Mupiro 3 - Shona BIBLE

Zvipiriso zvokuyananisa

¹ “Kana chipo chake chiri chibayiro chezvipiriso zvokuyananisa, kana achiuya nemombe, kana iri nzombe kana hadzi, ngaauye nechisina chipomerwa pamberi paJehovha.

² Zvino ngaaise ruoko rwake pamusoro wechipiriso chake, achiuraye pamukova wetende rokusangana, vanakomana vaAroni, vapristi, vagosasa ropa pamusoro peatari kunhivi dzose.

³ Zvino ngaape Jehovha chipiriso chinoitwa nomoto pachibayiro chezvipiriso zvokuyananisa, chokuti mafuta anofukidza hura, namafuta ose ari pahura,

⁴ netsvo mbiri, namafuta ari pamusoro padzo, ari pachiuno, namafuta ari pamusoro pechiropa, ngaazvibvise pamwechete netsvo.

⁵ Ipapo vanakomana vaAroni vanofanira kuzvipisa paatari pamusoro pechipiriso chinopiswa, chiri pamusoro pehuni dziri pamoto; kuti chive chipiriso chinopiswa chinonhuwira zvakanaka kuna Jehovha.

⁶ “Kana chipo chake chechibayiro chezvipiriso zvokuyananisa chiri chezvipfuwo zviduku, kana uri mukono kana hadzi, ngaauye nechisina chipomerwa.

⁷ Kana achiuya negwayana rechipiriso chake, ngaauye naro pamberi paJehovha,

⁸ zvino aise ruoko rwake pamusoro pechipo chake, ndokuchiuraya pamberi petende rokusangana, vanakomana vaAroni vagosasa ropa racho pamusoro peatari panhivi dzose.

⁹ Zvino ngaape Jehovha chipiriso chinoitwa pamoto pachibayiro chezvipiriso zvokuyananisa, chokuti mafuta aro nebhemhe rose, azvibvise pedyo nomusana, namafuta anofukidza hura, namafuta ose ari pamusoro pohura,

¹⁰ netsvo mbiri, namafuta ari pamusoro padzo, ari pachiuno, namafuta ari pamusoro pechiropa, ngaazvibvise pamwechete netsvo.

¹¹ Ipapo mupristi ngaazvipise pamusoro peatari; ndizvo zvokudya zvechipiriso chinoitirwa Jehovha nomoto.

¹² “Kana chipo chake chiri chembudzi, ngaauye nayo pamberi paJehovha;

¹³ zvino ngaaise ruoko rwake pamusoro wayo, aiuraye pamberi petende rokusongana; vanakomana vaAroni vagosasa ropa rayo pamusoro peatari kunhivi dzose.

¹⁴ Zvino ngaape zvimwe zvazvo chive chipo chake, chipiriso chinoitirwa Jehovha nomoto; zvinoti mafuta anofukidza hura, namafuta ose ari pamusoro pehura,

¹⁵ netsvo mbiri, namafuta ari pamusoro padzo, ari pachiuno, namafuta ari pamusoro pechiropa, azvibvise pamwechete netsvo.

¹⁶ Zvino mupristi ngaazvipise pamusoro peatari; ndizvo zvokudya zvechipiriso chinoitwa nomoto, zvive zvinonhuwira zvakanaka; mafuta ose ndeaJehovha.

¹⁷ Ngauve murairo usingaperi kusvikira kumarudzi enyu ose padzimba dzenyu dzose, kuti murege kudya mafuta neropa.”