Markos 4 - Kari Utux Baro Seediq Tgyada

Pnungalan Kari Mrehak Rehak

¹ Tmgesa seediq dungal meniq ssiyo rcilung ka Yesu ma meyah msseli ssiyo Yesu ka hbaro bale seediq. Asi usa tleung bobo 1 asu, meniq rcilung ka asu, meniq ssiyo rcilung ka kana knhbaro seediq.

² Kiya de Yesu ge paangal egu ba kari tnugesa dheya. Tnugesa na ciida we rmengo:

³ “Qbahang! Qtai! Mosa rmehak rehak ka mrehak.

⁴ Rmehak ciida, niqan ka mtuting ssiyo elu ka rehak ma wada uqun qbheni.

⁵ Niqan ka mtuting qhqahur epux ba dxeral bobo btunux ka rehak. Ado ini kknedux ka dxeral ma asi heru.

⁶ Mnkala ka hido de sqmaun kntlexan. Ado ini ptgamil ba ma asi kdengu da.

⁷ Niqan ka rehak we mtuting ckceka pkpako. Mdakil ka pako kbuyun na de ini gheyi.

⁸ Niqan ka rehak we mtuting malu dxeral ma mdakil bale betaq mghei. Msn100, msn60, msn30 ka heyi na.”

⁹ Rmengo dungal ka Yesu: “Niqan birac qqbahang we qbahang!”

Dngusun Pnungalan Kari

¹⁰ Yesu murux nanak ciida we smiling pnungalan na kari ka seediq theyaq heya ma 12 heyi tnugsaan na.

¹¹ Kiya de rngagan na: “Wano yamu ka pklaun mu lneing quri Qnlhangan Utux Baro. Dseediq tgyicil ge, asi mu ka spaangal kari tmgesa.

¹² Kiya we dheya we, ani qmita ka qmita we, ini sreus qmita. Ani mbahang ka mbahang we, uxe daha kklaun. So maha ppspgeriq ka dheya duma, maangal ssrwaun.”

Tmgesa Pnungalan Kari Mrehak Rehak

¹³ Smiling dungal dheya ka Yesu: “Ini namu klai ka pnungalan kari nii peni? So kiya de huwa namu kesun mkela kana ka pnungalan kari di ho?

¹⁴ Kari Utux Baro ka rehak ga srehak mrehak.

¹⁵ Ga meniq ssiyo elu ka rehak we kiya ka seediq mnbahang ciida we asi eyah ka Satang ma glekun na mangal ka kari rnehak ga lhebun na.

¹⁶ Mntena nii dungal, srehak qhqahur bobo btunux we kiya ka wada mbahang kari ka dheya de asi tqqaras mangal.

¹⁷ Ani so kiya, ini ba ptgamil lhebun daha ma tnnais ini qbsiyaq. Ririh kari mu ka sooda daha mqraqil ciida de asi ktakur.

¹⁸ Ga srehak ckceka pkpako we seediq so nii kiya. Dheya we wada mbahang ka kari,

¹⁹ kiya de niqan ka pslhebun bobo dxeral ma psridil qnbleyaq ma, meyah kana ka ani maanu qqaras dheyaan wada na kbuyun ka kari de ini gheyi.

²⁰ Wada srehak malu dxeral we dheya we mbahang ma mangal kari. Msn30, msn60, msn1'00 ka knrana heyi na.”

Camo Truma Kbegax Seengan

²¹ Rmengo dheya dungal ka Yesu: “Madis camo ka seediq we ye daha psaun toma kulu ngaba seengan ma toma qlapo peni? Ini psai bobo pcmagan peni?

²² Ado ga bungan ka noda we uka ka uxe ptraun. Uxe uri we ga liingun ka noda we uka ka uxe maha klaun.

²³ Niqan birac daha qqbahang ka seediq we bleyaq mbahang!”

²⁴ Rmengo dheya dungal ka Yesu: “Qlhangi ba ka bnhangan namu! Seengan namu seengan maanu we seengun namu na so nii uri. Prnaun namu na mege dungal.

²⁵ Ado ga niqan we krnahun mege ka heya. Ga uka we ani dnoi na rnahun gmeluk mangal uri.”

Kari Kndkilan Rehak

²⁶ Rmengo dungal ka Yesu: “Qnlhangan Utux Baro we mntena so seediq rmehak rehak dxeral.

²⁷ Mtaqi keeman ka heya ma mtutuy diyan ciida, wada hmuwa mesa mdakil ka rehak we ini na klai.

²⁸ Hmeru nanak peeyah dxeral ka mpgheyi. Prading hmeru ma mphepah de mghei demux ka drami na.

²⁹ Mhada ka heyi na de asi na sqeti kawil qmburung. Ado dehuk ali qbrungan da.”

Kari Rehak Sama Karic

³⁰ Rmengo dungal ka Yesu: “Ptnaun ta so maanu ka qnlhangan Utux Baro ho? Pngalun ta so maanu kari ho?

³¹ Heya we mntena so demux rehak sama karic. Srehak dxeral ciida we ani so tgbiciq bale pntnaun kana ani maanu rehak bobo dxeral.

³² Bobo wada ta srehak de mdakil hmeru pntnaun kana ani maanu smsama we mgkala knparu. Pcriyu hmeru paru cida na betaq dehuk yahan tmrudu qbheni ka ckceka na.”

Rmengo Pnungalan Kari

³³ Mangal egu pnungalan kari so nii ka Yesu, spooda na so maha daha klaun mbahang ma rmengo kari dheya.

³⁴ Nasi ini doi pnungalan kari de ini rengo dheya ka heya. Nasi uka ani ima seediq de pqbhangun na kana kari ka tnugsaan na nanak.

Pgseesu Bgihur ma Rcilung

³⁵ Gbiyan ali ciida, rmengo tnugsaan na ka Yesu: “Ntrile ta sipo hiya” mesa.

³⁶ Kiya de hmiti smwaye hbaro ba seediq ka tnugsaan na, desun daha msuupu mtaril ka Yesu tena gaga asu baro. Duma asu we snegul dheya mosa uri.

³⁷ Asi eyah ka paru bale bgihur, beyax pnuwan bula rcilung meyah truma asu ma ini beyo betaq so mpstenge asu ka qsiya.

³⁸ Yesu we tmpunu mtaqi muxi ngungu asu. Saan tmutuy tnugsaan na ma rngagan daha: “Mptgesa, mphuqil miyan da uxe su dmayo ho?”

³⁹ Mtutuy ka Yesu ma kseengun na ka bgihur, rmengo rcilung uri: “Gmelux! Kgseesu di!” Kiya de msange ka bgihur ma mgmelux bale da.

⁴⁰ Rmengo tnugsaan na ka Yesu: “Hmuwa, ma namu miicu ho? Ma uka snhiyan namu ho?”

⁴¹ Ani kana kniicu daha duma mpprengo: “Ima bale ka seediq nii ho? Ma ani bgihur ma rcilung ida thei ba heya kana!”