Ruka 5 - Shona BIBLE

Kubatwa kwehove zhinji

¹ Zvino, vanhu vazhinji vakati vachimumanikidza kuti vanzwe shoko raMwari, iye amire paGungwa reGenesareti,

² akaona magwa maviri ari pagungwa, asi vabati vehove vakanga vabuda maari, vachisuka husvasvi hwavo.

³ Akapinda mune rimwe igwa, raiva raSimoni, akakumbira kwaari kuti abve pamhenderekedzo zvishoma apinde mumvura. Zvino akagara, akadzidzisa vanhu vazhinji, ari muigwa.

⁴ Akati apedza kutaura, akati kuna Simoni, “Endai kwakadzika, mukande husvasvi hwenyu, kuti mubate.”

⁵ Simoni akapindura, akati, “Tenzi, takatambura usiku hwose, tisingabati chinhu; asi zvamadaro imi, ndichakanda husvasvi.”

⁶ Vakati vaita izvozvo, vakakuva hove zhinji, husvasvi hwavo hukabvaruka.

⁷ Vakaninira shamwari dzavo mune rimwe igwa, kuti vauye kuzovabatsira. Vakauya, vakazadza magwa ose ari maviri, akanga onyura.

⁸ Zvino, Simoni Pita wakati achizviona, akazviwisira pasi pamabvi aJesu, akati, “Ishe, ibvai kwandiri, nokuti ndiri mutadzi.”

⁹ Nokuti akanga ashamiswa iye, navose vaakanga anavo nokuwanda kwehove dzavakanga vabata.

¹⁰ Ndizvo zvanga zvaitawo Jakobho, naJohani, vanakomana vaZebhedhi, vaiva shamwari dzaSimoni. Ipapo Jesu akati kuna Simoni, “Usatya, kubva zvino uchabata vanhu.”

¹¹ Zvino, vakati vaisa magwa kunyika, vakasiya zvose vakamutevera.

Jesu anoporesa munhu anamaperembudzi

¹² Akati ari kune rimwe guta, tarira, kwakanga kune murume akanga ana maperembudzi muviri wose; iye akati achiona Jesu, akazviwisira pasi nechiso, ndokukumbira kwaari, achiti, “Ishe, kana muchida, munogona kundinatsa.”

¹³ Ipapo akatambanudza ruoko, akamubata, achiti, “Ndinoda, chinatswa!” Pakarepo maperembudzi akabva kwaari.

¹⁴ Akamurayira kuti asaudza munhu, akati, “Enda unozviratidza kumupristi, ubayire pamusoro pokunatswa kwako zvakarairwa naMosesi, chive chapupu kwavari.”

¹⁵ Asi mukurumbira wake wakapararira nokupfuurisa; vanhu vazhinji zhinji vakaungana kuzomunzwa, nokuporeswa matenda avo.

¹⁶ Asi iye akaenda mumarenje, akandonyengetera.

Jesu anoporesa munhu akafa mitezo

¹⁷ Nerimwe ramazuva iwayo akanga achidzidzisa; VaFarisi navadzidzisi vomurairo vakanga vagerepo, vaibva kumisha yose yeGareriya neJudhiya neJerusaremu; simba raIshe rokuporesa rakanga rinaye.

¹⁸ Zvino, tarira, vamwe varume vakanga vakatakura munhu akanga akafa mitezo, ari panhoo, vakatsvaka kupinda naye, nokumuisa pamberi pake.

¹⁹ Zvino, vakati vachishayiwa pavangamupinza napo, nokuda kwavazhinji, vakakwira pamusoro peimba, vakamuburusira mukati nenhoo yake, napakati pamapfuriro, pamberi paJesu.

²⁰ Iye akati achiona kutenda kwavo, akati, “Murume, wakanganwirwa zvivi zvako.”

²¹ Vanyori navaFarisi vakatanga kufunga, vachiti, “Ndianiko uyu anotaura achishonha Mwari? Ndianiko angakanganwira zvivi, asi Mwari oga?”

²² Zvino Jesu, zvaaiziva mifungo yavo, akapindura, akati kwavari, “Munofungeiko mumwoyo yenyu?

²³ Chiiko chakareruka, kuti, ‘Wakanganwirwa zvivi zvako,’ kana kuti, ‘Simuka, ufambe?’

²⁴ “Asi kuti muzive kuti Mwanakomana womunhu ane simba panyika rokukanganwira zvivi, akati kune akafa mitezo, ‘Ndinoti kwauri, simuka, utore nhoo yako, uende kumba kwako.’ ”

²⁵ Akasimuka pakarepo pamberi pavo, akatora chaakanga avete pamusoro pacho, akaenda kumba kwake, achirumbidza Mwari.

²⁶ Vakashamiswa vose, vakarumbidza Mwari, vakatya kwazvo, vachiti, “Taona madambi nhasi!”

Kudanwa kwaRevhi

²⁷ Shure kwaizvozvo, akabuda, akaona muteresi, ainzi Revhi, agere panotereswa, akati kwaari, “Nditevere!”

²⁸ Iye akasiya zvose, akasimuka, akamutevera.

²⁹ Revhi akamuitira mabiko makuru mumba make; kukavapo vazhinji zhinji vavateresi navamwe, vakanga vagere navo pakudya.

³⁰ VaFarisi navanyori vavo vakanyunyutira vadzidzi vake, vachiti, “Munodyireiko navateresi navatadzi, nokunwa navo?”

³¹ Jesu akapindura, akati kwavari, “Vasingarwari havatsvaki chiremba, asi vanorwara.

³² Handina kuuya kuzodana vakarurama, asi vatadzi, kuti vatendeuke.”

Kuzvinyima zvokudya

³³ Zvino vakati kwaari, “Vadzidzi vaJohani vanozvinyima zvokudya kazhinji, vachikumbira; navaVaFarisi vanodarowo, asi venyu vanodya nokunwa.”

³⁴ Jesu akati kwavari, “Mungadzivisa shamwari dzemuwani kudya, muwani achiri kwavari here?

³⁵ Asi mazuva achasvika; zvino kana muwani azobviswa kwavari, vachazvinyima zvokudya namazuva iwayo.”

³⁶ Akataura navo nomufananidzo, akati, “Hakuna munhu achabvarura chiremo panguo itsva, akachiisa panguo yakasakara; nokuti chichabvarura nguo itsva, uye chiremo chenguo itsva hachinganzwani neyakasakara.

³⁷ Hakuna munhu achadira waini itsva muhombodo tsaru kana akadaro waini itsva ichaparusa hombodo, ikateuka, nehombodo dzikafawo;

³⁸ asi waini itsva inofanira kudirwa muhombodo itsva.

³⁹ Hakuna munhu anoti kana anwa waini tsaru, angazoda itsva; nokuti anoti, ‘Tsaru ndiyo yakaisvonaka.’ ”