Markos 5 - Kari Utux Baro Seediq Tgyada

Pkmalu Seediq Peyah Gerasen ga Sdooyun Bgihur Naqah

¹ Dehuk sipo rcilung ka dheya, dehuk dxeral seediq Gerasen.

² Hani peeyah asu ka Yesu de sterung na meyah heya ka ga sdooyan bgihur naqah ka 1 seediq pneeyah habung.

³ Seediq nii we ida mtaqi habung. Uka ani ima ka dehuk mekuy heya, ani xiluy we ini tduwa mekuy heya uri.

⁴ Mneegu daha bkean xiluy papak ma baga. Wada na pstequn ka xiluy bnekuy baga ma tnmeun na ka bnekuy papak. Uka bale ka dehuk pgseesu heya.

⁵ Ani keeman ani diyan mdiras habung ma dgiyaq ka heya, hblutun na btunux ka heyi na nanak.

⁶ Taan na peeyah theya ka Yesu de tmalang ma tmbqelic berah na.

⁷ Paru ba quwaq na mdiras rmengo: “Yesu laqi Utux Baro Tgpusu Ba Baro, isu ma yaku we maanu ka pnugluban ta ho? Pooda mu Utux Baro psdehu rmengo sunan, iya ku pqrqili!”

⁸ Ado tena rmnengo heya ka Yesu: “Bgihur naqah, latac peeyah seediq nii!”

⁹ Smiling heya ka Yesu: “Ima ngayan su?” Cmiyuk ka heya: “Ngayan mu we Segion. Ado hbaro ba ka yami!”

¹⁰ Iya miyan pqdriqi peeyah dxeral hiya, mesa rmengo bale Yesu ka dheya.

¹¹ Ga tbugan ssiyo dgiyaq heya ka qpuruh babuy.

¹² Dbgihur naqah we mesa Yesu: “Skguli miyan mosa babuy hiya ma say miyan ckceka babuy.”

¹³ Smruwa dheya ka Yesu. Mlatac ka dbgihur naqah ma mremux ckceka babuy. Ida ba yaa 20'00 qpuruh babuy ka wada tmalang priyax kdere, skrebu rcilung ma mhuqil ckceka rcilung.

¹⁴ Qduriq ka dmtabu babuy ma soosa daha smneeru alang paru ma alang dgiyaq ka ndaan nii. Meyah mita, maanu ka kiya, mesa ka kana seediq hiya.

¹⁵ Meyah Yesu hiya ka dheya. Qtaan daha ka seediq qnerac bgihur naqah, kiya ka tnheqan utux ka seediq, ga tleung, mnlukus ma tgkeela ba. Miicu bale ka dheya da.

¹⁶ Qmnita heya ka seediq we srengo daha dheya ka ndaan seediq qnerac bgihur naqah ma quri so babuy uri.

¹⁷ Latac peeyah dxeral daha hiya mesa rmengo bale Yesu ka dheya.

¹⁸ Mosa paapa asu ka Yesu ciida, kmtheyaq suupu Yesu ma meyah rmengo heya ka seediq qnerac bgihur naqah.

¹⁹ Ini na srwai ma rngagan na: “Osa sapah ma osa lutuc su hiya. Saani smneeru wada huwa mesa qmeepah paru bale qneepah na sunan ka Bukung ma wada huwa mesa gmaalu sunan.”

²⁰ Mosa ka heya ma prading meniq dxeral Dekapolis gmarang wada huwa mesa qmeepah paru qneepah heya ka Yesu. Mskluwi kana ka seediq da.

Weewa Yairos ma Mqedil Mnarux Msdara

²¹ Paapa asu mntaril sipo rcilung dungal ka Yesu, msseli ssiyo Yesu ka hbaro ba seediq ma meniq ssiyo rcilung hiya ka Yesu.

²² Meyah ka Yairos kesun 1 mpqlahang sapah pssliyan. Mita Yesu de tgtemaq berah papak Yesu.

²³ Mnpiya ba rmengo Yesu: “Laqi mu mqedil we ga mphuqil da. Braho su bale, so kkmalu na ma kkuudus na, say posa heyi na ka baga su.”

²⁴ Msuupu heya mosa ka Yesu ma pkeeyux smnegul Yesu ka hbaro ba seediq.

²⁵ Niqan 1 ka mqedil, wada 12 knkawas mnarux msdara ka heya.

²⁶ Egu ba ndaan na mqraqil pqita hbaro ba ising ma wada na sliqan ka kana dnoi na. Ini bale kmalu ma krinah mrana ka mnarux.

²⁷ Wada mbahang quri Yesu ka heya de tgimax ckceka hbaro ba seediq. Peeyah bukuy Yesu tmelung lukus na.

²⁸ Lmngelung ka heya: “Ani nak lukus na ka tlengun mu de ida ku mpkmalu da.”

²⁹ Kiya de asi kdengu cnriyu dara na ma klaun na wada malu ka mnarux na.

³⁰ Ciida, lnglungun so hari niqan beyax wada peeyah heyi na ka Yesu. Asi pspgeriq tunux na ma rmengo: “Ima ka tmnelung lukus mu ho?”

³¹ Rmengo heya ka tnugsaan na: “Qtai, hbaro ba seediq ga mkkeeyux qmapur sunan, masu smiling: ‘Ima tmnelung kenan’ ho?”

³² Pooda doriq na migin ka Yesu, mpqita mqedil wada mnoda so nii.

³³ Wada mkela so ndaan heyi na ka mqedil de miicu ma prkerang meyah tmbqelic berah Yesu, srengo na heya kana ka so ndaan.

³⁴ Rmengo heya ka Yesu: “Weewa, snhiyan su ka wada dmoi baga sunan. Psbleyaq lnglungan su osa sapah, wada malu ka narux su da.”

³⁵ Rmengo kari ciida ka Yesu we, meyah ka duma seediq pneeyah sapah mpqlahang sapah pssliyan ma rmengo: “Ga mhuqil ka laqi su mqedil da. Ma su lux smqeya mptgesa dungal ho?”

³⁶ Ini na bhangi rnengo daha ka Yesu, rngagan na mpqlahang sapah pssliyan: “Iya kiicu, asi snhii”

³⁷ Kiya de wano Petros, Yakobu ma mtswai Yakobu Yohane ka desun na, ani ima ini na srwai psnegul heya mosa.

³⁸ Dehuk sapah mpqlahang sapah pssliyan ka dheya, taan na ka seediq mrrudu squwaq, pnbaro ba lmingis.

³⁹ Mremux truma dheya ka Yesu, rmengo dheya: “Ma namu mrrudu squwaq ma lmingis ho? Ini huqil ka laqi, nii gisu mtaqi.”

⁴⁰ Phlisan daha ka Yesu. Lwaqan na nganguc kana ka seediq. Madis tama ma bubu laqi ma seediq smnegul Yesu, mosa gaga niqan laqi.

⁴¹ Yesu ge, dooyan na baga ka laqi, rmengo heya: “Tarita, kumi!” Stsalu ka kari we “Laqi mqedil! Rngage su mu: ‘Tutuy!’”

⁴² Asi tutuy mkkesa ka laqi mqedil. Ado 12 ka knkawas na. Mkluwi bale ka kana seediq.

⁴³ Kiya de scugan na pdakar ba rmengo, iya pklai ani ima ka noda nii. Posa kari seediq maangal uqun pekan heya.