Mabasa 11 - Shona BIBLE

Petirosi anozvidavirira paJerusaremu

¹ Zvino vapostori nehama, vaiva paJudhiya, vakanzwa kuti vahedheni vakagamuchirawo shoko raMwari.

² Zvino Petirosi akati akwira Jerusaremu, vatendi vokudzingisa vakaita nharo naye,

³ vachiti, “Wakapinda iwe kuvarume vasina kudzingiswa, ukadya navo.”

⁴ Zvino Petirosi akatanga kuvarondedzera zvose, zvichitevedzana, achiti,

⁵ “Ndakanga ndiri muguta reJopa, ndichinyengetera; ndikabatwa mweya, ndikaona chiratidzo; chimwe chinhu chakaburuka, chinenge mucheka mukuru unoburuswa kudenga wakasungwa miromo mina, chikasvika pandiri;

⁶ ndakati ndachitarisisa, nokucherechedza, ndikaona mhuka dzenyika dzina makumbo mana nezvikara, nezvinokambaira, neshiri dzedenga,

⁷ ndikanzwawo izwi richiti kwandiri, ‘Simuka Petirosi, baya, udye.’

⁸ Asi ini ndikati, ‘Kwete Ishe, nokuti mumuromo mangu hamuna kumbopinda chinhu chisakanaka, chine tsvina.’

⁹ Asi izwi rakapindura rwechipiri, richibva kudenga, richiti, ‘Icho chakanatswa naMwari, iwe usati, hachina kunaka.’

¹⁰ “Izvozvo zvakaitwa katatu, zvose zvikakwidzwazve kudenga.

¹¹ Ipapo, tarira, pakarepo varume vatatu vamira pamberi peimba, matakanga tiri, vakanga vatumirwa kwandiri, vachibva Sizaria.

¹² “Ipapo Mweya akandiudza, kuti ndiende navo, ndisinganyunyuti. Nehama idzi nhanhatuwo dzakandiperekedza, tikapinda mumba momurume uyu.

¹³ Iye akatiudzawo kuti akaona mutumwa amire mumba make, achiti, ‘Tumira Jopa, udane Simoni, anonzi Petirosi;

¹⁴ iye achakuudza mashoko auchaponeswa nawo, iwe nemhuri yako yose.’

¹⁵ Zvino ndakati ndichatanga kutaura, Mweya Mutsvene akaburuka pamusoro pavo, sapamusoro peduwo pakutanga.

¹⁶ Ini ndikarangarira shoko raIshe, rokuti, ‘Johani akabhabhatidza nemvura, asi imi muchabhabhatidzwa naMweya Mutsvene.’

¹⁷ “Zvino kana Mwari akavapa chipo icho chaakatipa isu, pakutenda kwedu kuna Ishe Jesu Kristu, ini ndaigova ani, aigona kudzivisa Mwari?”

¹⁸ Zino vakati vanzwa izvozvo, vakanyarara, vakakudza Mwari, vachiti, “Zvirokwazvo, Mwari akapa vahedheniwo kutendeuka kwoupenyu.”

Bhanabhasi naSauro vanoparidza muAndiyoku

¹⁹ Zvino avo vakaparadzirwa nokutambudzika kwakamuka pamusoro paSitefani, vakaenda kusvikira paFonikia, neSaipurasi, neAndiyoku, vasingatauri shoko kumunhu, asi kuna vaJudha bedzi.

²⁰ Zvino pakati pavo paiva navamwe varume veSaipurasi neKurene; ivo vakati vasvika Andiyoku, vakataura kuvaGirikiwo, vachiparidza Ishe Jesu.

²¹ Ruoko rwaIshe rukava navo, vazhinji vakatenda, vakatendeukira kuna Ishe.

²² Mashoko avo akanzwika nechechi muJerusaremu, vakatuma Bhanabhasi kuti aende Andiyoku.

²³ Iye akati asvika, akaona nyasha dzaMwari, akafara; akarayira vose kuti vanamatire Ishe nomwoyo wakasimba;

²⁴ nokuti waiva murume akanaka, azere naMweya Mutsvene nokutenda; vazhinji zhinji vakawedzerwa kuna Ishe.

²⁵ Iye akaenda Tasasi achindotsvaka Sauro.

²⁶ Zvino akati amuwana, akauya naye Andiyoku. Ipapo vakaungana nechechi gore rose, vakadzidzisa vanhu vazhinji zhinji; paAndiyoku vadzidzi vakatanga kunzi VaKristu.

²⁷ Namazuva iwayo vaporofita vakaburuka vachibva Jerusaremu, vakaenda Andiyoku.

²⁸ Mumwe wavo ainzi Agabho, akasimuka, ndokuvazivisa naMweya kuti nzara huru ichavapo panyika yose; iyo ikasvika panguva yaKiraudhiyo.

²⁹ Ipapo vadzidzi vakatenderana, kuti mumwe nomumwe paaigona napo atume zvingabatsira hama dzigere Judhiya.

³⁰ Vakaita kudaro, vakazvitumira naBhanabhasi naSauro kuvakuru.