatwa nehope, akawira pasi, acibva paimba yecitatu yokumsoro, akasimudzwa afa.

¹⁰ Ipapo Pauro akaɓuruka, akaɀiwisira pamsoro pake, akamufuŋgatira, akati: Musaita ɓopoto, nokuti mŋeya wake uciri maari.

¹¹ Akakwira, akameɗura ciŋgwa, akadya, akataura naʋo ŋguʋa refu kuȿikira kuciedza, ndokuenda.

¹² Ʋakaʋuya nomukomana ari mupenyu, ʋakanyaradzwa kwaɀo.

¹³ Asi isu takatuŋgamirira kucikepe, tikaenda Aso, ticiɗa kutora Pauro ipapo, nokuti wakaŋga araira saiɀoɀo, iye aciɗa kufamba namakumbo.

¹⁴ Takati tasoŋgana naye paAso, tikamutora, tikandoȿika Mitirene;

¹⁵ tikabva ipapo necikepe, fume maŋgwana tikaȿika pakatarisana neKiyo; fume maŋgwana tikapfuʋura napaSamo; fume maŋgwana ɀe tikaȿika Mireto.

¹⁶ Nokuti Pauro wakaŋga ati: Ndicapfuʋura Efeso necikepe, kuti arege kunonoka paAsia; nokuti wakaŋga acikurumidza kuti kana aiɀigona aʋe Jerusarema nezuʋa rePentekosta.

Pauro unoraira ʋakuru ʋeEfeso.

¹⁷ Ɀino iye ari paMireto, akatumira Efeso kundoɗana ʋakuru ʋekereke.

¹⁸ Ʋakati ʋaȿika kwaari, akati kwaʋari: Imi munoziʋa mugarire waŋgu pakati penyu ŋguʋa dzose, kubva pazuʋa rokutaŋga randakaȿika naro paAsia;

¹⁹ ndiciɓatira Ishe nokuɀininipisa ɀikuru, nemisodzi, namaɗambudziko akandiwira neraŋgano dzakaipa dzaʋaJuda;

²⁰ kuti handina‐kutya kukuparidzirai ɀiŋgakuɓatsirai nokukudzidzisai pacena padzimba dzose;

²¹ ndicipupurira kwaɀo ʋaJuda naʋaGiriki, kuti ʋatendeʋukire kunaMŋari, nokutenda kunaShe weɗu Jesu.

²² Ɀino tarirai, ndinoenda Jerusarema, ndasuŋgwa mŋeya waŋgu, ndisiŋgaziʋi ɀicandiwira ikoko;

²³ asi kuti Mŋeya Mutȿene unondipupurira kwaɀo muguta rimŋe nerimŋe, kuti kusuŋgwa nenhamo ɀakandigarira.

²⁴ Asi handinehanya noʋupenyu bgaŋgu, handibguɗi, kuti ndipedze rwendo rwaŋgu neɓasa randakapiwa naShe Jesu, rokupupura kwaɀo Evaŋgeri yenyasha dzaMŋari.

²⁵ Ɀino tarirai, ndinoziʋa kuti imi mose, ʋandakafamba pakati penyu, ndiciparidza ʋushe bgaMŋari, hamucazoʋoni ciso caŋgu.

²⁶ Naiɀoɀo ndinokupupurirai nhasi kuti ndakacena paropa raʋanhu ʋose.

²⁷ Nokuti handina‐kutya kukuparidzirai kuɗa kwose kwaMŋari.

²⁸ Ɀicenjerei imi, neɓoka rose ramakaitirwa ʋatariri ʋaro noMŋeya Mutȿene, kuti mufudze kereke yaMŋari, yaakateŋga neropa rake.

²⁹ Ini ndinoziʋa kuti kana ndaenda, mapere anoparadza acapinda pakati penyu, asiŋgaregi ɓoka.

³⁰ Ʋuye, napakati penyu pamene pacamuka ʋarume, ʋacataura ɀinopesanisa, kuti ʋatsause ʋadzidzi ʋaʋateʋere.

³¹ Naiɀoɀo rindai, muraŋgarire kuti makore matatu handina‐kurega ʋusiku namasikati kuraira mumŋe nomumŋe nemisodzi.

³² Ɀino ndinokuisai kunaShe, neshoko renyasha dzake, iye unesimba rokukuʋakisai, nokukupai nhaka pakati paʋakaitwa ʋatȿene ʋose.

³³ Handinakucocora sirveri, kana ndarama, kana ŋguʋo dzomunhu mumŋe.

³⁴ Munoziʋa imi mumene, kuti maʋoko awa akaɓatira kushaiwa kwaŋgu nokwaʋanhu ʋandaiʋa naʋo.

³⁵ Paɀinhu ɀose ndakakuratidzai, kuti muciɓata muciɗai, munofanira kuɓatsira ʋasinesimba, nokuraŋgarira mashoko aShe Jesu, seɀaakataura amene aciti: Kupa kunomufaro caiwo kupfuʋura kugamucira.

³⁶ Wakati ataura iɀoɀo, akafugama, akanyeŋgetera naʋo ʋose.

³⁷ Ʋakacema ɀikuru ʋose; ʋakawira pamutsipa waPauro, ʋakawonekana naye nokumuȿeta,

³⁸ ʋaneshuŋgu kwaɀo neshoko raakataura rokuti haʋacazoʋoni ciso cake. Ipapo ʋakamuperekedzera kucikepe.