Markos 3 - Kari Utux Baro Seediq Tgyada

Pkmalu Mrqeling Icil Baga Sngayan

¹ Mremux sapah pssliyan dungal ka Yesu, meniq hiya ka 1 seediq, mrqeling icil baga na.

² Ado qqberiq daha mege kari, qmlahang bale Yesu ka duma daha ma, yaa na pklmeun ali sngayan ka heya ho? Qmita bale.

³ Rngagan na ka seediq mrqeling icil baga: “Tutuy! Heyu ckceka hini!.”

⁴ Kiya de slingan na ka dheya: “Tgiinu ka qqpahun ali sngayan, qmeepah malu ma qmeepah naqah ho? Pkuudus knuudus ma phuqil knuudus ho?” Mgmelux ka dheya.

⁵ Tsseang doriq na mita dheya ka Yesu. Ado mkere lhebun daha ma naqah bale kuxul na. Rngagan na ka seediq rqeling baga: “Hkero baga su!” Hkragun na ka baga na de malu ka baga na da.

⁶ Mosa nganguc ka seediq Parisay ma asi pprengo daha knpruhan seediq Hrodes, mpprengo, huwa ta kesun smterung ma pphuqil ka Yesu.

Smnegul Yesu Ka Hbaro Seediq

^7-8 Wada mquri siyo rcilung hiya ka Yesu ma tnugsaan na. Hbaro bale seediq pneyah Galil meyah smnegul heya. Dungal we hbaro bale ka seediq mnbahang qneepah Yesu de, peeyah Yudaya, Yerusalem, Idumaia ma quri thngali Yarden ma, quri Turos, Cidon mosa Yesu hiya.

⁹ Ado hbaro ba ka seediq, so uxe pkkeeyux heya ka hbaro ba seediq, psramal 1 asu kesun na dmurun ka tnugsaan na.

¹⁰ Ado hbaro ba ka seediq wada na pklmeun, kika rinah mqqheruy mkkeeyux ma mktmelung heya ka mnarux seediq.

¹¹ Ani knuwan, qmita Yesu ka bgihur naqah de tgtemaq tnbqelic berah na ma mlawa: “Laqi su Utux Baro ka isu!”

¹² Ksengun na mdakar rmengo bale dmurun ka dheya, iya ku ptraani seediq.

Gmao 12 Snkgulan Yesu

¹³ Mosa dgiyaq ka Yesu, splawa na ka seediq ngngalun na. Kiya de mosa heya ka dheya.

¹⁴ Phyegan na ka 12 heyi kesun na snkgulan. So maha mssuupu ssiyo na ma sskagul na maha gmarang kari.

¹⁵ Biqun na beyax ppqduriq bgihur naqah uri.

¹⁶ Pheyu 12 heyi ka Yesu, niqan Simon (Petros kesun na tmngayan ka Yesu).

¹⁷ Yakobu laqi Cebeday, Yohane mtswai Yakobu (Boanergec, laqi bruwa, kesun na tmngayan ka Yesu).

¹⁸ Andreas, Pilipos, Bartolomay, Matay ma Tomas, Yakobu laqi Alhuay, Taddai, Pnspuwan mttilux dmayo alang kesun ka Simon.

¹⁹ Yehudah seediq Iskariot mbaruy Yesu.

Beerjebul Kesun Smngayan ka Yesu

²⁰ Mremux sapah ka Yesu. Meyah msseli dungal ka hbaro seediq. Betaq ini tduwa mekan ido ka Yesu ma tnugsaan na.

²¹ Mbahang so nii ka tnsapah Yesu de, meyah nganguc ma blebil hiya, gaga mkuni ka heya de, mesa ka dheya.

²² Rmengo ka dmptpatis pneeyah Yerusalem: “Ga thiqan Beerjebul ka heyi na:” “Spooda na qbsuran utux naqah pqduriq utux naqah ka heya.”

²³ Tosun na mlawa ka dheya ma spaangal na kari rmengo: “Tduwa pqduriq Satang ka Satang ho?

²⁴ Nasi mtg2 ka 1 qnlhangan ge qnlhangan nii ge uka hheyu na.

²⁵ Nasi mkeekan ka 1 sapah ge sapah nii ge uxe mptduwa mheyu.

²⁶ Nasi tbrinah mccebu heya nanak ma mtg2 ka Satang ge uka hheyu na ma maha mpkuuka.

²⁷ Ani ima ini tduwa mremux sapah mkkere heyi seediq ma gmeeluk qyqeya na. Asi ka pllayun na mekuy ka mkkere seediq nii, kika mpdehuk gmeeluk qyqeya sapah na.

²⁸ Bale ba rngage maku. Kana naqah seediq ma kana ani maanu kari smngayan daha Utux Baro we srwaun.

²⁹ Wano smngayan Bgihur Utux ka seediq we ani betaq knuwan uxe srwaun, spheal na betaq ani knuwan ka qnnaqah na.”

³⁰ Ado rmengo ka dheya: “Yesu we ga sdooyun bgihur naqah ka heya.”

Dmtswai ka Seediq Muyu Lnglungan Utux Baro

³¹ Ciida, meyah ka bubu Yesu ma dmtswai na. Mheyu nganguc ma smkagul seediq mosa mlawa Yesu.

³² Gisu hbaro ba seediq mtlibu mtqiri tleung ssiyo Yesu, rngagan daha ka heya: “Tai! Ga meniq nganguc ka bubu su ma dmtswai su rseno ma dmtswai su mqedil, ga migin sunan?”

³³ Cmiyuk rmengo ka Yesu: “Ima ka bubu mu ma mtswai mu rseno ho?”

³⁴ Pdaan na doriq mita ka seediq tleung mtqiri hiya ma rmengo: “Tai! Bubu mu, mtswai mu rseno!

³⁵ Ani ima ka muyu lnglungan Utux Baro we kika mtswai mu rseno ma mtswai mu mqedil ma, bubu mu da.”