Mabasa 6 - Shona BIBLE

Vanotsanangura varume vanomwe kuchengeta chirikadzi

¹ Zvino namazuva iwayo, vadzidzi vachiwanda, vaJudha, vaitaura ChiGiriki, vakanyunyutira VaHebheru, nokuti chirikadzi dzavo dzaidarikwa pakugoverwa kwomusi mumwe nomumwe.

² Zvino vane gumi navaviri vakadana vadzidzi vazhinji, vakati, “Hakuzakafanira kuti isu tirege kuparidza shoko raMwari, tishumire pamatafura.

³ Zvino hama dzangu, tsanangurai pakati penyu varume vanomwe, vanopupurirwa zvakanaka, vazere naMweya nouchenjeri, vatingaisa pabasa iri.

⁴ Asi isu tichatsungirira pakunyengetera napabasa rokuparidza shoko.”

⁵ Shoko iri rikafadza vazhinji vose, vakatsanangura Sitefani, murume akanga azere nokutenda naMweya Mutsvene, naFiripi, naPirokoro, naNikano, naTimoni, naPamenasi, naNikorasi, nyakupindukira kuchiJudha weAndiyoki.

⁶ Vakavaisa pamberi pavapostori; vakanyengetera, vakaisa maoko pamusoro pavo.

⁷ Shoko raMwari rikakura, vadzidzi vakawanda zvikuru muJerusaremu; navapristi vazhinji vakagamuchira kutenda.

Sitefani anourayiwa

⁸ Zvino Sitefani, azere nenyasha nesimba, akaita zvinoshamisa nezviratidzo zvikuru pakati pavanhu.

⁹ Ipapo vamwe vavo, vaiva vesinagoge rainzi ravasununguki, navaKurene, navaArekizandiria, naveSirisia, naveEzhia, vakasimuka vakaita nharo naSitefani.

¹⁰ Asi vakanga vasingagoni kukunda kuchenjera kwake, naMweya waaitaura naye.

¹¹ Ipapo vakamutsa varume, vaiti, “Takamunzwa achitaura mashoko anomhura Mosesi naMwari.”

¹² Vakakurudzira vanhu, navakuru, navanyori; vakamuwira, vakamubata, vakamuisa kumakurukota,

¹³ vakaisapo zvapupu zvenhema, zvaiti, “Munhu uyu haaregi kutaura mashoko anomhura imba iyi tsvene nomurairo.

¹⁴ “Nokuti takamunzwa achiti, ‘Uyu Jesu weNazareta achaparadza nzvimbo iyi nokusandura tsika dzatakapiwa naMosesi.’ ”

¹⁵ Zvino vose vakanga vagere pamakurukota, vakamutarisisa, vakaona chiso chake chakaita sechiso chomutumwa.