Joshua 20 - Shona BIBLE

Maguta matanhatu outiziro

¹ Zvino Jehovha akataura naJoshua, akati,

² “Taura navana VaIsiraeri, uti, ‘Muzvitsaurire maguta outiziro, andakakuudzai nomuromo waMosesi;

³ kuti munhu wakauraya mumwe nokusaziva kana asina kuita maune, atizirepo;’ achava kwamuri utiziro pamutsivi weropa.

⁴ Anofanira kutizira kune rimwe ramaguta iwayo, agondomira panopindwa napo pasuwo reguta, agoreva mhosva yake panzeve dzavakuru veguta iro; ipapo vanofanira kumugamuchira pakati pavo muguta, vamupe pokugara, agogara pakati pavo.

⁵ Zvino kana mutsivi weropa achinge amutevera, haafaniri kuisa muurayi paruoko rwake, nokuti wakauraya wokwake asingaiti maune, asina kumuvenga kare.

⁶ Zvino iye anofanira kugara muguta iro, kusvikira amira pamberi peungano atongwe, kusvikira pakufa kwoMupristi Mukuru uchavapo namazuva iwayo; ipapo muurayi anofanira kudzoka, aende kuguta rake nokumba kwake, kuguta kwaakanga atiza.”

⁷ Ipapo vakatsaura Kedheshi muGareriya panyika yamakomo yaNafutari, neShemi, panyika yamakomo yaEfuremu, neKiriati–abha (ndiro Hebhuroni) panyika yamakomo yaJudha.

⁸ Nemhiri kwaJodhani paJeriko kumabvazuva vakatsaura Bhezeru murenje pabani kurudzi rwaRubheni, neRamoti-giriyadhi kurudzi rwaGadhi, neGorani muBhashani kurudzi rwaManase.

⁹ Ndiwo maguta akatsaurirwa vana VaIsiraeri, vose navatorwa vaigara pakati pavo, kuti ani naani unouraya munhu nokusaziva atizireko, arege kufa noruoko rwomutsivi weropa, kusvikira amira pamberi peungano.