Jona 3 - Shona BIBLE

Jona anotumwazve Ninivha, vanhu vanotendeuka

¹ Zvino shoko raJehovha rakasvika rwechipiri kuna Jona, richiti,

² “Simuka, uende Ninivha, riya guta guru, undoriparidzira zvandichakuraira kuti uparidze.”

³ Ipapo Jona akasimuka, akaenda Ninivha, sezvaakarairwa neshoko raJehovha. Zvino Ninivha raiva guta guru–guru, rwendo rwamazuva matatu kupfuura nomo.

⁴ Jona akatanga kupinda muguta, achifamba rwendo rwezuva rimwe, akadana, achiti, “Kwasara mazuva makumi mana, ipapo Ninivha richaparadzwa.”

⁵ Vanhu veNinivha vakatenda Mwari, vakatara nguva yokuzvinyima zvokudya, vakafuka masaga, kubva kuvakuru pakati pavo kusvikira kuvaduku pakati pavo.

⁶ Shoko rikasvika kuna mambo weNinivha, akasimuka pachigaro chake choushe, akabvisa nguo yake, akafuka saga, nokugara mumadota.

⁷ Akaraira, akaparidza muNinivha rose chirevo chamambo nechavakuru vake achiti, “Vanhu kana zvipfuwo, kana mombe kana makwai, ngazvirege kutongoravira chinhu, ngazvirege kufura kana kunwa mvura;

⁸ asi vanhu nezvipfuwo ngazvifukidzwe masaga, ngavadane kuna Mwari nesimba; ngavatendeuke mumwe nomumwe panzira yake yakaipa napakuita nesimba namaoko ake.

⁹ “Ndianiko angaziva, zvimwe Mwari ungadzoka akazvidemba, akadzoka pakutsamwa kwake kukuru, tikarega kuparadzwa?”

¹⁰ Mwari akaona zvavakaita, kuti vakatendeuka panzira yavo yakaipa, Mwari akazvidemba pamusoro pezvakaipa zvaakati ndichavaitira; akasazviita.