Mateo 20 - Shona BIBLE

Mufananidzo wavashandi pamunda

¹ “Nokuti ushe hwokudenga hwakafanana nasaimba, akabuda mangwanani kundotsvakira munda wake wemizambiringa vashandi.

² Akati atenderana navashandi kuvapa dhinari pazuva, akavatuma kumunda wake wemizambiringa.

³ “Akabuda nenguva inenge yechitatu, akaona vamwe vamire padare, vasina basa,

⁴ akati kwavari, ‘Endai imiwo mumunda wemizambiringa, ndigokupai zvakafanira.’ Vakaenda.

⁵ Akabudazve nenguva inenge yechitanhatu neyepfumbamwe, akadarozve.

⁶ Akabuda nenguva inenge yegumi neimwe, akawana vamwe vamire; akati kwavari, ‘Makamirireiko pano zuva rose musina basa.’

⁷ Vakati kwaari, ‘Nokuti hapana nomunhu akatipa basa.’ Akati kwavari, ‘Endai nemiwo mumunda wangu wemizambiringa.’

⁸ Ava madekwana, mwene womunda wemizambiringa akati kumutariri wake, ‘Dana vashandi, uvape mubairo wavo, uchitanga kuno wokupedzisira, ugumire kune wokutanga.’

⁹ “Zvino venguva inenge yegumi neimwe vakati vachiuya, mumwe nomumwe akapiwa dhinari.

¹⁰ Vokutanga vakati vachiuya, vakafunga kuti tichapiwa kupfuura; ivo vakapiwawo mumwe nomumwe dhinari.

¹¹ Vakati vachipiwa, vakapopotera saimba,

¹² vakati, ‘Ava vokupedzisira, vakashanda awa imwechete, mavaenzanisa nesu, takatambudzika zuva rose, tichipiswa nezuva.’

¹³ Akapindura, akati kuno mumwe wavo, ‘Shamwari, handikuitiri zvisakarurama; hauna kutenderana neni kuti upiwe dhinari here?

¹⁴ Tora zvako, uende, ndinoda kupa vokupedzisira sewe.

¹⁵ Ko handina kutenderwa kuita pandinoda napo here? Ziso rako rakaipa, nokuti ini ndakanaka here?’ ”

¹⁶ “Saizvozvo vokupedzisira vachava vokutanga, novokutanga vachava vokupedzisira.”

Jesu anovaudza zvorufu rwake nokumuka kwake

¹⁷ Jesu akati okwira Jerusaremu, akatora vadzidzi vake vane gumi navaviri vari voga. Akati kwavari panzira,

¹⁸ “Tarirai, tinokwira Jerusaremu, Mwanakomana womunhu achaiswa kuvapristi vakuru navanyori, vachamutongera rufu.

¹⁹ “Vachamuisa kuvahedheni, kuti asekwe, arohwe, aroverwe pamuchinjikwa, asi nezuva retatu achamutswazve.”

Vana vaZebhedhi vanokumbira kuitwa vakuru

²⁰ Zvino mai vevanakomana vaZebhedhi vakauya kwaari navanakomana vavo, vachimupfugamira, kuzokumbira chinhu kwaari.

²¹ Akati kwavari, “Munotsvakeiko?” Vakati kwaari, “Rayirai, kuti vanakomana vangu ava vaviri vagare, mumwe kurudyi rwenyu, mumwe kuruboshwe, muushe hwenyu.”

²² Asi Jesu akapindura, akati, “Hamuzivi zvamunokumbira. Mungagona kunwira mukombe pandinozonwira ini, here?” Vakati kwaari, “Tingagona.”

²³ Akati kwavari, “Muchanwira henyu mukombe wangu, asi kugara kurudyi, nokuruboshwe, handisini ndinopa, asi ndezvavakazvigadzirirwa izvo naBaba vangu.”

²⁴ Vane gumi vakati vachizvinzwa, vakatsamwira avo vaviri vana vomunhu mumwe.

²⁵ Asi Jesu akavadanira kwaari, akati, “Munoziva kuti machinda avahedheni anovarayira, navakuru vavo vanoita simba navo.

²⁶ Pakati penyu ngazvirege kuva kudaro; asi ani naani anoda kuva mukuru pakati penyu, ngaave mushandiri wenyu.

²⁷ Ani naani anoda kuva wokutanga pakati penyu, ngaave muranda wenyu.

²⁸ Zvakaita soMwanakomana womunhu asina kuuya kuzoshandirwa, asi kushandira, nokupa upenyu hwake ruve rudzikinuro rwavazhinji.”

Jesu anosvinudza mapofu maviri paJeriko

²⁹ Vakati vachibva Jeriko, vanhu vazhinji zhinji vakamutevera.

³⁰ Zvino tarira, mapofu maviri akanga agere panzira, akati achinzwa kuti Jesu opfuura, akadanidzira, achiti, “Ishe, Mwanakomana waDhavhidhi, tinzwirei ngoni!”

³¹ Vanhu vazhinji vakaarayira kuti anyarare; asi akanyanya kudanidzira, achiti, “Ishe, Mwanakomana waDhavhidhi, tinzwirei ngoni!”

³² Ipapo Jesu akamira, akaadana, akati, “Munoda kuti ndikuitireiko?”

³³ Akati kwaari, “Ishe, kuti meso edu asvinudzwe.”

³⁴ Jesu akaanzwira tsitsi, akabata meso awo; pakarepo akasvinudzwa, akamutevera.