ƲaHeberu 11 - Shona BIBLE

Kutenda chinyi, vanhu vakakunda nokutenda

¹ Zvino kutenda ndirwo rusimbiso rwezvinhu zvatinotarisira, nechiratidzo chezvinhu zvatisingaoni.

² Nokuti naiko vanhu vakare vakapupurirwa zvakanaka.

³ Nokutenda tinonzwisisa kuti nyika dzakanatsorongedzwa nezwi raMwari, naizvozvo zvinhu, zvinoonekwa, hazvina kuitwa nezvinhu zvinoonekwa.

⁴ Nokutenda Abheri akabayira Mwari chibayiro chakanaka kune chaKaini; akapupurirwa nacho kuti akanga akarurama, Mwari achipupurira zvipo zvake; naiko kutenda iye, kunyangwe afa hake, achangotaura nazvino.

⁵ Nokutenda Inoki akatorwa, kuti arege kuona rufu; akasaonekwa, nokuti Mwari akanga amutora; nokuti asati atorwa akapupurirwa kuti akanga achifadza Mwari.

⁶ Kana kusina kutenda hazvibviri kumufadza; nokuti anouya kuna Mwari, anofanira kutenda kuti iye aripo, uye kuti anopa vanomutsvaka mubairo wavo.

⁷ Nokutenda Nowa akati anyeverwa pamusoro pezvinhu zvichigere kuonekwa, akagadzira areka nokutya Mwari, kuti aponese mhuri yake; akapa nyika mhosva nazvo, akagara nhaka yokururama kunouya nokutenda.

⁸ Nokutenda Abhurahamu, akati adanwa, akateerera, akabuda, akaenda kunzvimbo yaakanzi achaipiwa ive nhaka yake; akabuda akaenda, asingazivi kwaanoenda.

⁹ Nokutenda akandogara somutorwa Munyika yeChipikirwa, sapanyika yavamwe, akagara mumatende naIsaka naJakobho, vadyi venhaka yechipikirwa chimwe pamwechete naye;

¹⁰ nokuti akanga achitarira guta rine nheyo, Mwari ari mhizha nomuvaki waro.

¹¹ Nokutenda naiye Sara akapiwa simba rokutora mimba, kunyangwe akanga achembera, nokuti akati iye akamupikira akatendeka.

¹² Saka kumunhu mumwe, akanga akaita sowafa, kwakabva vana vakaita senyenyedzi dzokudenga nokuwanda kwavo, uye sejecha riri pamhenderekedzo dzegungwa risingaverengwi.

¹³ Ivava vose vakafa vachitenda, vasina kupiwa zvipikirwa, asi vakazviona zviri kure, vakazvikwazisa, vakatenda kuti ivo vaeni navafambi panyika.

¹⁴ Nokuti vanotaura zvakadaro, vanoratidza kuti vanotsvaka nyika yavo chaiyo.

¹⁵ Nokuti kana vairamba vachifunga nyika iyo yavakabva kwairi, vangadai vawana nguva yokudzoka.

¹⁶ Asi zvino vanoda imwe inopfuura nokunaka, ndiyo yokudenga; naizvozvo Mwari haana nyadzi pamusoro pavo kuti aidzwe Mwari wavo; nokuti wakavagadzirira guta.

¹⁷ Nokutenda Abhurahamu, achiedzwa, akabayira Isaka; iye akanga agamuchira kwazvo zvipikirwa, akanga achibayira mwana wake wakaberekwa mumwe woga;

¹⁸ iye akanga audzwa, zvichinzi, “Muna Isaka vana vako vachatumidzwa;

¹⁹ nokuti wakati Mwari anogona kumutsa munhu kunyangwe kuvakafa; ndipapowo, kana tichitaura nomufananidzo, paakamudzoserwa.”

²⁰ Nokutenda Isaka akaropafadza Jakobho naEsau pamusoro pezvinozoitwa.

²¹ Nokutenda Jakobho pakufa kwake akaropafadza mwanakomana mumwe nomumwe waJosefa; akanamata akasendamira pamusoro pomudonzvo wake.

²² Nokutenda Josefa, ofa, akataura zvokubuda kwavana VaIsiraeri, akavaraira pamusoro pamapfupa ake.

²³ Nokutenda Mosesi pakuberekwa kwake akavanzwa navabereki vake mwedzi mitatu, nokuti vakaona kuti akanga ari mwana wakanaka; havana kutya murairo wamambo.

²⁴ Nokutenda Mosesi akura, akaramba kunzi mwanakomana womukunda waFarao,

²⁵ akati zviri nani kuitirwa zvakaipa pamwechete navanhu vaMwari pakufarira zvivi nguva duku;

²⁶ akati kuzvidzwa kwaKristu ipfuma huru kupfuma kwose kweIjipiti; nokuti akatarira mubairo.

²⁷ Nokutenda akabva Ijipiti, asingatyi kutsamwa kwamambo; nokuti akatsungirira somunhu anoona iye asingaonekwi.

²⁸ Nokutenda, akavamba Pasika nokusasa ropa, kuti muurayi wamatangwe avarege ivo.

²⁹ Nokutenda, vakayambuka Gungwa Dzvuku, sapanyika yakaoma; vaIjipiti vachiedza izvozvo, vakabitirirwa.

³⁰ Nokutenda, masvingo eJeriko akawira pasi, apoteredzwa mazuva manomwe.

³¹ Nokutenda, Rakabhi chifeve, haana kufa pamwechete navasina kuteerera, nokuti akanga agamuchira vashori norugare.

³² Ndichataurireiko zvimwe? Nokuti ndichapererwa nenguva, kana ndikataura zvaGidheoni, naBharaki, naSamisoni, naJefita, naDhavhidhi, naSamueri, navaporofita;

³³ avo vakakunda ushe nokutenda kwavo vakaita zvakarurama, vakapiwa zvipikirwa, vakadzivira miromo yeshumba.

³⁴ Vakadzima simba romoto, vakatiza minondo inopinza, vakasimbiswa muutera, vakava nesimba pakurwa, vakadzinga hondo dzamamwe marudzi.

³⁵ Vakadzi vakapiwazve vakafa vavo, vamutswa; vamwe vakapurwa, vakaramba kusunungurwa, kuti vawane kumuka kwakapfuura nokunaka;

³⁶ vamwe vakaedzwa, vachisekwa, vachirohwa zvikuru, uyezve vachisungwa, vachiiswa mutorongo;

³⁷ vakatakwa namabwe, vakaedzwa, vakaurayiwa nomunondo; vakafamba vakafuka matehwe amakwai, nenguo dzembudzi; vasina chinhu, vachitambudzika, vachiitirwa zvakaipa;

³⁸ (nyika haina kufanirwa navo), vachidzungaira mumarenje, nomumakomo, nomumapako, nomumakomba enyika.

³⁹ Ava vose vakanga vapupurirwa nokutenda kwavo, asi havana kupiwa zvipikirwa,

⁴⁰ nokuti Mwari akanga atigadzirira, chimwe chinhu chinopfuura nokunaka, kuti ivo varege kukwaniswa kunze kwedu.