Markos 6 - Kari Utux Baro Seediq Tgyada

Lixan Seediq Najare ka Yesu

¹ Mlatac peeyah hiya ka Yesu, mosa alang na nanak. Smnegul heya ka tnugsaan na uri.

² Dehuk ka ali sngayan, prading tmgesa seediq sapah pssliyan hiya ka heya. Mskluwi ba mbahang kana ka seediq, rmengo: “Pneyah bale inu ka ndaan na so nii? Maanu bale ka knkela bnege heya ho? Pneyah ba inu ka sklwiun qneepah baga na?

³ Uxe laqi mpsmalu qhuni peni heya? Uxe laqi Maria ma Yakobu, Yosi, Yehudah ma, Simon ka mtswai na rseno peni? Uxe gisu theyaq ita hini ka dmtswai na mqedil peni?” Kiya de, trqilun daha ka Yesu.

⁴ Kiya de rmengo dheya ka Yesu: “Wano alang na nanak ma lutuc na ma sapah na nanak ka ini sparu mpgeela kari.”

⁵ Uka bale qneepah na sklwiun qneepah hiya ka Yesu, wano paha baga ini kpiya mnarux seediq ma pkmalu dheya.

⁶ Mskluwi bale ka Yesu so nii ini snhii ka dheya. Moda mtqiri mkkesa mklualang ssiyo hiya ka Yesu ma tmgesa seediq.

Skgulan Gmarang Kari ka 12 Tnugsaan

⁷ Mlawa 12 tnugsaan na ka Yesu. Sdhaun na smkagul ma biqan na pusu beyax ppqduriq bgihur naqah uri.

⁸ Rngagan na bale ka dheya: “Wano 1 ba hukuc iya adis ani maanu mosa. Iya adis uqun ma lubuy, iya adis pila ka ckceka habik namu uri.

⁹ Wano pkramil ma iya plukus 2 lukus ptrmaun.”

¹⁰ Rmengo dheya dungal ka Yesu: “Ani namu mosa inu, mremux namu sapah daha, asi eniq hiya ma betaq namu mlatac peeyah alang hiya.

¹¹ Nasi niqan ka seediq ini psteme yamu ma ini qbahang yamu, mlatac namu peeyah hiya ciida, htii plhelah ka qbulic papak namu. So ppgkeela namu ini snhii ka dheya.”

¹² Kiya de mlatac mosa gmarang kari ka dheya, pryuxi lnglungan namu kesun na ka seediq.

¹³ Wada pqduriq bgihur naqah, rmicuh abura mnarux seediq ma pklmeun na pkmalu ka dheya.

Hnqilan Yohane Ptgaya Smino

¹⁴ Paru ngayan na Yesu de wada mbahang ka Hrodes qbsuran paru. Betaq rmengo ka duma: “Wada muudus peeyah hnqilan na ka Yohane mptgaya smino di. Maanu so kiya niqan so nii paru beyax ga qmeepah ckceka heyi na.”

¹⁵ Rmengo ka duma na: “Heya we Eliyah.” Duma we rmengo: “Heya we mpgeela kari, mntena mpgeela kari cbeyo.”

¹⁶ Qbhangan Hrodes de so nii kari na: “Yohane snipaq mu tunux ka heya, wada pkdusun peeyah hnqilan!”

¹⁷ Hrodes nii ka wada smkagul seediq qmerac Yohane, mekuy heya ma shetur na sapah kuung. Ado wada mangal Hrodias mqedil Pilipos mtswai na ka Hrodes.

¹⁸ So nii rmnengo Hrodes ka Yohane: “Ga su ngalun ka mqedil mtswai su we ini tduwa!”

¹⁹ Peeyah kiya, qmnriqu ba Yohane ka lhebun Hrodias ma kmphuqil heya. Ani si ini na.

²⁰ Ado miicu Yohane ka Hrodes, mkela sa msderux noda na ma malu ba seediq ka Yohane we qmlahang heya. Ani so mgedang mbahang kari Yohane we ida mqaras ba mbahang.

²¹ Niqan ka malu ba ali, pkelu mqaras pnttingan na ka Hrodes we spsramal na uqun paru qrasun ka dparu qbsuran mdayo heya ma dqbsuran supi ma dprparu mdudul seediq Galil.

²² Meyah kmeeki hiya ka weewa Hrodias, wada smqaras ba Hrodes ma kana seediq theyaq tleung. Rmengo weewa nii ka qbsuran paru: “Ani maanu ka kmngalun su, nasi su mesa kenan, bege mu sunan.”

²³ Psdehu ba rmengo ka heya: “Ani maanu pgsaun su, ani so dmeka qnlhangan mu we bege mu sunan!”

²⁴ Mlatac nganguc mosa rmengo bubu na: “Maanu ka pgsaun mu ho?” Rmengo ka bubu na: “Tunux Yohane mptgaya smino.”

²⁵ Asi teme nhari mosa qbsuran paru hiya ka heya, mesa qbsuran paru: “So qbsuran paru mu, posa nhari ppsaan ka tunux Yohane mptgaya smino ma biqi ku haya!”

²⁶ Ani kana qnnaqah kuxul na ka qbsuran paru. Ado smndehu bale berah seediq msuupu tleung hiya tleung de ini skuxul gmnhetur pnesa na.

²⁷ Kiya de, qbsuran paru we asi skagul 1 supi mpqlahang, kesun na adis hini ka tunux Yohane. Mosa ka heya duma, smipaq tunux Yohane truma sapah kuung hiya.

²⁸ Psaun na psaan, sbege na laqi mqedil. Saan na mege bubu na ka laqi mqedil nii.

²⁹ Wada mbahang ka tnugsaan Yohane de meyah maangal heyi Yohane ma saan daha smeku habung.

Peekan 50'00 Seediq

³⁰ Msseli Yesu hiya ka snkgulan na, ssneeru daha Yesu ka kana qneepah daha ma tnugesa daha.

³¹ Rmengo dheya ka Yesu: “Aguh, suupu ta mosa dxeral nrao mosa msange.” Ado hbaro ba kmpriyux meyah ka seediq, ani ali daha mekan we uka uri.

³² Kiya de paapa asu mlatac hiya, dheya nanak mosa dxeral nrao.

³³ Wada qtaan hbaro seediq mlatac ka dheya. Klaan daha sa dheya de, peeyah knkingal alang tmalang mquri hiya, plaale dheya dehuk ka dseediq.

³⁴ Mnkala rcilung ka Yesu, taan na ka hbaro ba seediq ma sgaalu na bale. Ado mntena so miric rudu uka mtabu ka dheya. Kiya de prading tmgesa egu kari dheya ka Yesu.

³⁵ Mskeman ka ciida duma meyah Yesu hiya ka tnugsaan na ma rmengo: “Breenux nrao ka hini ma gisu mkeman ka saya da.

³⁶ Posa ka dheya, oosa daha lualang mtqiri hini ma maruy nanak uqun daha.”

³⁷ Cmiyuk rmengo ka Yesu: “Biqi uqun ka dheya.” Rmengo heya ka tnugsaan na: “Mangal nami 2'00 hbangan ging mosa maruy pang pqdiyal dheya ho?”

³⁸ Rmengo ka Yesu: “Piya ka pang namu ho? Sai mita.” Klaun daha de rmengo: “Niqan 5 ma 2 ka qcurux.”

³⁹ Rmengo dheya ka Yesu, qpuruh ptleung bobo speriq ka dheya.

⁴⁰ Kiya de 1'00 duma ma 50 seediq duma ka pnqpruhan tleung ka dheya.

⁴¹ Mangal 5 pang ma 2 qcurux mita karac baro mqaras ka Yesu. Kiya de gbingun na ka pang ma sbege na tnugsaan na so pssugun daha kana seediq. Sugun daha kana seediq ka 2 qcurux uri.

⁴² Wada mekan kana dima mtengi mnekan di.

⁴³ Tnugsaan we pssliun daha ka gnebin daha mnsngari pang ma qcurux we stenge 12 rawa.

⁴⁴ Mnekan pang we 50'00 ka rseno.

Mkkesa Bobo Rcilung ka Yesu

⁴⁵ Kiya de asi na pskyexi ppaapa asu ka tnugsaan na ka Yesu ma pglaun na pntaril tgsipo, dehuk Betsaida. Tmara heya smkagul dseediq.

⁴⁶ Bobo mswaye dheya ka Yesu de mosa dmurun dgiyaq hiya.

⁴⁷ Keeman de betaq ckceka rcilung ka asu, murux nanak meniq dxeral sipo ka Yesu.

⁴⁸ Taan na ini pntreelu ka bgihur, mqraqil ba micux ka tnugsaan na. Prading lmedax ciida, mkkesa bobo rcilung ka Yesu, mquri tnugsaan na mkkesa, satang na so mphrinas dheya.

⁴⁹ Qtaan daha gisu mkkesa bobo rcilung ka Yesu de, ngalan daha utux ma mdiras ka tnugsaan.

⁵⁰ Ado mita heya kana daha ma ani kana kniicu daha. Asi rengo dheya ka Yesu: “Knbeyax, Yaku, Iya kiicu!”

⁵¹ Kiya de mnkala asu mosa theyaq dheya ka Yesu, msange ka bgihur da. Mnkluwi bale ka lnglungan tnugsaan na.

⁵² Ado ini daha klai lmngelung ka noda maasu pang, ida mkere ka lhebun daha.

Pkmalu Mnarux Dseediq Gennesaret

⁵³ Mntaril rcilung ka dheya, mkala dxeral Gennesaret, msange hiya ka asu.

⁵⁴ Hani mlatac peeyah asu ka dheya, dseediq hiya ge asi daha klai ka Yesu.

⁵⁵ Kiya de tmalang mtqiri kana dxeral hiya, qbhangan daha ga meniq inu ka Yesu we mangal tnqiyan na ma spapa daha mosa hiya ka mnarux.

⁵⁶ Kana ndaan Yesu, ani alang biciq, alang paru, nklualang biciq, seediq mnarux ge pniqun daha elu bbrigan hiya. Mesa ttelung daha Yesu ani so palic lukus na. Tmnelung ka seediq we wada pklmeun kana.