2 VaTesaronika 1 - Shona BIBLE

Kwaziso

¹ Pauro, naSirivhano, naTimoti, kuchechi yaVaTesaronika muna Mwari Baba vedu, naIshe Jesu Kristu.

² Nyasha ngadzive nemi, norugare runobva kuna Mwari Baba, naIshe Jesu Kristu.

Pauro anovonga nokuti vanomira nesimba

³ Tinofanira kuvonga Mwari nguva dzose pamusoro penyu, hama dzangu, sezvazvakafanira, nokuti kutenda kwenyu kunokura kwazvo, norudo rwenyu mose, mumwe nomumwe kuna vamwe, runowanda;

⁴ nokudaro isu timene tinozvirumbidza mamuri pachechi dzaMwari pamusoro pokutsungirira kwenyu, nokutenda kwenyu mukutambudzika kwenyu kwose nenhamo dzose dzamunadzo.

⁵ Ndizvo zvinoratidza kutonga kwakarurama kwaMwari; kuti mugonzi makafanirwa noushe hwaMwari hwamunotambudzikirawo;

⁶ zvakarurama kuna Mwari, kuti atsive nokutambudzika ivavo vanokutambudzai;

⁷ nemi munotambudzwa, kuti mupiwe kuzorora pamwechete nesu pakuonekwa kwaIshe Jesu, kana achibva kudenga navatumwa vesimba rake,

⁸ mumoto unopfuta, achitsiva avo vasingazivi Mwari, navasingateereri Vhangeri yaIshe wedu, Jesu;

⁹ ivo vacharohwa nokuparadzwa kusingaperi, kuti vabve pamberi paIshe, napakubwinya kwesimba rake,

¹⁰ kana achiuya kuzorumbidzwa muvatsvene vake, nokukanukirwa muna vose vanotenda nezuva irero; (nokuti kupupura kwedu kwamuri kwakatendwa).

¹¹ Naizvozvo tinokunyengetereraiwo nguva dzose, kuti Mwari wedu ati, makafanirwa nokudanwa kwenyu, akwanise nesimba rake kuda kwenyu kwose kuita zvakanaka namabasa ose okutenda;

¹² kuti zita raIshe wedu Jesu rirumbidzwe mamuri, nemi maari, sezvadzakaita nyasha dzaMwari wedu nedzaIshe Jesu Kristu.