ƲaRoma 3 - Shona BIBLE

Kukomborerwa kwavaJudha

¹ Ko muJudha anopfuura vamwe neiko? Kana kudzingiswa kunobatsireiko?

² Zvizhinji, nemitowo yose, Pakutanga, kuti ndivo vakapiwa mashoko aMwari.

³ Nokuti zvinodiniko kana vamwe vasina kutenda? Ko kusatenda kwavo kuchakonesa kutendeka kwaMwari here?

⁴ Haisva! Mwari ngaave wachokwadi, asi vanhu vose vave venhema; sezvazvakanyorwa, zvichinzi, “Kuti mururamiswe pamashoko enyu, Mukunde pakutonga kwenyu.”

⁵ Asi kana kusarurama kwedu kuchiratidza kururama kwaMwari, tichatiiko? Kuti Mwari haana kururama here, zvaanoita nehasha? (Ndinotaura nokutaura kwomunhu.)

⁶ Haisva! Mwari angagozotonga nyika seiko?

⁷ Zvino kana chokwadi chaMwari chawanzwa nenhema dzangu, iye akakudzwa nazvo, ko neniwo ndichatongerwei somutadzi?

⁸ Ticharegereiko kutaura (sezvatinopomerwa, uye sezvinoreva vamwe vachiti tinodaro), tichiti, “Ngatiite zvakaipa, kuti zvakanaka zvibudepo?” Kutongwa kwavo kwakarurama.

Vanhu vose vane zvivi, asi vanoruramiswa muna Jesu Kristu

⁹ Zvino todiniko? Tinovapfuura here? Kwete napaduku; nokuti tambopa vose mhosva, vaJudha navaGiriki, tichiti vose vakasungwa nezvivi;

¹⁰ sezvazvakanyorwa, zvichinzi, “Hakuna akarurama, kunyangwe nomumwe;

¹¹ Hakuna anonzwisisa, Hakuna anotsvaka Mwari;

¹² Vakatsauka vose, vakava vanhu vasina maturo, Hakuna anoita zvakanaka, kunyangwe nomumwechete;

¹³ Huro dzavo hwiro hwakashama; Vakanyengera nendimi dzavo; Uturu hwenyoka huri mumiromo yavo;

¹⁴ Muromo wavo uzere nokutuka nokuvava;

¹⁵ Tsoka dzavo dzinokurumidza kuteura ropa;

¹⁶ Kuparadza nenhamo zviri munzira dzavo;

¹⁷ Nenzira yorugare havana kuiziva

¹⁸ Kutya Mwari hakupo pamberi pavo.”

¹⁹ Zvino tinoziva kuti zvose zvinorehwa nomurairo, anozvitaura kuna vose vari pasi pomurairo; kuti miromo yose idzivirwe, nenyika yose ive nemhosva pamberi paMwari.

²⁰ Nokuti hakuna nyama ingaruramiswa pamberi pake namabasa omurairo; nokuti zvivi zvinoziviswa nomurairo.

²¹ Asi zvino kururama kwaMwari kwakaratidzwa kunze kwomurairo, kuchipupurirwa nomurairo navaporofita;

²² ndiko kururama kwaMwari kunouya nokutenda kuna Jesu Kristu kuna vose vanotenda; nokuti havasiyani,

²³ nokuti vose vakatadza, vakasasvika pakubwinya kwaMwari.

²⁴ Vanongoruramiswa nenyasha dzake nokudzikinura kuri muna Kristu Jesu;

²⁵ iye akagadzwa naMwari, kuti ave muyananiso nokutenda muropa rake, kuti kururama kwake kuratidzwe, nokuti zvivi zvakaitwa kare zvakaregerwa, Mwari achivaitira mwoyo murefu;

²⁶ kuti kururama kwake kuratidzwe nenguva ino, kuti arurama iye amene, uye aruramise uyo unotenda kuna Jesu.

²⁷ Zvino kuzvikudza kuripiko? Kwabviswa. Nomurairo upiko? Wamabasa here? Kwete, asi nomurairo wokutenda.

²⁸ Naizvozvo tinoti, munhu anoruramiswa nokutenda kunze kwamabasa omurairo.

²⁹ Ko Mwari ndiye wavaJudha voga here? Haazi wavahedheniwo here? Hongu, wavahedheniwo.

³⁰ Mwari zvaari mumwechete, acharuramisa vakadzingiswa pamusoro pokutenda, navasina kudzingiswa nokutenda.

³¹ Zvino tinokonesa murairo nokutenda here? Haisva! Asi tinosimbisa murairo.