Markos 7 - Kari Utux Baro Seediq Tgyada

Mpprengo Kari Rdrudan Cbeyo

¹ Msuupu meyah msseli Yesu hiya ka seediq Parisay ma duma dmptpatis pneyah Yerusalem.

² Qtaan daha ka duma tnugsaan Yesu, dmoi mrutiq baga mekan ido, kiya ka baga ini trmai.

³ Ado seediq Parisay ma kana seediq Yudaya we pyugun daha bale ka gaya rdrudan cbeyo, nasi ini bleyaq trima baga we ini ekan.

⁴ Nasi ini daha snagi ka pneyah brigan ini daha uqi. Egu bale ka gaya rdrudan pyugun daha. Kiya ka so smino mahan, rusuq, uqan snmalu limuk ma qlapo.

⁵ Smiling Yesu ka seediq Parisay ma dmptpatis: “Hmuwa, ma ini puyu gaya hniti rudan cbeyo ka tnugsaan su, dmoi rkeruk baga mekan ido ho?”

⁶ Rmengo dheya ka Yesu: “Malu bale kari pnugeela Isaya rnengo na yamu seediq nii nnnangi malu. Mntena so pnatis Patis: ‘Dmoi quwaq smparu yaku ka seediq nii. Lhebun daha we smtheya kenan.

⁷ Dheya ge ngalan daha stgesa seediq ka gaya seediq, Ani thmuku kenan we mgqiya uri.’

⁸ Malix namu gaya Utux Baro, muyu namu kari hniti seediq.”

⁹ Rmengo dungal ka Yesu: “Ado ppuyu namu hniti kari rdrudan namu, betaq namu qmada gaya Utux Baro.

¹⁰ Rmnengo ka Moseh: ‘Sprui ka tama ma bubu su,’ rmengo dungal: ‘Rmengo naqah kari tama ma bubu ka seediq we ida phqilun.’

¹¹ So nii ka kari namu: Nasi rmengo tama ma bubu na ka seediq: ‘Kana so bbege mu isu we, wada ngalun kurubang da’ (Kurubang nii we bbege ka elu kari na).

¹² Nasi so kiya de ani nanak ini danga tama ma bubu we srwaun namu ka heya.

¹³ So kiya ka spooda namu Mslutuc kari pnltudan namu gaya cbeyo ma lixan namu ka kari Utux Baro. Mntena so nii, egu bale ka noda namu so nii na.”

¹⁴ Mlawa hbaro ba seediq, rmengo dheya ka Yesu: “Kana namu qbahang kari mu, klai ba lmngelung uri.

¹⁵ Peeyah nganguc mremux ckceka seediq we ini pqnaqah seediq. Peeyah ruwan seediq we kiya ka pqnaqah seediq.

¹⁶ Niqan birac qqbahang ka seediq we bleyaq mbahang!”

¹⁷ Mlatac hbaro seediq ka Yesu, mosa mremux sapah. Smiling pnungalan kari heya ka tnugsaan na.

¹⁸ Rmengo ka Yesu: “Ani yamu, ini namu kela uri ho? Ini namu klai ka kana pneyah nganguc mremux truma we ini tduwa pqnaqah seediq?

¹⁹ Ado ini teme lhebun seediq ka kiya, wada mteme nanak nbuyas ma mtuting qtiyan duri.” (So nii kari Yesu ge, wada na sbrahun kana ka uqun da.)

²⁰ Rmengo dungal ka heya: “Peeyah ruwan seediq we kika pqnaqah seediq.

²¹ Ado peeyah ruwan ma pneyah lhebun seediq we niqan lmlamu naqah lnglungan, mkmhemuc msuupu, mgeeguy, pphuqil seediq.

²² Mkmhemuc Msuupu, sqquru lnglungan, naqah qneepah, qqberiq, smkuxul truma, qqnriqu, ssngayan, ppsparu, ini baka knkela.

²³ Kana naqah nii we pneeyah ruwan mlatac kana, kiya ka pqnaqah seediq.”

Snhiyan Mqedil Pniki

²⁴ Mtutuy peeyah hiya ka Yesu ma mosa quri dxeral Turos. Mremux 1 sapah, ini knpgkeela ani ima. Kiya de ini tduwa tgleing seediq.

²⁵ Kiya de niqan ka 1 mqedil, laqi na biciq mqedil we ga sdooyun bgihur naqah ka heyi na. Mnbahang noda Yesu ma, kika meyah tmbqelic berah papak na.

²⁶ Mqedil nii we seediq Hellenis ma seediq Pniki alang Suria. Mesa Yesu ka heya ppqduriq na bgihur naqah peeyah laqi na mqedil.

²⁷ Rmengo heya ka Yesu: “Pllai pktengi qdiyal ka laqi. Ngalun ta ka pang laqi ma sqada peekan huling we ini tduwa.”

²⁸ Cmiyuk rmengo ka mqedil: “Bukung! Ani so kiya, ida mekan nemu pntuting laqi ka huling ga meniq toma uqan uri!”

²⁹ Rmengo heya ka Yesu: “Spooda kari su so nii, tduwa su mosa da. Wada mlatac peeyah laqi su mqedil ka bgihur naqah da.”

³⁰ Mosa sapah ka mqedil de mita laqi na ga mtaqi qlapo, tena wada mlatac ka bgihur naqah da.

Pkmalu Seediq Mngangah ma Mrbuni

³¹ Mlatac peeyah dxeral Turos dungal ka Yesu, moda Cidon ma meyah rcilung Galil dxeral Dekapolis.

³² Niqan ka seediq we desun daha berah Yesu ka 1 seediq mrbuni ma mkere hema. Mesa baga na tmelung heyi seediq nii.

³³ Maadis heya nanak mlatac hbaro ba seediq ka Yesu. Psaan na tluding baga ka birac na ma mturuq rmicuh hema na.

³⁴ Pshengak mita karac, rmengo heya: “Ibata!” Kiya de dungus na we “Ptraguh da!”

³⁵ Asi ptraguh ka birac na ma mtlhelah hema na uri ma leexan ba rnengo kari ka heya da.

³⁶ Iya rengo ani ima, pdkaran na rmengo ka ddheya. Rnahun pdakar Yesu we kika krinah ba gmarang rmengo ka dheya.

³⁷ Mskluwi bale ka kana seediq ma rmengo: “Malu kana qneepah na! Ani mrbuni uri we pqbhangun na, ani mngangah we prngagun na!”