Ruka 17 - Shona BIBLE

Zvigumbuso nokukanganwirana

¹ Zvino akati kuvadzidzi vake, “Hazvingaitiki kuti zvigumbuso zvisauya. Asi ane nhamo iye wazvinouya naye.

² Zvaiva nani kwaari, kuti guyo risungirirwe mumutsipa wake, awisirwe mugungwa, pakuti agumbuse mumwe wavaduku ava.

³ “Chenjerai; kana hama yako ikatadza, umurayire; kana akatendeuka, umukanganwire.

⁴ Kunyangwe akutadzira kanomwe nezuva rimwe, akadzokera kwauri kanomwe, achiti, ‘Ndatendeuka;’ umukanganwire.”

Simba rokutenda. Varanda pasina

⁵ Zvino vapostori vakati kuna Ishe, “Tiwedzerei kutenda kwedu.”

⁶ Ishe akati, “Kana maiva nokutenda kwakaita setsanga yemasitadhi, maiti kumuonde uyu, ‘Dzurwa, usimwe mugungwa!’ Uchakuteererai.

⁷ “Ndiani kwamuri angava nomuranda anorima, kana anofudza makwai, akati kwaari, achibva kumunda, Uya, ugare pakudya?

⁸ “Handiti angati kwaari, ‘Ndigadzirire zvokudya, uzvisunge chiuno, undishandire, kusvikira ini ndadya, ndikanwa; iwe ugozodya, nokunwa?’

⁹ Ko angatenda muranda, zvaaita zvakanga zvarayirwa here?

¹⁰ “Saizvozvo nemiwo, kana maita zvose zvamarayirwa, muti, ‘Tiri varanda pasina, takaita sezvataifanira kuita.’ ”

Jesu anoporesa vana maperembudzi vane gumi

¹¹ Zvino vakati vachienda Jerusaremu, akapfuura napaSamaria neGareriya.

¹² Zvino achipinda munomumwe musha, akasangana navarume vane gumi vaiva namaperembudzi, vamire kure.

¹³ Vakadanidzira, vachiti, “Jesu, Tenzi, tinzwirei ngoni!”

¹⁴ Zvino akati achivaona, akati kwavari, “Endai mundozviratidza kuvapristi.” Vakati vachienda, vakapora.

¹⁵ Zvino mumwe wavo, akati achiona kuti ndaporeswa, akadzoka, achikudza Mwari nezwi guru;

¹⁶ akawira pasi nechiso patsoka dzake, akamuvonga. Zvino iye akanga ari muSamaria.

¹⁷ Ipapo Jesu akapindura, akati, “Havana kuporeswa vane gumi here? Vapfumbamwe varipiko?

¹⁸ Hapana akawanikwa adzokera kuzokudza Mwari, asi uyu mutorwa here?”

¹⁹ Ipapo akati kwaari, “Simuka, uende; kutenda kwako kwakuponesa.”

Ushe hwaMwari, nokudzoka kwaIshe

²⁰ Zvino akati achibvunzwa navaFarisi kuti ushe hwaMwari hunosvika rini, akapindura akati, “Ushe hwaMwari hahuuyi huchionekwa.

²¹ Havangati, ‘Tarirai pano!’ Kana, ‘Uko!’ Nokuti tarirai, ushe hwaMwari huri mukati menyu.”

²² Akati kuvadzidzi vake, “Mazuva achasvika amuchatsvaka kuona zuva rimwe ramazuva oMwanakomana womunhu, asi hamungarioni.

²³ Vachati kwamuri, ‘Tarirai uko! Tarirai pano!’ Regai kuenda, kana kuvatevera;

²⁴ nokuti semheni inopenya, ichibva kune rumwe rutivi pasi pedenga, ichivhenekera kusvikira kune rumwe rutivi pasi pedenga; ndizvo zvichaita Mwanakomana womunhuo nezuva rake.

²⁵ Asi anofanira kumbotambudzika zvizhinji, nokurambwa norudzi urwu.

²⁶ Sezvazvakanga zvakaita namazuva aNowa, ndizvo zvazvichaitawo namazuva oMwanakomana womunhu;

²⁷ vaidya, nokunwa, nokuwana, nokuwaniswa, kusvikira zuva rakapinda Nowa muareka, mvura zhinji ikasvika, ikaparadza vose.

²⁸ Sezvazvakanga zvakaitawo namazuva aRoti; vaidya, nokunwa, nokutenga, nokutengesa, nokusima, nokuvaka;

²⁹ asi nomusi wakabuda Roti muSodhoma, moto nesurufa zvakanaya, zvichibva kudenga, zvikavaparadza vose.

³⁰ Ndizvo zvazvichaitawo nezuva iro, Mwanakomana womunhu raachaonekwa naro.

³¹ “Nezuva iro, ari pamusoro peimba, nhumbi dzake dziri mumba, ngaarege kuburuka kundodzitora; saizvozvowo, ari kumunda ngaarege kudzokera kune zviri shure.

³² “Rangarirai mukadzi waRoti.

³³ Ani naani anotsvaka kungwarira upenyu hwake, acharasikirwa nahwo, uye ani naani anorasikirwa nahwo, acharuramiswa.

³⁴ Ndinoti kwamuri, usiku uhwo varume vaviri vachava panhoo imwe, mumwe achatorwa, mumwe achasiyiwa.

³⁵ Vakadzi vaviri vachakuya pamwechete, mumwe achatorwa, mumwe achasiyiwa. [

³⁶ Vaviri vachava kumunda, mumwe achatorwa, mumwe achasiyiwa.]”

³⁷ Ipapo vakapindura, vakati kwaari, “Ipiko, Ishe?” Akati kwavari, “Apo pano mutumbi, ndipo panounganirawo magora.”