Isaya 3 - Shona BIBLE

¹ Nokuti tarirai, Ishe, Jehovha wehondo anotorera Jerusaremu naJudha mutsigiro nomudonzvo, mutsigiro wose wezvokudya, nomutsigiro wose wemvura;

² munhu wemhare, nomunhu wehondo; mutongi, nomuporofita, nomuvuki, nomukuru;

³ mukuru wamakumi mashanu, noanokudzwa, chipangamazano, nemhizha yakachenjera, nomuvuki anoziva.

⁴ Ndichavapa vanana ave machinda avo, vachabatwa navacheche.

⁵ Vanhu vachamanikidzwa, mumwe achimanikidza mumwe, nomumwe nomumwe nowokwake; mwana achava namanyawi kuna vakuru, nowakazvidzwa kuno anokudzwa.

⁶ Musi uyo munhu achabata munun'una wake mumba mababa vake, achiti, “Iwe une nguo, chiva mutongi wedu; kuparadzwa uku ngakugadzirwe noruoko rwako.”

⁷ Zvino nezuva iro achadanidzira, achiti, “Handidi kuva chiremba, nokuti mumba mangu hamuna zvokudya nezvokufuka; musandiita mutongi wavanhu.”

⁸ Nokuti Jerusaremu raparadzwa, Judha awa; nokuti marimi avo namabasa avo anopesana naJehovha, kutsamwisa meso ake anokubwinya.

⁹ Zvinoonekwa paziso ravo zvinovapupurira; zvivi zvavo vanozvibudisa pachena seSodhoma; havazvivanzi. Mweya yavo ine nhamo, nokuti vakazviitira zvakaipa.

¹⁰ Iti pamusoro powakarurama, kuti achava nomufaro; nokuti vachadya zvibereko zvamabasa avo.

¹¹ Wakaipa ane nhamo! Iye haangavi nomufaro, nokuti achapiwa mubairo wamaoko ake.

¹² Kana vari vanhu vangu, vana ndivo vamanikidzi vavo, vakadzi vanovabata ushe. Haiwa, vanhu vangu, vatungamiriri venyu vanokutadzisai, ndivo vanoparadza nzira dzamaifanira kufamba nadzo.

¹³ Jehovha asimuka kutamba mhaka; amire kuti atonge vanhu.

¹⁴ Jehovha achatonga vakuru vavanhu vake namachinda avo, achiti, “Ndimi mapedza munda wemizambiringa; zvakapambwa zvavarombo zviri mudzimba dzenyu.”

¹⁵ Munoiteiko zvamunopwanya vanhu vangu, muchikuya zviso zvavarombo? Ndizvo zvinotaura Ishe, Jehovha wehondo.

¹⁶ Uyezve Jehovha akati, “Vakunda veZioni zvavana manyawi, vachifamba nemitsipa yakati tasa, vachiita meso–meso, vachifamba vachinzenzeta, zviri pamakumbo avo zvichiti ngwerengwere,

¹⁷ naizvozvo Ishe acharova nhongonya dzemisoro yavakunda vaZioni negwenyu–kwenyu, Jehovha achafukura miviri yavo.”

¹⁸ Nezuva iro Ishe achabvisa ukomba hwamakumbo avo, nezvizuva nezvimwedzi;

¹⁹ nezvinoremberedzwa, noungetani hwamaoko, nezvifukidzo;

²⁰ nezvishongo zvomusoro, noungetani hwamakumbo, nezvisungo, nezvitende zvezvinonhuwira, namazango;

²¹ nezvimhete, noukomba hwemhino;

²² nenguo dzomutambo, nezvijasi, nezvijari, nezvikwama;

²³ nezviwoni–woni zvamaoko, nomucheka wakaisvonaka, nemicheka yomusoro, nezvifukidzo zvameso.

²⁴ Zvino zvichaitika kuti panzvimbo yezvinonhuwira pachava nezvinonhuwa; panzvimbo yevhudzi rakarukwa zvakanaka, pachava nemhanza; panzvimbo yenguo yakaisvonaka, pachava nechisimiro chegudza; nokupiswa kwouranda panzvimbo yokunaka.

²⁵ Varume venyu vachaparadzwa nomunondo, nemhare dzenyu pakurwa.

²⁶ Masuwo aro achachema nokurira; richaitwa dongo ndokugara pasi.