Mabasa 10 - Shona BIBLE

Koniriasi anobhabhatidzwa

¹ Zvino kwakanga kuno mumwe murume paSizaria, ainzi Koniriasi, mukuru wezana wehondo yainzi Itari,

² munhu, ainamata noaitya Mwari, iye naveimba yake yose, aipa vanhu zvipo zvizhinji, nokunyengetera kuna Mwari misi yose.

³ Zvino nenguva inenge yepfumbamwe yezuva akaona kwazvo, nezvaakaratidzwa, mutumwa waMwari achipinda kwaari, achiti kwaari, “Koniriasi!”

⁴ Iye akamutarisisa, akatya, akati, “Chiiko Ishe?” Akati kwaari, “Minyengetero yako nezvipo zvako zvakwira pamberi paMwari, zvarangarirwa.

⁵ Zvino tuma varume Jopa kundodana Simoni, anotumidzwa Petirosi.

⁶ Anogara nomumwe anonzi Simoni, musuki wamatehwe, imba yake iri pagungwa.”

⁷ Zvino mutumwa, akataura naye, akati abva, akadana varanda vake vaviri nomurwi wakarurama pakati pavaisimushumira,

⁸ akavaudza zvose, ndokuvatumira Jopa.

⁹ Zvino fume mangwana vachiri parwendo, vava pedyo neguta, Petirosi akakwira pamusoro peimba kundonyengetera nenguva inenge yechitanhatu.

¹⁰ Akaziya kwazvo, akada kudya; zvino vakati vachagadzira, akabatwa mweya;

¹¹ akaona denga razarurwa nechimwe chinhu chichiburuka somucheka mukuru unoburusirwa pasi wakasungwa miromo mina.

¹² Maiva nemhuka dzose dzina makumbo mana nezvinokambaira zvenyika, neshiri dzedenga.

¹³ Izwi rikauya kwaari, richiti, “Simuka Petirosi, baya, udye.”

¹⁴ Asi Petiro akati, “Kwete, Ishe, nokuti handina kutongodya chinhu chisakanaka, chine tsvina.”

¹⁵ Ipapo izwi rikauyazve kwaari rwechipiri, richiti, “Chakanatswa naMwari, usati, chine tsvina iwe.”

¹⁶ Izvozvo zvakaitwa katatu, chinhu chikakwidzwa pakarepo kudenga.

¹⁷ Zvino Petirosi akati achakanganiswa mumwoyo make, kuti chiratidzo chaakanga aona chairevei, tarira varume vakanga vatumwa naKoniriasi, vamira pasuwo vachibvunza imba yaSimoni;

¹⁸ vakadana, vakabvunza kana Simoni, anonzi Petirosi, agerepo.

¹⁹ Zvino Petirosi, achafunga chiratidzo, Mweya akati kwaari, “Tarira, varume vatatu vanokutsvaka.

²⁰ Zvino simuka, uburuke, uende navo, usinganyunyuti, nokuti ndini ndavatuma.”

²¹ Ipapo Petirosi akaburukira kuvarume avo, akati kwavari, “Tarirai, ndini wamunotsvaka; shoko ramauyira ndereiko?”

²² Vakati, “Koniriasi, mukuru wezana, murume akarurama, anotya Mwari, anorumbidzwa norudzi rwose rwavaJudha, akarayirwa naMwari nomutumwa mutsvene, kuti akudanei kuzouya kumba kwake, kuti anzwe mashoko kwamuri.”

²³ Ipapo akavadana mumba, akati vagarepo. Fume mangwana akasimuka akaenda navo; nedzimwe hama dzapaJopa dzikamuperekedza.

²⁴ Fumezve mangwana akapinda Sizaria. Zvino Koniriasi akanga akavamirira, akakokera hama dzake neshamwari dzake dzaidikanwa.

²⁵ Zvino Petirosi akati achipinda, Koniriasi akamuchingamidza, akawira pasi petsoka dzake, akamupfugamira.

²⁶ Asi Petirosi akamusimudza, akati, “Simuka, neni ndiri munhuwo.”

²⁷ Zvino akati achataura naye, akapinda, akawana vazhinji vakaungana,

²⁸ akati kwavari, “Imi munoziva kuti hazvina kufanira kuti muJudha afambidzane nomunhu worumwe rudzi, kana kuuya kwaari. Asi Mwari akandiratidza, kuti ndirege kuti munhu haana kunaka, kana kuti ane tsvina;

²⁹ naizvozvo ndauya, ndisingaramba, zvandadanwa; zvino ndinobvunza kuti mandidanireiko.”

³⁰ Koniriasi akati, “Ava mazuva mana kusvikira nguva ino, ini ndakanga ndichinyengetera mumba mangu nenguva yepfumbamwe; ipapo ndikaona murume amire pamberi pangu, ane nguo dzinopenya,

³¹ akati, ‘Koniriasi, kunyengetera kwako kwanzwikwa, nezvipo zvako zvarangarirwa naMwari.

³² Naizvozvo chitumira vanhu Jopa, udane Simoni, anonzi Petirosi; anogara mumba maSimoni musuki wamatehwe, pagungwa.’

³³ Naizvozvo ndakakurumidza kutuma kwamuri; zvino maita zvakanaka, zvamauya. Zvino isu tose tiri pano pamberi paMwari kuti tinzwe zvose zvamarayirwa naIshe.”

³⁴ Ipapo Petirosi akashamisa muromo wake akati, “Zvirokwazvo, ndinoona kuti Mwari haazi mutsauri wavanhu,

³⁵ asi parudzi rupi norupi, munhu, anomutya, achiita zvakarurama, anogamuchirwa naye.

³⁶ “Ndiro shoko, raakatuma kuvana VaIsiraeri, achiparidza mashoko akanaka orugare naJesu Kristu (ndiye Ishe wavose).

³⁷ Imi munoziva shoko iro rakaparidzwa paJudhiya rose, rakatanga paGareriya, shure kwokubhabhatidza kwakaparidzwa naJohani;

³⁸ raJesu weNazareta, kuti Mwari akamuzodza naMweya Mutsvene nesimba; iye aipota nyika, achiita zvakanaka, achiporesa vose vakamanikidzwa naDhiabhori; nokuti Mwari aiva naye.

³⁹ Nesu tiri zvapupu zvazvose, zvaakaita munyika yavaJudha nomuJerusaremu; ndiye wavakauraya, vachimuturika pamuti.

⁴⁰ “Ndiye akamutswa naMwari nezuva retatu, akamupa simba kuti aonekwe pachena;

⁴¹ akasaonekwa navanhu vose, asi nezvapupu zvakagara zvatsaurwa naMwari, iyesu, taidya nokunwa naye, amuka kuvakafa.

⁴² Akatirayira kuti tiparidzire vanhu, nokupupura kwazvo kuti ndiye akagadzwa naMwari, kuti ave Mutongi wavapenyu navakafa.

⁴³ “Vaporofita vose vanomupupurira kuti nezita rake mumwe nomumwe anotenda kwaari achapiwa ruregerero rwezvivi.”

⁴⁴ Petirosi akati achataura mashoko awa, Mweya Mutsvene akaburuka pamusoro pavose, vakanzwa shoko.

⁴⁵ Zvino vatendi vokudzingisa, vakanga vauya naPetirosi, vakashamiswa, kuti chipo chaMweya Mutsvene chakanga chadururwa pamusoro pavahedheniwo;

⁴⁶ nokuti vakavanzwa vachitaura nedzimwe ndimi, vachirumbidza Mwari. Ipapo Petirosi akapindura, akati,

⁴⁷ “Kuno munhu here angadzivisa mvura, kuti ava, vakapiwa Mweya Mutsvene sesu, varege kubhabhatidzwa?”

⁴⁸ Zvino akarayira kuti vabhabhatidzwe muzita raJesu Kristu. Ipapo vakakumbira kwaari, kuti ambogara mamwe mazuva.