Markos 14 - Kari Utux Baro Seediq Tgyada

Migin Phqilan Yesu

¹ Mk2 de snseman hrnasan ma mekan pang ini psai tgeda. Dpusu msapuh ma dmptpatis we lmngelung ttraki qmerac ma phuqil Yesu.

² Rmengo ka dheya: “Iya pdai smseman ciida. Maha mrrudu mbrebur ka seediq.”

Rcuhan Abura Meeniq Betania

³ Meniq Betania sapah Simon mnnarux msburo heyi tleung mekan hnpure ciida ka Yesu. Niqan 1 mqedil, madis malu ba 1 rusuq bale ba skeenux nrrudu ini gmaxi ani maanu. Gremun na ka rusuq, sheruy na tunux Yesu ka malu skenux.

⁴ Mseang ka duma na seediq, mpprengo: “Hmuwa, ma smeeliq ba malu sknexan nii ho?”

⁵ “Malu sknexan nii we tduwa brigun 3'00 hbangan ging, mtduwa sbege qrinuc.” Kiya de mseang rmengo mqedil ka dheya.

⁶ Rmengo ka Yesu: “Laxi hiya! Ma namu pqnaqah kuxul heya ho? Malu ba qneepah na heyi mu.

⁷ Msuupu yamu klaali ka seediq qrinuc, ani knuwan mtduwa namu meepah malu dheyaan. Uxe namu klaali niqan yaku ka yamu.

⁸ Noda na so nii, pnooda nanak beyax na. Nii plaale rmicuh malu sknexan heyi mu ka heya. Nii psramal sseku kenan ka heya.

⁹ Bale ba rngage maku, ani inu grangan malu kari meeniq bobo dxeral, ida namu asi ka srengo bale ka qneepah na, so uxe daha cchungi ka heya.”

Maruy Yesu ka Yehudah

¹⁰ Mosa mita dpusu msapuh ka 12 heyi 1 ka Yehudah seediq Iskariot Kiya ma bbaruy na dheya ka Yesu.

¹¹ Mqaras bale mbahang ka dheya ma sntangan mege pila heya. Kiya de Yehudah we lmngelung migin so bbege na dheya ka Yesu.

Mtheyaq Tnugsaan Smseman Hrnasan

¹² Prading ba ali smseman pang ini psai tgeda, kiya ka smipaq miric smapuh smseman hrnasan ciida, smiling Yesu ka tnugsaan na: “Maha nami psramal inu ka ssaun uuqan su smseman hrnasan ho?”

¹³ Kiya de skgulan na ka 2 tnugsaan na, rngagan na: “Osa mremux alang, mpniqan ka 1 seediq madis 1 rusuq ga niqan qsiya. Snegul heya ka yamu.

¹⁴ Ani inu ka sapah tmayan na, rngagi ka tnpusu sapah: ‘Rmengo ka mptgesa, Ga inu ka tqiyan ssaun mekan smseman hrnasan mu ma tnugsaan mu ho?’

¹⁵ Heya we pqita na yamu ka 1 malu ba ma mttuku pnsrmalan paru nniqan. Kiya de osa psramal ita hiya ka yamu.”

¹⁶ Mlatac ka tnugsaan na, mremux alang. Mntena ba rnengo Yesu ka ntaan daha. Kiya de mhedu psramal smseman hrnasan hiya ka dheya.

¹⁷ Gbiyan de meyah ka Yesu ma 12 tnugsaan na.

¹⁸ Msuupu tleung mekan ciida ka dheya, rmengo ka Yesu: “Bale ba rngage maku. Ckceka namu niqan 1 ka mbaruy kenan, seediq nii we ga msuupu mekan yaku.”

¹⁹ Naqah bale kuxul daha, mskingal smiling heya: “Yaa yaku ho?”

²⁰ Rmengo dheya ka Yesu: “12 heyi 1 namu, kiya ka seediq nii msuupu kenan rmebu pang pngerah sara.

²¹ Ado meeyah ka Laqi Seediq di, mntena so ga spatis Patis quri heya, so ka seediq bnaruy Laqi Seediq we so smtali! So seediq ga we, nuuqu malu ini ktuting ka heya.”

Pheyu Uqun Gbiyan nBukung

²² Mekan ka dheya ciida, mangal pang ka Yesu. Mhedu mqaras Utux Baro de gbingun na ma sbege na tnugsaan na. Rmengo: “Aangal, nii ge heyi mu.”

²³ Dungal we mangal pngerah mahan ka Yesu. Mhedu mege mqaras Utux Baro de sbege na dheya. Wada mimah kana ka dheya.

²⁴ Rmengo dheya ka Yesu: “Nii we dara mu pnsdhegan. Ririh hbaro ba seediq ka psdara dara mu.

²⁵ Bale ba rngage maku. Betaq ku mimah bgurah sino meeniq ku qnlhangan Utux Baro ali ciida, uxe ku mimah sino nii dungal ka yaku.”

²⁶ Mnuuyas uyas ka dheya, kiya de mlatac mosa Dgiyaq Curung.

Kari Pgeela Mpdmeqo Bukung ka Petros

²⁷ Rmengo dheya ka Yesu: “Mpktakur namu kana ka yamu. Ado mesa ka ga spatis Patis: ‘Sbetun mu ka mtabu, kiya de mkrehak ka miric rudu da.’

²⁸ Ani so kiya, bobo ku muudus peeyah hnqilan, maha ku mplaale yamu mosa Galil.”

²⁹ Rmengo heya ka Petros: “Ani mtakur kana ka dheya we uxe ku ka yaku.”

³⁰ Rmengo heya ka Yesu: “Bale ba rngage su mu. Keeman kiya mn2 qmqugu rodux berah na ciida we, maha su mpn3 dmeqo kenan.”

³¹ Mbeyax ba rmengo ka Petros: “Yaku asi ku ka msuupu sunan mhuqil we uxe ku ba mdeqo sunan!” So nii rnengo kana ka tnugsaan na.

Dmurun Meniq Kesamani

³² Mosa Kesamani hiya ka dheya, rmengo tnugsaan na ka Yesu: “Tleung hini ka yamu. Maha ku dmurun.”

³³ Kiya de desun na msuupu heya ka Petros ma Yakobu ma Yohane. Prading mnkluwi ka Yesu, naqah ba kuxul na.

³⁴ Kiya de rmengo dheya: “Naqah ba kuxul mu betaq ku so mphuqil. Eeniq hini ka yamu ma kiiyo.”

³⁵ Mkkesa mosa tikuh thngali tgtemaq dxeral ka heya, dmurun rmengo: “Nasi mtduwa, phrnasi ku hiya ka ali kiya.”

³⁶ Rmengo ka heya: “Aba, Tama! Isu ge tgklaan su kana. Braho su bale, angal ka pngerah mahan nii. Kiya de iya pooda lnglungan mu, pooda lnglungan su nanak.”

³⁷ Meyah ka Yesu, taan na gisu mtaqi kana ka dheya. Kiya de rmengo Petros: “Simon, ga su mtaqi na? Ini su tduwa miiyo ani tnnais ho?

³⁸ Kiiyo ma druni so namu uxe psrdilun pnseengan. Ani so smruwa ka lnglungan namu, ida muuwic ka heyi namu.”

³⁹ Mosa dungal ka Yesu. Mosa dmurun, mntena ka rnengo na.

⁴⁰ Kiya de meyah mbrinah dungal ka Yesu, taan na nii mtaqi ka dheya na. Ado mchedil ka doriq daha. Ini kela huwa mesa cmiyuk Yesu ka dheya.

⁴¹ Mn3 meyah ka Yesu ma rmengo dheya: “Mptbleyaq mtaqi namu na ho? Baka da, dehuk ka ali da. Tai, bbege daha baga dseediq niqan qnquwan noda ka Laqi seediq da.

⁴² Tutuy, nita da! Tai, gisu meyah hini ka seediq mbaruy kenan da!”

Qrapun daha ka Yesu

⁴³ Rmengo ciida ka Yesu, asi eyah ka Yehudah 1 seediq ckceka daha 12 tnugsaan. Msuupu meyah duma seediq dmoi hlmadac ma qhuni. Dheya we skgulan dpusu msapuh, dmptpatis ma rdrudan.

⁴⁴ Tena mprengo pnugkela daha ka seediq mbaruy. Rmengo: “Ima ka tnuguhun mu quwaq we kika heya. Qerac ka heya, tqlahang ba madis.”

⁴⁵ Meyah ka Yehudah de asi osa berah Yesu, rmengo: “Mptgesa!” Kiya de asi tmunguh heya.

⁴⁶ Posa baga qmerac Yesu ka dheya.

⁴⁷ Niqan ka 1 seediq mheyu ckceka ssiyo hiya, hmgeluq hlmadac na. Wada smipaq tnqliyan paru msapuh ma slapi na ka icil birac na.

⁴⁸ Cmiyuk rmengo dheya ka Yesu: “Maadis namu hlmadac ma qhuni meyah qmerac kenan. Mntena namu so hari nii qmeraq mpgeeluk gmeeguy seediq ka yamu ho?

⁴⁹ Mnsuupu ku yamu klaali meniq Sapah Thmkuwan tmgesa seediq. Ini namu qerac kenan han. So nii we asi ka ma bale ba ga spatis Patis.”

⁵⁰ Wada malix Yesu qduriq kana ka tnugsaan na.

Qduriq ka Riso

⁵¹ niqan ka 1 riso ini plukus, wano galiq nuqah nanak ka spilan na. Smnegul Yesu ka heya ma qrapun daha.

⁵² Kiya de htiyan na qmada ka galiq tninun nuqah ma mbberas wada qduriq.

Psiling berah Prngagan Ka Yesu

⁵³ Desun daha paru msapuh hiya ka Yesu. Meyah msseli hiya ka kana dpusu msapuh, rdrudan ma dmptpatis.

⁵⁴ Smtheya smnegul Yesu ka Petros, betaq mremux nganguc sapah paru msapuh. Msuupu tleung dmpqlahang malah puniq.

⁵⁵ Dpusu msapuh ma kana seediq prngagan hiya we mkmigin pgkela qnquwan Yesu, klaan daha pphuqil heya. Kiya de ini daha sllai.

⁵⁶ Niqan ka hbaro seediq ptraki pgkela qnquwan Yesu, kiya ka kiya ini pntena ka pnugkela daha.

⁵⁷ Niqan duma ka seediq mheyu pgkela qnquwan Yesu, rmengo:

⁵⁸ “Qnbhangan miyan ka rnengo na: ‘Yaku we hrahun mu smeeliq ka Sapah Thmkuwan snmalu baga seediq nii, mk3 de smleun mu ka 1 dungal Sapah Thmkuwan uxe snmalu baga seediq.’”

⁵⁹ Ani so nii we ida ini pntena ka pnugkela daha.

⁶⁰ Kiya de mheyu ckceka daha hiya ka paru msapuh ma smiling Yesu: “Seediq nii pnugkela daha qnquwan su we, uka ka cciyuk su ho?”

⁶¹ Mgmelux ka Yesu, ini ciyuk ani maanu. Smiling heya dungal ka paru msapuh: “Isu we Kiristo su, laqi tndhuun ho?”

⁶² Rmengo ka Yesu: “Un! Mpqita namu Laqi Seediq tleung narac pusu beyax, mpaapa plabu baro meyah ka heya.”

⁶³ Kiya de smgaliq lukus na ka paru msapuh, rmengo: “Ma lux asi ka niqan mpgkela seediq dungal ho?

⁶⁴ Qnbhangan namu kana ka kari na nii smngayan Utux Baro da. Huwa mesa lnglungan namu ho?” Kiya de kana dheya we ngalan daha mndungus phqilun ka Yesu.

⁶⁵ Kiya de duma daha we prading tmuruq heya ma mubung dqeras na. Tmkemu baga beebu heya ma, rmengo heya: “Rengo kari mpgeela na!” Smebuc baga dqeras na ka dmpqlahang uri.

Mn3 Dmeqo Yesu ka Petros

⁶⁶ Ga meeniq nganguc truma hiya ka Petros, kiya de meyah ka 1 weewa mdayo paru msapuh.

⁶⁷ Taan na ga malah puniq ka Petros, tgleesun na mita ma rmengo: “Mntheyaq su Yesu seediq Najare ka isu uri.”

⁶⁸ Dmeqo rmengo ka Petros: “Ini ku kela. Ini ku kela lmngelung ma ini ku kela uri maanu ka ga su srengo!” Kiya de mlatac ma dehuk nganguc ka heya. Qmqugu ka rodux da.

⁶⁹ Mita heya ka weewa mdayo, rmengo seediq ga mheyu ssiyo hiya: “Ddheya ka seediq nii.”

⁷⁰ Dmeqo dungal ka Petros. Ini qbsiyaq, rmengo Petros dungal ka seediq dmheyu ssiyo: “Ddheya bale ka isu, ado seediq su ba Galil.”

⁷¹ Knchedil ba smdehu ka Petros, rmengo: “Ini ku kela ka seediq gaga namu srengo!”

⁷² Asi qqugu mn2 ka rodux. Petros de lnglungun na ka kari rnengo Yesu: “Mn2 qmqugu rodux berah na ciida, maha su mpn3 dmeqo rmengo kenan.” Lmngelung so nii de lmingis da.