Rute 1 - Kari Utux Baro Seediq Tgyada

Theruy Moab ka Kana Tnsapah Elimelek

¹ Pkelu ba dmpsgao ka qmlahang qnlhangan ciida, smterung krayan ka qnlangan daha. Niqan 1 seediq, ga meniq Betlexem dxeral Yehudah. Madis qedil ma 2 laqi na mquri dxeral Moab tnooda meniq hiya.

² Elimelek ka ngayan seediq nii. Ngayan qedil na we Naomiy. 2 ka laqi na rseno, Maxlon ka ngayan 1 ma, Kilyon ka ngayan na 1. Seediq Eprat alang Betlexem Yehudah kana daha. Dehuk dxeral Moab ma meniq hiya ka dheya.

³ Bobo na de, wada mhuqil ka Elimelek seno Naomiy. Mtngari heya ma 2 laqi na rseno.

⁴ Mnangal qedil weewa Moab ka 2 laqi rseno. 1 we Orpah ka ngayan na, 1 we Rute ka ngayan na. Wada so 10 knkawas nniqan daha hiya.

⁵ Wada mhuqil uri ka Maxlon ma Kilyon di. Wano ba Naomiy nanak ka mtrangi. Uka seno ma uka ka lqlaqi na uri.

Mpbrinah Betlexem ka Naomiy ma Rute

⁶ Mtutuy ma peeyah Moab mpbrinah ka Naomiy ma 2 ina na. Ado meniq Moab we, mnbahang Utux Tmninun ge, smbleyaq seediq na ma mege uqun dheya.

⁷ Kiya de msuupu mlatac peeyah nniqan daha mosa elu quri Yehudah ka heya ma 2 ina na.

⁸ Rmengo 2 ina na ka Naomiy: “Osa sapah bubu namu nanak da! Tai so smbleyaq yamu ka Utux Tmninun, mntena so snbleqan namu seediq wada ma yaku.

⁹ Tai so mpniqan oosa txtaxa namu tbleyaq meniq bgurah seno ka Utux Tmninun!” Kiya de tmunguh dheya ka Naomiy ma asi lingis paru riyung ka dheya.

¹⁰ Rmengo heya: “Uxe! Maha miyan mptqene mosa seediq su hiya.”

¹¹ Rmengo ka Naomiy: “Laqi mu mqedil! Osa da! Maanu ka ssnegul namu kenan ho? Mmaha ku tmlaqi laqi mprseno namu dungal peni?

¹² Laqi mu mqedil! Osa da! Rudan ku ka yaku di, uxe ku mpniqan seno. Ani ku kesun niqan brihan na ma, niqan seno mu keeman saya we, asi ka tmlaqi.

¹³ Mptara namu betaq paru ka dheya peni? Uxe namu maha seno di peni? Laqi mu mqedil! Iya so kiya. Mgkala pnqraqil namu ka yaku. Ado gisu cmebu kenan ka baga na Utux Tmninun.”

¹⁴ Asi lingis paru dungal ka 2 ina na. Tmunguh smwaye pai na ka Orpah. Kiya de ini alix smnegul Naomiy ka Rute.

¹⁵ Rmengo ka Naomiy: “Qtai! Ata su we wada brinah seediq na ma utux na hiya da. Theyaq ata su brinah ka isu uri da!”

¹⁶ Rmengo ka Rute: “Iya ku ptkyexi malix sunan, brinah ini snegul sunan. Mquri su inu we, mpquri ku hiya uri. Meniq su inu we, meeniq ku hiya uri. Seediq mu ka seediq su. Utux Baro mu ka Utux Baro su.

¹⁷ Mhuqil su inu we, mphuqil ku hiya ma, reesun ku hiya uri. Wano ba hhuqil ka dehuk ptaalix isu ma yaku. Nasi ku ini nduwa de, tai so paru pnshugan na kenan ka Utux Tmninun!”

¹⁸ Naomiy we qmita so nii knkrayan lnglungan mpsnegul ka Rute de, ini na rngagi ani manu da.

¹⁹ Kiya de tqene mosa ma betaq Betlexem. Dehuk Betlexem ka dheya. Ririh dheya gisu pprudu ka kana alang. Rmengo ka dmqedil: “Bale ba Naomiy ka nii ho?”

²⁰ Rmengo dheya ka Naomiy: “Iya ku kesi Naomiy mlawa, Mara kesi ku hiya mlawa. Ado wada pqraqil kenan ka Utux Baro Mdoi Kana Beyax han.

²¹ Mttuku riyung mlatac ku ma, Utux Tmninun ka pkuuka ani maanu meeyah ku. Utux Tmninun ka pqraqil kenan, mege pnqraqil kenan ka Utux Baro Mdoi Kana Beyax. Ma namu hiya mlawa Naomiy nana ha?”

²² Brinah peeyah Moab ka Naomiy. Rute mqedil Moab ina na ka mtheyaq heya. Mndungus prading qbrungan mugi paru ciida ka nyahan daha Betlexem ciida.