Titos 1 - Kari Utux Baro Seediq Tgyada

Smbeyax Kari

¹ Tnqliyan Utux Baro ma snkgulan Yesu Kiristo ka Poro we, so maha snhii ma mkela bale ba mnlengu kari ka seediq gneegan Utux Baro.

² Bale kari nii we kiya ka sntangan na knuudus uka psteqan Utux Baro uka mberiq kari meeniq pnlale cbeyo.

³ Dehuk ka ali sneengan de, spooda na malu kari gnrangan de truura ka kari na da. Bnege qpahan gmarang nii we mnoda pnosa kari pstama na ita ka Utux Baro mdoi baga ita.

⁴ Matis ku patis Titos bale ba laqi mu meeniq mntena snhiyan. Tai so huwe, pnsbale lhebun pneyah Utux Baro Tama ta ma Kiristo Yesu Bukung mdoi baga we meeniq sunan!

Qpahun Titos Meeniq Krete

⁵ Cuuxal htiyan misu Krete ka isu, kiya ka so su qhdeun moda ka qpahan ini su qhdei. Kiya uri we mbahang su dnurun mu, mooda su pheyu rudan mpqlahang knkingal alang.

⁶ Nasi niqan ka seediq uka ttyuan, rseno 1 ba mqedil na, lqlaqi na we snhii Bukung uri. Uka seediq smneeru naqah noda ma knhemuc de tduwa su phyegun.

⁷ Mpqlahang kesun we kiya ka mpqlahang sapah Utux Baro, asi ka uka ttyuan, ini psparu, ini mrmari ooda, ini kbsukan, ini skuxul tgdiyal ma, ini sgcuqi migin pila.

⁸ Smkuxul riyung smbleyaq seediq mtnooda, smkuxul malu ooda, mgseesu, msderux, uka qnrutiq ma qmlahang bale.

⁹ Stmaun na bale ka kari mndungus tnugesa. Kiya de ddudul na seediq ka tnugesa mttuku. Kiya uri we mtduwa mopux seediq pkeekan kari.

¹⁰ Ado mnhemuc uri ka hbaro seediq, rmengo uka dungus kari mberiq seediq. Rmabang ba ka dseediq mnoda ptgaya psalak.

¹¹ Quwaq dseediq nii we asi ka hmekun. Ado dheya we migin pila pnooda uxe msderux noda. Ini tduwa tgsaun ka ooda we tgsaun na seediq, kiya de smeeliq kana tnsapah.

¹² Rmnengo ka 1 mpgeela kari ga meniq Krete hiya: “Seediq Krete we mberiq klaali, camac naqah ma, mbserux riyung.”

¹³ Pnugkela nii we ida bale ba. Maanu so nii de asi su ka ksengun rmengo ka dheya, so maha mttuku ka snhiyan daha.

¹⁴ Iya qbahang kari rudan uka dungus nseediq Yudaya ma pnosa kari dseediq mnalix bale ba kari.

¹⁵ Quri so seediq psbgurah we, asi ka bgurah ani maanu. Ga meniq mrutiq ka seediq ini snhii we, ani maanu de ida ini psbgurah, ani lhebun ma lnglungan de mrutiq kana.

¹⁶ Mkela ku Utux Baro mesa pgkela ka dheya, kiya de ga ini kela Heya ka noda daha. Dheya we so trqilun, ini thei ma, ini pnlengu meepah malu ooda.