ƲaRoma 7 - Shona BIBLE

Kufa kumurairo ndihwo upenyu kuna Mwari

¹ Hamuzivi here, hama dzangu, (nokuti ndinotaura navanhu vanoziva murairo), kuti murairo unobata munhu nguva yose youpenyu hwake?

² Nokuti mukadzi, ano murume, akasungwa nomurairo kumurume wake, iye achiri mupenyu; asi kana murume afa, asunungurwa pamurairo womurume.

³ Naizvozvo zvino kana akawanikwa nomumwe murume, murume wake achiri mupenyu, achanzi chipfeve asi kana murume wake afa, asununguka pamurairo, zvino haazi chipfeve kunyangwe akawanikwa nomumwe murume.

⁴ Saka, hama dzangu nemiwo makaitwa vakafa kumurairo nomuviri waKristu; kuti muve womumwe, iye akamutswa muvakafa, kuti tiberekere Mwari zvibereko.

⁵ Nokuti panguva iyo tichiri munyama, kuchiva kwezvivi, kwakamutswa nomurairo, kwakabata mumitezo yedu kuti kubereke zvibereko zvinoisa kurufu.

⁶ Asi zvino takasunungurwa pamurairo, takafa kuna izvozvo zvatakanga takasungwa nazvo; naizvozvo tinobatira Mwari nomweya mutsva, tisingabatiri nezvakanyorwa zvakare.

⁷ Zvino tichatiiko? Murairo zvivi here? Haisva! Asi handizaiziva zvivi kana murairo usaivapo; nokuti handizaiziva kuchiva, kana murairo usina kuti, “Usachiva;”

⁸ zvino zvivi zvakawana nzira nomurairo, zvikaita mandiri mitoo yose yokuchiva; nokuti kunze kwomurairo zvivi zvakafa.

⁹ Ini ndaiva mupenyu kare kunze kwomurairo, asi mutemo uchizosvika, zvivi zvakamuka, ini ndikafa;

¹⁰ nomutemo iwo waifanira kuisa kuupenyu, ndakauwana uchiisa kurufu;

¹¹ nokuti zvivi zvakawana nzira nomutemo, zvikandinyengera, zvikandiuraya nawo.

¹² Naizvozvo murairo mutsvene, nomutemo mutsvene, wakarurama, wakanaka.

¹³ Ko zvino zvakanaka zvakazova rufu kwandiri here? Haisva! Asi ndizvo zvivi, kuti zviratidzwe kuti zvivi, zvakandiitira rufu nezvakanaka; kuti nomutemo zvivi zvive zvakaipa kwazvo–kwazvo.

¹⁴ Nokuti tinoziva kuti murairo ndowemweya; asi ini ndiri wenyama, ndakatengeswa pasi pezvivi.

¹⁵ Nokuti zvandinoita handizvizivi; nokuti zvandinoita hazvizi zvandinoda; asi zvandinovenga, ndizvo zvandinoita.

¹⁶ Zvino kana ndichiita zvandisingadi, ndinobvumira kuti murairo wakanaka

¹⁷ Zvino handichini ndinozviita, asi zvivi zvinogara mandiri.

¹⁸ Nokuti ndinoziva kuti mukati mangu, imo munyama yangu, hamugari chinhu chakanaka; nokuti kuda kuripo kwandiri, asi kuita zvakanaka hakupo.

¹⁹ Nokuti zvakanaka, zvandinoda, handizviiti; asi zvakaipa, zvandisingadi, ndizvo zvandinoita.

²⁰ Zvino kana ndichiita zvandisingadi, handichini ndinozviita, asi zvivi zvinogara mandiri.

²¹ Naizvozvo ndinowana murairo uyu kuti kana ndichida kuita zvakanaka, zvakaipa zviripo kwandiri.

²² Nokuti ndinofarira murairo waMwari nomunhu womukati;

²³ asi ndinoona mumwe murairo pamitezo yangu, unorwa nomurairo womurangariro wangu, unonditapira kumurairo wezvivi uri pamitezo yangu.

²⁴ Ndiri munhu uri pakutambudzika! Ndianiko achandisunungura pamuviri worufu urwu?

²⁵ Mwari ngaavongwe, naJesu Kristu, Ishe wedu. Naizvozvo nomurangariro ndinobatira Mwari, asi nenyama murairo wezvivi.