Roma 1 - Kari Utux Baro Seediq Tgyada

Kari Smbleyaq

¹ Tnqliyan Kiristo Yesu ka yaku Poro we pnlawa ku na ma snkgulan ma skgulan ku na ggarang kari Utux Baro.

² Utux Baro we peeyah cbeyo spooda na mpgeela kari na sntangan na ckceka Kari Utux Baro hiya ka malu kari nii.

^3-4 Quri so laqi na, Yesu Kiristo Bukung mu. Spooda ta heyi rmengo we, pneeyah lqlaqi ltlutuc Dawid ka heya. Spooda ta Bgihur Utux de, ado mnuudus peeyah hnqilan, kiya ka gisu ptuura laqi Utux Baro ka heya.

⁵ Ita we mnoda ta huwe na mangal ta qpahun snkgulan. Kiya we so ngayan na meeniq ckceka kana qnlhangan de maha psnheyi ka seediq.

⁶ Ckceka daha hiya we maha niqan so yamu pnlawa namu na ma seediq nuYesu Kiristo uri.

⁷ Paadis ku patis yamu dseediq ga meniq Roma. Yamu we sgaalu Utux Baro ma pnlawa namu na ma mrtaso tnugsaan. Tai so meeniq yamu ka huwe ma msbale lhebun pneyah Tama ta Utux Baro ma Yesu Kiristo Bukung.

Mkmosa Roma ka Poro

⁸ Plaale we sooda mu Yesu Kiristo mqaras Utux Baro mu ka kana namu. Ado wada mkgarang kana bobo dxeral ka snhiyan namu.

⁹ Meniq ku ckceka malu kari laqi na, Utux Baro speeyah mu lhebun mu qmeepah we bale ba pgkela. Dmurun ku ciida we ini ku psetuq pooda ku kari yamu.

¹⁰ Dmurun ku Utux Baro klaali, nhuwa ka mnlengu lnglungan Utux Baro, bobo na mosa ku yamu hiya de, maha uka ani maanu ka mpsqeya na.

¹¹ Ado mqmita ku bale yamu bbege mu pndungus Bgihur Utux ppgdehu mu yamu.

¹² Kiya de meniq ku yamu ciida ge, peeyah snhiyan ta we mpsbeyax ta lnglungan.

¹³ Mtswai, ini ku sruwa ini namu klai ka nii. Mneegu ku satang meeyah yamu hiya. So aangal mu pnugheyi pneyah yamu. Mntena seediq icil qnlhangan. Kiya de niqan ka smqeya kenan betaq saya.

¹⁴ Ani seediq Hellenis, uxe mnatis, mkela tunux na ma seediq mngataq we niqan kusa mu kana.

¹⁵ Maanu so kiya de kmpyahun mu kana beyax mu ggarang mu malu kari yamu ga meniq Roma hiya uri.

Beyax Malu Kari Utux Baro

¹⁶ Ado ini mu qsqaani ka malu kari. Malu kari nii we beyax Utux Baro mdoi baga kana snhii seediq. Prading we seediq Yudaya ma seediq Hellenis ka thiti.

¹⁷ Ado uka qnquwan Utux Baro we ga na spgkeela ckceka malu kari nii. Uka qnquwan nii we mnoda snhiyan peeyah pnrdingan ma betaq qnhdean. Mntena ga spatis Patis Utux Baro: “Uka qnquwan seediq we mpkuudus peeyah snhiyan na.”

Qnquwan Kana Seediq

¹⁸ Seang Utux Baro we ga spgkeela peeyah baro quri seediq ini thmuku heya ma niqan qnquwan noda. Kiya ka seediq mnoda qnquwan noda daha sghetur daha ka bale ba.

¹⁹ Ddhekun ba mkela seediq ka quri Utux Baro we gaga sptuura lhebun seediq. Ado tena wada ptuura dheya ka Utux Baro.

²⁰ Speeyah snlmean karac ma bobo dxeral, paru beyax Utux Baro ma knuUtux na we truura bale klaun. Ani ta ini qtai doriq we spooda ta snmalu na de klaun ta mita da. Maanu so kiya de uka daha nngiyan ini kela ka seediq.

²¹ Ado ani mkela Utux Baro ka dheya we ini daha kesi Utux Baro tmdahu heya ma ini daha qqrasi uri. Wada skbrhuwan ka lnengelung daha duma mnkuung ka lhebun daha da.

²² Niqan ku knkela mesa ka dheya we msciyuk mngataq da.

²³ Uka qnaqah ka knledax Utux Baro we prihan daha tikung. Spuyu daha hnyegan seediq mpksburo, qbheni, camac ma kuyi mpkkarang.

²⁴ Maanu so kiya de Utux Baro we spooda na dheya nanak kkraguh lhebun daha qmeepah qnrutiq noda. Kiya we ppqqsiqa heyi daha nanak.

²⁵ Knbale Utux Baro we prihan daha mberiq. Mosa thmuku ma qmeepah snmalu daha. Ini thmuku Bukung smnalu, Bukung nii we uka psteqan tmdahu. Ameng!

²⁶ Kiya de Utux Baro we spooda na dheya nanak kmraguh so smsiqa. Mmqedil daha ge, msuupu quri rseno ka knlegan daha we poxun daha uxe so knlegan daha.

²⁷ Rseno uri ge, msuupu quri mqedil ka knlegan daha we laxan daha ma msqama mbesu daha mkkraguh nanak. Kiya we kmraguh rseno ma rseno ge, mpqqsiqa heyi daha nanak. Kiya de wada daha ngalun ka cniyuk mndungus pndangan daha.

²⁸ Kiya de dheya ge, thkeso ini kela Utux Baro, kiya de Utux Baro we spooda na ini ksderux lhebun daha meepah uxe qqpahun.

²⁹ Kiya de dheya ge, stngayun daha lmlamu qnquwan noda, naqah lnglungan, kkrwahan, sqquru lmngelung, lhebun daha we stngayan qqnriqu, pphuqil seediq, kmtgdiyal kari, qqberiq, mmhemuc tmraqil. Dheya we mmhemuc tnkari,

³⁰ rmengo naqah kari seediq, tmraqil Utux Baro, tmsiiyax seediq, psparu, tmdahu, smalu naqah, tbrinah rudan,

³¹ mkere lnglungan, smgaliq pnsdhegan, uka pnugluwan uxe dungus seediq, ini gaalu seediq.

³² Ani daha klaun smseman Utux Baro we mnuglengu phqilun ka qmeepah ooda so nii. Kiya de uxe wano dheya nanak ka meepah ma srwaun na qmeepah so nii ka seediq icil uri.