Markos 15 - Kari Utux Baro Seediq Tgyada

Psgao Berah Pilatos ka Yesu

¹ Betaq mgrebu caman, mhedu mpprengo ka dparu msapuh, rdrudan, dmptpatis ma kana seediq prngagan de, bkean daha ka Yesu ma sbege daha Pilatos.

² Smiling heya ka Pilatos: “Qbsuran su paru seediq Yudaya ka isu?” Cmiyuk rmengo ka Yesu: “Isu nanak rmnengo.”

³ Rmengo egu ba qquwan Yesu ka dpusu msapuh.

⁴ Smiling heya dungal ka Pilatos: “Tai, nii kneegu ka qquwan kari rnengo daha sunan, uxe su mpciyuk ani maanu ho?”

⁵ Ida ini ciyuk ka Yesu. Mskluwi nii ka Pilatos.

Psgeegan Mphuqil ka Yesu

⁶ Knkingal smseman hrnasan ciida, Pilatos we spooda na pnesa seediq rraguh na ka 1 seediq ga shetur ma sbege na dheya.

⁷ Ciida, niqan 1 ka seediq, Barabbas. Gaga shetur ckceka seediq tnbrinah qbsuran paru. Mrrudu ciida we wada phuqil seediq ka dheya.

⁸ Meyah ka hbaro seediq, prading mesa Pilatos. So qneepah na klaali we kesi na mege dheya.

⁹ Cmiyuk rmengo dheya ka Pilatos: “Kuxul namu ka sraguh mu mege yamu ka qbsuran paru seediq Yudaya nii?”

¹⁰ Klaun na ka dpusu msapuh we mnoda qnriqu daha, kiya ka sbege daha heya ka Yesu.

¹¹ Ani so kiya, nii pprudu hbaro seediq ka dparu msapuh. Qlengun na ppraguh Barabbas ka Pilatos, sbege na dheya.

¹² Rmengo dungal dheya ka Pilatos: “So kiya de, huwa mu kesun ka seediq kesun namu qbsuran paru seediq Yudaya nii ho?”

¹³ Mdiras mlawa ka dheya: “Ptaani jyujika!”

¹⁴ Rmengo dheya ka Pilatos: “Maanu ba qneepah na naqah ho?” Krinah mdiras mlawa ka dheya: “Ptaani jyujika!”

¹⁵ Mpsmalu kuxul hbaro ba seediq ka Pilatos, kiya de sraguh na dheya ka Barabbas. Wada na sbetun ka Yesu de, sbege na seediq ptteun daha jyujika ka Yesu.

Tsyaxan Supi Ka Yesu

¹⁶ Supi we desun daha nganguc sapah qbsuran mdudul ka Yesu. Pssliun daha mlawa ka kana 1 rahul supi.

¹⁷ Plkusan daha lukus mtgdiyuc, pkbnuhan daha bunuh knadi daha pako ka Yesu.

¹⁸ Kiya de thmuku heya ka dheya, rmengo: “Tai so mpkuudus ani betaq knuwan! Qbsuran paru seediq Yudaya!”

¹⁹ Sbetun daha qreti brhengil ka tunux na. Ptruqan daha ma tmbqelic thmuku heya.

²⁰ Mhedu tsyaxan daha de lhelah daha ka lukus mtgdiyuc. Plkusan daha ida nlukus na, desun daha pteetu jyujika.

Spteetu Jyujika ka Yesu

²¹ Niqan 1 seediq, Simon pneeyah Kurenaios, tama Aleksandria ma Rupos. Pneyah nklualang biciq moda hiya. Kiya de supi we pkyexan daha ppheal jyujika Yesu ka heya.

²² Desun daha Golgota ka Yesu. (Hdilun kari nii we dxeral rngerang qrari tunux),

²³ sbege daha Yesu ka sino pnugmaxan geluq iyu. Ini angal ka heya.

²⁴ Spteetu daha bobo jyujika ka Yesu, blebil qreti pssugun daha ka lukus na, teta ima ka maangal maanu.

²⁵ Spteetu daha jyujika ka Yesu ciida we kika 9 toke mgrebu.

²⁶ Pnatis daha qnnaqah na ga meniq bobo tunux ge: “Qbsuran paru seediq Yudaya.”

²⁷ Spteetu daha jyujika msuupu Yesu ka 2 mpgeeluk gmeeguy, narac na ka 1. Iril na ka 1.

²⁸ Nii ge wada ma bale ba pnatis Patis Mrtaso: “Ga daha pspawan peeniq ckceka naqah seediq ka heya.”

²⁹ Moda tmsiiyax heya ka dseediq mkleelu, mlgelu ka tunux daha ma: “Ah, seediq isu nii ka mphurah smeeliq Sapah Thmkuwan ma mk3 de psmalu mpheyu dungal.

³⁰ Pkdusi sunan nanak, ptuting peeyah jyujika!”

³¹ Tmsiiyax Yesu uri ka dparu msapuh ma dmptpatis. Mpprengo: “Dhekan na pkuudus ka seediq ma, ini na dheki pkuudus ka heya nanak!

³² Kiristo, qbsuran paru Israel. Tuting peeyah jyujika saya! Pqtai miyan. Kiya de mpsnheyi nami da!” Tmsiiyax heya ka seediq mnsuupu pteetu jyujika hiya uri.

Mhuqil ka Yesu

³³ Kiya de ceka naali de mnkuung ka kana bobo dxeral betaq 3 toke.

³⁴ 3 toke de paru ba hrenang na mdiras ka Yesu: “Iruy, Iruy, rama sabakutani?” Hrigun ka kari de: “Utux Baro mu, Utux Baro mu. Hmuwa, ma saku laxan?”

³⁵ Mbahang so nii ka duma ga mheyu ssiyo hiya de rmengo: “Tai, ga mlawa Eliyah ka heya!”

³⁶ Tmalang mosa hiya ka 1 seediq. Pttkui na rmebu sino tgbasi ka mheuc wata srisuh. Psaun na ptuling brhengil, pmahun na Yesu ma rmengo: “Trai ta han, qtai ta teta so meeyah ptuting heya peeyah jyujika ka Eliyah ho?”

³⁷ Paru hrenang na mlawa ka Yesu de msetuq hengak na da.

³⁸ Mtg2 msgaliq peeyah baro betaq truma ka pala pntaayus ckceka Sapah Thmkuwan.

³⁹ Mheyu sipo na Yesu hiya ka qbsuran 1'00 supi, qmita so nii pnsteqan na hengak de rmengo: “Seediq nii we bale ba laqi Utux Baro!”

⁴⁰ Mita peeyah theya ka duma mqedil uri. Ckceka daha hiya we Maria seediq Magdalene, Maria bubu Yakobu biciq ma Yosi. Dungal we Calome.

⁴¹ Meniq Galil ciida ka Yesu, dheya we smnegul ma snbleyaq heya. Niqan dungal ka hbaro ba mqedil mnsuupu theyaq Yesu mosa Yerusalem.

Smeku Heyi Yesu

⁴² Gbiyan de ado ali psrmalan, kika ali berah sngayan,

⁴³ meyah ka Yosehu seediq Yalimatay. Heya we ini kiicu mosa mremux mita Pilatos ma mesa heyi Yesu. Seediq nii we prngagan pspruun qmita seediq ddheya ma psmeyah qnlhangan Utux Baro uri.

⁴⁴ Mbahang wada mhuqil ka Yesu de, mskluwi ka Pilatos. Splawa na ka qbsuran 1'00 supi, smiling yaa ga bsiyaq hnqilan na ka Yesu.

⁴⁵ Klaun na ka kari peeyah qbsuran 1'00 supi de sbege na Yosehu ka heyi Yesu.

⁴⁶ Kiya de maruy tninun malu ware keguy ka Yosehu ma mangal heyi Yesu. Sbleqan na lmabu galiq malu ware keguy ka heyi na. Skuwan na peeniq habung tnqeran tasil ckceka ma rduwan na meluk posa tasil ka rhengun habung.

⁴⁷ Qmnita kana skuwan Yesu ka Maria seediq Magdalene ma Maria bubu Yosi.