Yohane 1 - Kari Utux Baro Seediq Tgyada

Heyi ka Kari

¹ Niqan Kari ka pnrdingan, mnsuupu Utux Baro ka Kari, Utux Baro ka Kari.

² Mnsuupu Utux Baro pnrdingan ciida ka Kari nii.

³ Mnoda heya wada slmean ka kana ani maanu ma kana snmalu we uka ani 1 ka uxe mnoda heya. Kana smnalu,

⁴ ga heya ka knuudus ma knuudus nii we kika ledax seediq.

⁵ Lmedax ckceka kuung ka ledax ma ini pnkala heya ka kuung.

⁶ Niqan 1 seediq snkgulan Utux Baro. Ngayan na we Yohane.

⁷ Meyah pgkela ka seediq nii. Ledax ka spgkela na. Kiya de spoda na heya ssnheyi kana seediq.

⁸ Uxe ledax ka heya. Ledax ka yahan na pgkela.

⁹ Bale ba ledax ka ledax kiya, meyah bobo dxeral pkledax kana seediq.

¹⁰ Meniq bobo dxeral ka heya ma mnoda heya wada smlean ka bobo dxeral. Kiya de ini kela heya ka qnlangan.

¹¹ Meyah dxeral na nanak ka heya ma ini psteme heya ka seediq na.

¹² Kana psteme heya we, kiya ka dseediq snhii heya. Kiya de biqan beyax maha mlaqi Utux Baro.

¹³ Uxe mntuting dara ma uxe mntuting smkuxul toma mtuting. Pnoda Utux Baro nanak mtuting.

¹⁴ Kiya de wada mseediq ka Kari ma meniq ckceka menan, gaga stngayan huwe ma bale ba. Ntaan miyan ka knledax na. Kiya ka knledax 1 ba laqi Tama Baro.

¹⁵ Heya ka spgkeela Yohane ma mdiras rmengo: “So nii ka rnengo mu: ‘Gisu bukuy mu we mkala kenan, ado tena niqan meniq berah mu ka heya.’”

¹⁶ Peyah knttuku na, wada ta mangal huwe na ma malan huwe dungal ka huwe.

¹⁷ Ado pnoda Moseh ka gaya. Kiya de mnoda Yesu Kiristo meyah ka huwe ma bale ba.

¹⁸ Uka ani ima seediq qmnita Utux Baro. Wano 1 ba laqi kmehun berah tama ka wada na spgkela.

Pnugkela Yohane Ptgaya Smino

¹⁹ So nii ka pnugkela Yohane: Seediq Yudaya we peeyah Yerusalem smkagul dmsapuh ma seediq Lewiy mosa Yohane hiya, smiling heya: “Ima su ka isu ho?”

²⁰ Pkleexan ma ini deqo rmengo ka heya: “Uxe ku Kiristo ka yaku.”

²¹ Smiling dungal ka dheya: “So kiya de ima su ho? Eliyah ho?” Rmengo ka heya: “Uxe.” “Mpgeela kari su ho?” Cmiyuk: “Uxe.”

²² Kiya de rmengo ka dheya: “Ima su bale ka isu? So miyan cciyuk seediq smnkagul menan. Ima kesun su ka isu nanak ho?”

²³ Rmengo ka heya: “Yaku we kiya ka seediq nii mlawa ckceka tadus brenux: ‘Psderux elu ddaun Bukung.’ So nii ka rnengo Isaya mpgeela kari.”

²⁴ Snkgulan seediq Parisay ka duma seediq,

²⁵ dheya we smiling heya: “Nasi su uxe Kiristo ka isu, uxe su Eliyah ma uxe su mpgeela kari uri de hmuwa, ma su ptgaya smino seediq ho?”

²⁶ Cmiyuk rmengo dheya ka Yohane: “Qsiya sptgaya mu smino ka yaku. Kiya de niqan ka 1 pheyu ckceka namu we uxe namu gnklaan.

²⁷ Kiya ka mmeyah gisu bukuy mu. Ini ku mnuglengu ani lhelah negul ramil na ka yaku.”

²⁸ Nii we kiya ka pnugkela Yohane ptgaya smino nniqan na sipo Yarden alang Betania hiya.

Wawa Miric Rudu Utux Baro

²⁹ So kusun, Yohane we mita Yesu meyah heya, kiya de rmengo: “Qtai! Wawa miric rudu Utux Baro mpkaangal qnquwan noda bobo dxeral!

³⁰ So nii ka rnengo mu: ‘Gisu bukuy mu we mkala kenan, ado tena niqan meniq berah mu ka heya’ mnesa ku we kika seediq nii.

³¹ Yaku we ini ku kela heya han. Pttuura mu quri Israel ka heya, kiya ka ptgaya ku smino qsiya saya.”

³² Kiya de pgkela rmengo ka Yohane dungal: “Ntaan mu ka Bgihur Utux mntena so snkiya byugu peeyah baro meyah meeniq heyi na.

³³ Yaku we ini ku kela heya han. Kiya ka smnkagul ptgaya mu smino qsiya we rmnengo kenan: ‘Taan su ka Bgihur Utux peeyah baro meyah msange heyi nima de kika heya ka mooda psino Bgihur Utux.’

³⁴ Ntaan mu ka nii de, kika nii mu spgkeela: Heya we laqi Utux Baro.”

Pnlaale ba Gmao Tnugsaan

³⁵ Kiya de so kusun dungal, mtheyaq 2 tnugsaan na mheyu hiya ka Yohane.

³⁶ Qtaan na gisu mkkesa ka Yesu de rmengo: “Qtai, wawa miric rudu Utux Baro!”

³⁷ Mbahang rnengo Yohane ka 2 tnugsaan na de smnegul Yesu.

³⁸ Kiya de mspgeriq heyi na ka Yesu ma taan na nii smnegul heya de rngagan na ka dheya: “Maanu ka pgsaun namu ho?” Rmengo heya ka dheya: “Rabi, ga su meeniq inu?” (Hdilun ka Rabi we mptgesa kesun.)

³⁹ Rmengo ka Yesu: “Eyah mita bino!” Maanu so kiya de saan daha mita ka ga na niqan. Kiya de msuupu heya ali ciida ka dheya. Ciida we yaa ba 4 toke bobo ceka naali.

⁴⁰ Mnbahang kari Yohane smnegul Yesu ka 2 heyi nii we 1 na heya we Andreas mtswai Simon Petros.

⁴¹ Pllayun na migin ka qbsuran na Simon ma rngagan na: “Qmnita miyan Misaya da.” (Hdilun ka Misaya we Kiristo kesun.)

⁴² Kiya de Andreas we desun na berah Yesu ka Simon. Tlleus mita heya ka Yesu ma rmengo: “Isu we Simon laqi Yohane. Kepas kesun tmngayan ka isu.” (Hdilun ka Kepas we Petros kesun.)

Splawa ka Pilipos ma Natanael

⁴³ So kusun mkmosa Galil ka Yesu. Slayan na Pilipos de rngagan na: “Eyah snegul kenan!”

⁴⁴ Pilipos nii we seediq Betsaida alang Andreas ma Petros.

⁴⁵ Pilipos we slayan na ka Natanael, ma rngagan na: “Ga spatis Moseh ckceka patis gaya ma ga spatis dmpgeela kari ka heya we qntaan nami da. Kiya ka Yesu seediq Najare laqi Yosehu.”

⁴⁶ Rmengo heya ka Natanael: “Mtduwa ppeeyah malu ka Najare ho?” Cmiyuk heya ka Pilipos: “Eyah mita bino!”

⁴⁷ Yesu we taan na meyah heya ka Natanael ma rmengo quri heya: “Qtai, nii ka bale ba seediq Israel. Lhebun na we uka mberiq.”

⁴⁸ Smiling Yesu ka Natanael: “Wada saku huwa kesun mkela ho?” Cmiyuk heya ka Yesu: “Ini plawa sunan ka Pilipos meeniq su toma qhuni nunuh berah na ciida we teena ku mita sunan da.”

⁴⁹ Rmengo heya ka Natanael: “Mptgesa! Isu we laqi Utux Baro. Isu we qbsuran paru Israel!”

⁵⁰ Rmengo heya ka Yesu: “Ado rmnengo ku: ‘Taan misu ga su meeniq toma qhuni nunuh,’ de snhii su di ho? Mpqita su ka mgkala nii knparu ooda!”

⁵¹ Rmengo dungal: “Bale ba rngage maku, mpqita namu ga mtraguh ka karac baro ma meeyah heyi Laqi seediq ka snkgulan Utux Baro, mtbrberih mosa baro ma meyah toma dungal.”