Markos 8 - Kari Utux Baro Seediq Tgyada

Pktengi 40'00 Seediq

¹ Ali ciida, meyah msseli dungal ka hbaro bale seediq. Uka ani maanu uqun daha ka dheya. Mlawa tnugsaan na ka Yesu, rmengo:

² “Sgaalu mu ka hbaro ba seediq nii. Ado mk3 ali ka tnhiyan daha kenan, uka ani maanu uqun daha uri.

³ Nasi mu skgulun sapah muure ka dheya de, maha mtakur elu ka dheya da. Ckceka daha we niqan ka pneyah theya na uri?”

⁴ Cmiyuk rmengo ka tnugsaan na: “Mpeeyah inu ka pang meniq dxeral nrao pktengi pqdiyal seediq nii ho?”

⁵ Smiling ka Yesu: “Piya ka pang namu ho?” Rmengo ka dheya: “7” mesa.

⁶ Tleung dxeral, kesun na rmengo ka hbaro ba seediq. Ngalun na ka 7 pang ma mege qrasan. Kiya de gbingun na ma sbege na tnugsaan na. Dheya de saasu daha hbaro seediq da.

⁷ Niqan tikuh qcurux biciq ka dheya na. Mege qrasan ka Yesu, kiya de dmurun say maasu uri ka nii mesa.

⁸ Mnekan ma mtengi da. Pssliun daha ka nngari pang gnebin we 7 rawa.

⁹ Ciida we 40'00 ka seediq. Wada psaun Yesu ka hbaro seediq.

¹⁰ Kiya de asi psuupu tnugsaan na paapa asu mosa dxeral Dalmanouta.

Mesa Pnskraya Qneepah ka seediq Parisay

¹¹ Meyah ka seediq Parisay ma smiling Yesu. Mesa pnskraya peeyah baro ka dheya psseung Yesu.

¹² Pshengak peeyah ckceka lhebun na ka Yesu, kiya de rmengo: “Hmuwa, ma mesa pnskraya qneepah ka mknexal saya ho? Bale ba rngage maku, uka bale pnskraya qneepah bege mknexal saya.”

¹³ Kiya de mlatac dheyaan ka Yesu, paapa dungal asu mosa sipo.

Tgeda seediq Parisay ma DHrodes

¹⁴ Cmhungi madis pang ka tnugsaan ma uka ani maanu uqun wano 1 ba pang we bobo asu hiya.

¹⁵ Pdkaran rmengo Yesu ka dheya: “Qlahang ka yamu, Tgkeela, qlhangi ka tgeda pllabu pang seediq Parisay ma tgeda pllabu pang Hrodes.”

¹⁶ Gisu mpprengo: Ado ini ta adis pang.

¹⁷ Klaun Yesu de rngagan na: “Hmuwa, ma namu gaga mpprengo ini adis pang ho? Ini namu klai nana peni? Ini namu tgkela lmngelung na? Ma mkere lhebun namu na ho?

¹⁸ Niqan ka doriq namu, ma namu ini qita? Niqan ka birac namu, ma namu ini qbahang peni? Cmhungi namu di ho?

¹⁹ Gnebin mu ka 5 pang wada saasu 50'00 seediq ciida, pnsseli namu ka gnebin pang ge piya ka stenge rawa ho?” Rmengo ka dheya: “12”.

²⁰ “Wada ku gmebing 7 pang saasu mu 40'00 seediq ciida, pnsseli namu ka gnebin pang ge piya ka stenge rawa ho?” Rmengo ka dheya: “7”.

²¹ Rmengo dheya ka Yesu: “Ini namu kela lmngelung na ho?”

Pkmalu Mbudu Seediq

²² Meyah Betsaida ka dheya, niqan seediq madis 1 mbudu doriq, mesa Yesu ttelung na mbudu.

²³ Dooyan na baga ka mbudu doriq, desun na nganguc alang. Kiya de ptruqan na ka doriq na, psaun na ka baga na, smiling heya: “Ga su qmita maanu ho?”

²⁴ Mtutuy tunux na, qmita ma rmengo: “Qmita ku seediq, mntena so qhuni gaga mkkesa.”

²⁵ Bobo na de, Yesu we psaan na doriq na dungal ka baga na. Kmbeyax mita ka heya de wada malu da. Ani maanu leexan ba qnita.

²⁶ Skgulan na mosa sapah ka Yesu, rngagan na: “Ani alang nii iya sai mremux.”

Petros we Mkela Kiristo ka Yesu

²⁷ Mlatac mosa lualang quri Pilipi Kaisareia ka Yesu ma tnugsaan na. Meeniq elu ciida, smiling tnugsaan na ka Yesu: “Ima kesun ku daha ka dseediq ho?”

²⁸ Cmiyuk rmengo ka dheya: “Yohane mptgaya smino. Rmengo duma we Eliyah. Duma dungal we 1 mpgeela kari cbeyo.”

²⁹ Smiling dheya ka Yesu: “Ima kesun namu ka yaku ho?” Cmiyuk rmengo ka Petros: “Isu we Kiristo.”

³⁰ Kiya de pdkaran na rmengo: “Iya bale rrngaani ani ima ka yaku.”

Rmengo Kari Pgeela Ooda Mpqraqil ma Mpkuudus ka Yesu

³¹ Peeyah ciida, prading tmgesa dheya ka Yesu, rmengo: “Laqi seediq we ida asi ka mooda egu ba mqraqil. Sqada rdrudan mpqlahang, dpusu msapuh ma dmptpatis. Kiya de phqilun daha, bobo mk3 ali de mpkuudus dungal.”

³² Pgkela kari nii ka Yesu. Petros ge tlusun na ssiyo ka Yesu ma kseengun na.

³³ Mspgeriq qmita tnugsaan na ka Yesu, mseang rmengo Petros: “Satang, brinah osa bukuy mu! Ado ini su lnglungi ooda Utux Baro, wano quri seediq ka lnglungun su.”

³⁴ Kiya de splawa na ka hbaro ba seediq ma tnugsaan na, rngagan na: “Nasi niqan ka seediq kmsnegul kenan, asi ka malix heya. Paani ka jyujika na snegul kenan.

³⁵ Kmpkuudus knuudus na ka seediq we pgdangun na ka knuudus na. Ado yaku ma malu kari ka shuqil na ka seediq we bale ba mpkuudus.

³⁶ Nasi na ngalun kana ka bobo dxeral ka seediq, wada sprireh knuudus na de, maanu rrihun na ho?

³⁷ Maanu ka ngngalun su spririh knuudus su ho?

³⁸ Meniq ckceka naqah ba mmhemuc msuupu mknexal saya, ani ima sqsiqa na ka yaku ma kari tnugesa mu we, Laqi Seediq meniq knledax Tama na msuupu kana snkgulan baro meyah ciida de, sqaun na ka heya uri.”