Mariko 3 - Shona BIBLE

Jesu anoporesa munhu aiva noruoko rwakakokonyara

¹ Akapindazve musinagoge; zvino kwakanga kune munhu akanga ane ruoko rwakakokonyara.

² Vakamutarisisa kuona kana angamuporesa nomusi weSabata; kuti vamupomere mhosva.

³ Zvino akati kumunhu akanga ano ruoko rwakakokonyara, “Simuka pakati pavo!”

⁴ Akati kwavari, “Zvakatenderwa here neSabata kuita zvakanaka kana zvakaipa, kuponesa munhu kana kuuraya?” Vakanyarara.

⁵ Zvino akati aringa–ringa achivatarira nokutsamwa, ane shungu nokuda kwokuoma kwemwoyo yavo, akati kumunhu, “Tambanudza ruoko rwako.” Akarutambanudza, ruoko rwake rukapora.

⁶ Zvino VaFarisi vakati vabuda, vakandorangana pakarepo navaHerodhi pamusoro pake kuti vangamuuraya sei.

Jesu anoporesa vazhinji

⁷ Zvino Jesu akaenda navadzidzi vake kugungwa; vanhu vazhinji–zhinji vakamutevera vachibva Gareriya; nokuJudhiya,

⁸ neJerusaremu, neIdhumia, nemhiri kwaJodhani, nokunyika yeTaya neSidhoni, vanhu vazhinji zhinji vakati vanzwa zvaanoita, vakauya kwaari.

⁹ Akaudza vadzidzi vake kuti igwa rigare nokuda kwavazhinji, kuti varege kumutsikirira.

¹⁰ Nokuti akanga aporesa vazhinji; naizvozvo vose vakanga vaine zvirwere vaitsikinyidzana, kuti vachida kumubata panguva imwechete.

¹¹ Nemweya yakaipa yakati kana yamuona, yaiwira pasi pamberi pake, ikadanidzira ichiti, “Ndiwe Mwanakomana waMwari!”

¹² Akairayira zvikuru kuti irege kumuzivisa pachena.

Jesu anodana vadzidzi vake

¹³ Zvino akakwira mugomo akadana vaakanga achida, vakauya kwaari.

¹⁴ Akagadza vane gumi navaviri kuti vagare naye, avatume kuti vaparidze,

¹⁵ uye vave nesimba rokubudisa mweya yakaipa.

¹⁶ Akatumidza Simoni zita rinonzi Petirosi,

¹⁷ naJakobho, mwanakomana waZebhedhi, naJohani, munun'una waJakobho; akavatumidza ivo mazita anonzi Bhoanerigesi, ndokuti “Vanakomana vokutinhira;”

¹⁸ naAndireya, naFiripi, naBhatoromiyo, naTomasi, naJakobho mwanakomana waArifeusi, naTadhiasi, naSimoni muKenani,

¹⁹ naJudhasi Isikarioti akazomupandukirawo. Zvino akapinda mumba,

Kushonha Mweya Mutsvene

²⁰ vazhinji vakaunganazve, nokudaro vakanga vasingagoni kunyangwe kudya chingwa.

²¹ Vanhu vokwake vakati vachizvinzwa, vakabuda kuzomubata, nokuti vakati, “Anopenga.”

²² Navanyori vakanga vaburuka vachibva Jerusaremu, vakati, “Ana Bheerizebhuri, anobudisa mweya yakaipa nomuchinda wemweya yakaipa.”

²³ Zvino akavadanira kwaari, akati kwavari nemifananidzo. “Satani angabudisa Satani seiko?

²⁴ Kana ushe huchizvipesanisa, ushe uhwo hahungagoni kumira.

²⁵ Kana imba ichizvipesanisa, imba iyo haingagoni kumira.

²⁶ Kana Satani achizvimukira, akazvipesanisa, haangagoni kumira, asi anopera.

²⁷ “Hakuna munhu angapinda mumba moane simba, akatora nhumbi dzake, asati ambosunga ane simba; zvino angaparadza imba yake.

²⁸ “Zvirokwazvo ndinoti kwamuri, vanakomana vavanhu vacharegererwa zvivi zvose, nokushonha kwose kwavanoshonha Mwari nako;

²⁹ asi ani naani ashonha Mweya Mutsvene, haangaregerwi nokusingaperi, asi ane mhosva yechivi chisingaperi.”

³⁰ Nokuti vakati, “Ano mweya wakaipa.”

Ukama naJesu

³¹ Zvino mai vake navanun'una vake vakauya, vakamira kunze, vakatumira nhume kwaari, kumudana.

³² Vazhinji vakanga vagere, vakamukomba, vakati kwaari, “Tarirai, mai venyu navanun'una venyu navakoma nehanzvadzi dzenyu vari kunze vachikutsvakai.”

³³ Akavapindura, akati, “Mai vangu, vakoma navanun'una vangu ndivanaaniko?”

³⁴ Zvino akaringa–ringa vanhu vakanga vagere, vakamukomba, akati, “Tarirai mai vanhu navakoma navanun'una vangu!

³⁵ “Nokuti ani naani anoita kuda kwaMwari, ndiye mukoma nomunun'una wangu, nehanzvadzi, naamai.”