Zekaria 5 - Shona BIBLE

Chiratidzo chechitanhatu chorugwaro rwechimononorwa

¹ Zvino ndakaratidza meso anguzve, ndikatarira, ndikaona rugwaro rwechimononorwa ruchibhururuka.

² Akati kwandiri, “Unooneiko? Ndikapindura, ndikati, ‘Ndinoona rugwaro rwechimononorwa runobhururuka; kureba kwarwo mukubhiti ana makumi maviri, noupamhi hwarwo makubhiti ane gumi.’ ”

³ Ipapo akati kwandiri, “Ndiko kutuka kunobudira pamusoro penyika yose; nokuti mumwe nomumwe anoba achaparadzwa kuno rumwe rutivi sezvazvakanyorwamo; uye mumwe nomumwe anopika achaparadzwa kuno rumwe rutivi sezvazvakanyorwamo.

⁴ Ndichabudisa kutuka ikoko ndizvo zvinotaura Jehovha wehondo kupinde mumba moanoba nomumba moanopika nhema nezita rangu; kuchagara pakati peimba yake, kuchiipedza iyo pamwechete namatanda ayo nemabwe ayo.”

Chiratidzo chechinomwe, chomukadzi akabata efa

⁵ Zvino mutumwa akanga achitaurirana neni akabuda, akati kwandiri, “Chiratidza meso ako zvino, uone chinobudapo.”

⁶ Ini ndikati, “Chiiko?” Iye akati, “Ichi ndicho chivi chavo panyika yose.” Akatizve, “Ndizvo zvavakaita panyika yose;”

⁷ (zvino ndikaona tarenta romutobvu ruchisimudzwa); ndikaona mukadzi agere mukati meefa.

⁸ Akati, “Uyu ndiye Zvakashata; akamuwisira pasi mukati mebhasikiti [efa,] akakandira mutobvu unorema pamusoro pomuromo wayo.”

⁹ Ipapo ndakaratidza meso angu, ndikatarira, ndikaona vakadzi vaviri vachibuda, mhepo iri mumapapiro avo; zvino vakanga vana mapapiro akafanana namapapiro ezimuda; ivo vakasimudza efa, ikava pakati penyika nedenga.

¹⁰ Ipapo ndikati kumutumwa akanga achitaurirana neni, “Vanondoisepiko bhasikiti?”

¹¹ Iye akati kwandiri, “Kundoivakira imba panyika yeShinari; kana yapera achandoiswapo panzvimbo yayo.”