Pilemon 1 - Kari Utux Baro Seediq Tgyada

Smbeyax Kari

¹ Ririh Kiristo Yesu shemuk ka Poro, mtheyaq Timoteos mtswai we matis nami patis Pilemon sgaalu miyan ma mnsuupu menan qmeepah,

² Aphuia mtswai ta mqedil, Arksipos mnsuupu menan dangi mccebu ma, kana pssliyan ga sapah su.

³ Tai so meeniq yamu ka huwe ma mtbale lhebun pneeyah Utux Baro ta ma Yesu Kiristo Bukung!

Gnaalu ma Snhiyan Pilemon

⁴ Dmurun nami ciida we lmngelung nami sunan. Dmurun nami sunan klaali we mqaras nami Utux Baro.

⁵ Mnbahang nami gnaalu su quri kana seediq dsnheyi ma, snhiyan su quri Yesu Bukung.

⁶ Tai so srengo su seediq snhiyan ciida we, maha niqan ba beyax. So su pklaun bale seediq ka ani maanu noda nami we ririh Kiristo kana ka sqeepah nami.

⁷ Mtswai, ado gnaalu su, wada ku mangal paru riyung mqaras ma smbyaxan. Ado wada traguh peeyah yamu ka lhebun hbaro mrtaso seediq dsnheyi.

Onesimos ka Spesa Poro

⁸ Ani ku kesun smtama Kiristo mtduwa ku smkagul sunan meepah ooda ddaun su.

⁹ Kiya we so yaku nii Poro we paru knkawas mu da, saya uri we ririh Kiristo Yesu gisu sghetur sapah kuung de, nuuqu mu spooda gnaalu dmurun sunan ka malu.

¹⁰ Kiya ka mpdudul ku Onesimos laqi pntingan mu meniq ckceka hnetur.

¹¹ Uka rrihan cuuxal ka heya, kiya ka kiya, saya de niqan rrihan na isu ma yaku da.

¹² Mpskagul ku heya brinah mosa isu hiya. Heya we sgaalu mu riyung.

¹³ Satang mu kmhridun hini, so maha rmirih isu mdayo yaku nii sghetur ado malu kari.

¹⁴ Ado ini mu klai ka lnglungan su de, ini ku sruwa so nii mooda. So ku uxe ptkeeyux pqeepah malu noda isu, ado asi ka spooda lnglungan su nanak.

¹⁵ Tnnais smwaye sunan ka heya we, yaa gisu dmayo sunan mdoi heya ani betaq knuwan.

¹⁶ Uxe tnqliyan ka heya da. Hmrinas tnqliyan ma, mtswai sgaalu ta da. So nii qntaan mu ka yaku, hmuwa ka isu di ho! Ani kesun meniq heyi ma meeniq ckceka Bukung we ida maha so kiya.

¹⁷ Maanu so kiya de, nasi saku ngalan dangi de, qrasi smterung ka heya, mntena su so smterung yaku.

¹⁸ Nasi niqan pnkusa na isu we, uxe uri we niqan ka knbrexan na we, pnaani kenan kana da.

¹⁹ Ida ku prihun. So nii we pnatis bale Yaku Poro kiya. Ani ku ini rengo sunan, ani isu uri we ida niqan ka pnkusa su yaku!

²⁰ Mtswai, So isu maha niqan rrihan mu meeniq ckceka Bukung. So maha mtraguh riyung ka lhebun mu meniq ckceka Kiristo.

²¹ Matis ku patis sunan we, snhiyun mu maha su theyi. Klaun su maanu ka daun su ma, maha hmrinas rnengo mu.

²² Kiya uri we, psramal yahan mu meniq, ado sntangan mu pnooda dnurun namu, maangal ku huwe meyah ku yamu hiya.

Nhdean Kari Smbeyax

²³ Malu su mesa ka Ipahuras ririh Kiristo Yesu mtheyaq yaku gisu shetur.

²⁴ Malu su mesa ka Markos, Aristarks, Demas ma, Ruka tnhiyan mu meepah.

²⁵ Tai so mpsuupu meeniq bgihur namu ka huwe Yesu Kiristo Bukung.