1 Timoti 2 - Shona BIBLE

Vanhu vose ngavanyengetererwe

¹ Naizvozvo pakutanga kwezvose ndinorayira kuti vanhu vose vakumbirirwe, vanyengetererwe, varevererwe, vavongerwe;

² madzimambo, navose vari vakuru, kuti tigare norugare nokunyarara pakunamata Mwari kwose, nomugariro unokudzwa.

³ Ndizvo zvakanaka, zvinofadza pamberi paMwari, Muponesi wedu;

⁴ uyo anoda kuti vanhu vose vaponeswe, vasvike pakuziva chokwadi.

⁵ Nokuti kunongova naMwari mumwechete, noMureveri mumwechetewo, pakati paMwari navanhu, ndiye munhu Kristu Jesu,

⁶ akazvipa iye, kuti ave rudzikinuro rwavose, chive chapupu panguva dzazvo,

⁷ icho chandakaitirwa muparidzi nomupostori (ndinoreva zvirokwazvo, handirevi nhema), nomudzidzisi wavahedheni pakutenda chokwadi.

Zvinofanira kuita vakadzi

⁸ Naizvozvo ndinoda kuti varume vanyengetere panzvimbo dzose, vachisimudza maoko matsvene, vasina kutsamwa nenharo.

⁹ Saizvozvowo, kuti vakadzi vashonge nguo dzakafanira, vanokunyara nokuzvidzora; vasava nevhudzi rakarukwa, nendarama, kana mapera, kana nguo dzinodya mari zhinji;

¹⁰ asi ngavashonge mabasa akanaka, sezvinofanira vakadzi vanoti tinonamata Mwari.

¹¹ Mukadzi ngaadzidze nokunyarara nokuzviisa pasi kwose.

¹² Asi handitenderi mukadzi kuti adzidzise, kana kuti ave nesimba pamusoro pomurume, asi ngaanyarare.

¹³ Nokuti Adhamu akatanga kuumbwa, tevere Evha;

¹⁴ naAdhamu haana kunyengerwa, asi mukadzi akanyengerwa akapinda pakudarika;

¹⁵ asi achaponeswa nokubereka vana, kana vachirambira mukutenda norudo, noutsvene pamwechete nokuzvidzora.