Zekaria 4 - Shona BIBLE

Chiratidzo chechishanu, chechigadziko chomwenje nemiorivhi miviri

¹ Zvino mutumwa akanga achitaurirana neni akasvikazve, akandimutsa, somunhu anomutswa pahope dzake.

² Akati kwandiri, “Unooneiko?” Ini ndikati, “Ndakatarira, ndikaona chigadzikiro chomwenje chendarama yose, chine hadyana yacho pamusoro pacho, nemwenje yacho minomwe iri pamusoro pacho; mwenje mumwe nomumwe uri pamusoro pacho une mbombi nomwe;

³ uye miti miviri yemiorivhi parutivi rwacho, mumwe kurutivi rworudyi rwehariyana, nomumwe kurutivi rworuboshwe.”

⁴ Ndikapindura ndikataura nomutumwa akanga achitaurirana neni, ndichiti, “Izvi zviiko, ishe wangu?”

⁵ Ipapo mutumwa akanga achitaurirana neni, akapindura, akati, kwandiri, “Hauzivi here kuti izvi zviiko?” Ini ndikati, “Kwete, ishe wangu.”

⁶ Ipapo akapindura, akataura neni, achiti, “Ndiro shoko raJehovha kuna Zerubhabheri, rinoti, ‘Hazviitwi nehondo kana nesimba, asi noMweya wangu,’ ndizvo zvinotaura Jehovha wehondo.

⁷ Ndiwe aniko, iwe gomo guru? Pamberi paZerubhabheri uchaitwa bani, iye achabudisa ibwe rokumusoro, achidanidzira achiti, ‘Nyasha, nyasha ngadzive kwariri.’ ”

⁸ Zvino shoko raJehovha rakasvikazve kwandiri richiti,

⁹ “Maoko aZerubhabheri akateya nheyo dzeimba ino, maoko ake achaipedzisawo; ipapo iwe uchaziva kuti Jehovha wehondo ndiye akandituma kwauri.

¹⁰ “Nokuti ndiani akashora zuva rezvinhu zviduku? Nokuti achafara zvikuru, achaona tambo yokuyeresa muruoko rwaZerubhabheri; awa ndiwo meso aJehovha anofamba pose pose panyika yose.

¹¹ “Ipapo ndakapindura, ndikati kwaari, ‘Ko miorivhi iyi miviri kurutivi rworudyi rwechigadziko nokurutivi rworuboshwe zvinoti kudiniko?’ ”

¹² Ndikapindurazve rwechipiri, ndikati kwaari, “Ko matavi awa maviri nomuorivhi ari kumativi emiromo miviri, inodira mafuta endarama pairi, anoti kudiniko?”

¹³ Akandipindura, akati, “Hauzivi here kuti izvi zvinyiko?” Ini ndikati, “Kwete, ishe wangu.”

¹⁴ Zvino akati, “Ava ndivo vaviri vakazodzwa, vamire pamberi paShe wenyika yose.”