Isaya 22 - Baiberi Magwaro Matȿene aMŋari 1949 (Doke)

Cireʋo pamsoro peJerusarema.

¹ Cireʋo pamsoro pomupata weɀakaʋonekwa. Unonzweiko, ɀawakwira naʋanhu ʋako ʋose pamateŋga edzimba?

² Haiwa, iwe, uzere nokupururudza, guta rineɓope, musha unomufaro; ʋakaʋurawa ʋako haʋana‐kuʋurawa nomunondo, haʋana‐kufira pakurwa.

³ Ʋaɓati ʋako ʋose ʋakatiza pamŋe cete, ʋakasuŋgwa ʋasinoʋuta; ʋose ʋako, ʋakawanikwa, ʋakasuŋgwa pamŋe cete; ʋakatizira kure.

⁴ Naiɀoɀo ndakati: Regai kunditarira, ndinoɗa kucema kwaɀo; musaramba muciidza kundinyaradza pamsoro pokuparadzwa kwomukunda waʋanhu ʋaŋgu.

⁵ Nokuti izuʋa rokuvundusa, nerokutsikira pasi, nerokukaŋganisa, ɀinobva kunaShe, Jehova wehondo, pamupata wokuratidzwa; rokukoromorwa kwamaȿiŋgo, nerokuɗanidzira kumakomo.

⁶ Erami wakaɓata goɓa, pamŋe cete namapoka aʋanhu naʋataȿi ʋamabiza; Kiri wakafuɗugura nhoʋo.

⁷ Ipapo mipata yenyu yakaiȿo‐naka yakazara neŋgoro, naʋataȿi ʋamabiza ʋakaɀigadzirira kurwa pasuʋo.

⁸ Akabvisa cifukidziro caJuda; nezuʋa iro mukatarira nhumbi dzokurwa muimba yomuɗondo.

⁹ Mukaʋona pakakoromoka paguta raDavidi, kuti pakaŋga pari pazhinji; mukaciŋgidzira mvura yedziʋa rezasi;

¹⁰ mukaʋereŋga dzimba dzeJerusarema, mukakoromora dzimba kuti musimbise ruȿiŋgo;

¹¹ mukaita ʋo gaŋgwa pakati pamaȿiŋgo maʋiri rokuciŋgidzira mvura yedziʋa rakare. Asi hamuna‐kutarira iye wakaɀiita, makaŋga musinehanya naiye wakaɀifuŋga kare.

¹² Ɀino nezuʋa iro Ishe, Jehova wehondo, wakakuɗanirai kumisodzi, nokukucema, nokukuʋeʋurwa mhazha, nokukufuka makudza;

¹³ asi tarirai, makaʋa nomufaro nokupembera, nokuɓayiwa kweŋombe, nokushizhwa kwamakwai, nokudyiwa kwenyama nokunwiwa kwewaini, muciti: Ŋgatidye, ŋgatinwe, nokuti maŋgwana tinofa.

¹⁴ Asi Jehova wehondo wakaɀiziʋisa munzeʋe dzaŋgu, akati: Ɀirokwaɀo, hamuŋgakaŋganwirwi ɀakaipa iɀi, kuȿikira pakufa kwenyu, ndiɀo ɀinotaura Ishe, Jehova wehondo.

Mutariri Shebna ucabviswa, Eriakimi ucapinda panɀimbo yake.

¹⁵ Ɀanzi naShe, Jehova wehondo: Enda kumuceŋgeti uyu wefuma, kunaShebna, unotarira imba yamambo, uti:

¹⁶ Unoɓateiko pano? Unaniko pano, ɀawaɀiʋezera bgiro pano? Somunhu unoɀiʋezera bgiro pakakwirira, unoɀicerera ʋugaro bgake paɗombo!

¹⁷ Tarira, Jehova ucakurashira kure nesimba somurume; ɀirokwaɀo, ucakupeta‐peta.

¹⁸ Ɀirokwaɀo ucakupomba‐pomba, ndokukukandira sehuruŋguɗo munyika yakapamhamha; ndi’po paucafira, ndi’po pacaʋa neŋgoro dzembiri yako, iwe munyadzi weimba yatenzi wako.

¹⁹ Ndicakudziŋga paɓasa rako, iye ucakukweʋera pasi ubve panɀimbo yako.

²⁰ Ɀino nezuʋa iro ndicaɗana muranda waŋgu Eriakimi, mŋanakomana waHirkia;

²¹ ndicamufukidza ŋguʋo yako, nokumusimbisa nebanhire rako, ndigoisa ʋushe bgako muruʋoko rwake; iye ucaʋa ɓaɓa kunaʋagere Jerusarema, nokuimba yaJuda.

²² Ndicaisa kiyi yeimba yaDavidi pafudzi rake; iye ucazarura, hapana‐uŋgazarira, iye ucazarira, hapana‐uŋgazarura.

²³ Ndicamuroʋera pakasimba sembambo; ucaʋa cigaro cinokudzwa paimba yaɓaɓa ʋake.

²⁴ Ʋacaturika paari kukudzwa kwose kweimba yaɓaɓa ʋake, mataʋi namaɓukira, nemidziyo yose miɗuku, kubvira pamikombe kuȿikira pamakate.

²⁵ Nezuʋa iro, ndiɀo ɀinotaura Jehova wehondo, mbambo yakaŋga yaroʋerwa pakasimba, icabva; icatemŋa, ndokuwira pasi; nomutoro wakaŋga wakaturikwa pairi, ucatemŋa; nokuti Jehova wakataura iɀoɀo.