Markos 13 - Kari Utux Baro Seediq Tgyada

Kari Pgeela Kkuuka Sapah Thmkuwan

¹ Mlatac peeyah Sapah Thmkuwan ciida ka Yesu, niqan 1 tnugsaan na rmengo heya: “Mptgesa, qtai, teyal ma uka ba hhwaun ka btunux nii! Uka ba hhwaun snlmean pnheyu nii!”

² Rmengo heya ka Yesu: “Mita su so nii knpruwan snlmean? Maha uka ani 1 btunux ini sliqi hmurah meniq tnnetun bobo btunux hini.”

Pskraya Nhdean

³ Meniq Dgiyaq Curung tleung mquri Sapah Thmkuwan ka Yesu, lmeing rmengo heya ka Petros, Yakobu, Yohane ma Andreas:

⁴ “Rngage miyan, mmeyah knuwan ka ooda nii ho? Mpbale ba moda kana ka nii ciida ge, niqan pnskraya na ho?”

⁵ Rmengo dheya ka Yesu: “Qlahang ka yamu, so uxe psridil yamu ka seediq.

⁶ Meeyah ka hbaro seediq pooda ngayan mu, rmengo: ‘Yaku ka Kiristo’ mesa mpsridil hbaro seediq.

⁷ Mbahang namu mccebu ma hrenang bgihur mccebu ciida, iya kiicu. Ida asi ka mooda so nii. Ani so kiya, uxe qnhdean nana.

⁸ Mccebu seediq ka seediq, mccebu qnlhangan ka qnlhangan. Maha hbaro niqan krayan ma runu. Kana so nii we kiya ka prdingan ba mqraqil.

⁹ Asi namu ka qmlahang nanak. Ado meeniq ka seediq, bege namu daha prngagan. Psruun namu daha sapah pssliyan. Ririh yaku ma mpheyu namu berah dmpdudul ma dqbsuran paru. Pgkela namu dheya.

¹⁰ Kiya de, asi ka pllayun gmarang kana qnlhangan ka malu kari nii.

¹¹ Desun namu daha ma sbege namu daha seediq ciida we, iya plaale pslhebun mprengo su maanu. Betaq ciida, maanu ka kari bnege mu sunan we kiya ka rngaani. Ado uxe yamu ka gaga rmengo, Bgihur Utux ka kiya.

¹² Mtswai we phqilun na ka mtswai, tama we phqilun na ka lqlaqi. Lqlaqi we mptbrinah ma mphuqil tama ma bubu na.

¹³ Ririh ngayan mu ka pqnqihun namu daha hbaro seediq. Kiya de ini klgelu knremun ka seediq we maha dooyun baga.”

Paru Mqraqil

¹⁴ “Nasi namu taan nii mheyu uxe hyegan na ka qnqihun ta madis smeeliq de (msepu we klai). Ciida, asi ka qduriq dgiyaq ka seediq ga meniq Yudaya.

¹⁵ Ga dnamux ka seediq ge iya eyah truma, iya osa remux sapah ruma mangal qyqeya.

¹⁶ Iya osa mbrinah maangal lukus ka seediq ga qnpahan.

¹⁷ Ali ciida we maha mqraqil ka mqedil ga mchedil ma ga nmunuh laqi!

¹⁸ Druni ka yamu, so uxe eeyah misan ka nii!

¹⁹ Ado maha mqraqil ka ali ciida. Uka ka so nii ndaan, peeyah pnrdingan bobo dxeral snlmean Utux Baro betaq saya. Uxe maha uka so nii ka nexal.

²⁰ Nasi na ini stkuhi ali ka Bukung ge, kana muudus niqan heyi ma dara we uka ani 1 ka dooyun baga. Ani so kiya, ririh seediq gneegan na, wada na stkuhun ka ali da.

²¹ Nasi rmengo yamu ka ani ima seediq ciida: ‘Tai, nii hini ka Kiristo!’ Iya ba snhii, ‘Tai, gaga hiya ka Kiristo!’

²² Ado meeyah ka mnnangi Kiristo ma uxe bale ba mpgeela kari mooda meepah pnskraya qneepah utux ma sklwiun ooda. Nasi mtduwa we, maha mpsridil seediq gneegan Utux Baro uri.

²³ Qlahang ka yamu. Wada maku pllayun rmengo kana ani maanu di.”

Meyah ka Laqi Seediq

²⁴ “Meniq ali ciida, kiya ka bobo mqraqil, pnkmanun ka hido, uxe mpkledax ka idas uri.

²⁵ Mptuting peeyah karac ka pngerah, slgelu kana ka niqan klegan ga baro.

²⁶ Ciida, Taan daha ka laqi seediq nii dmoi paru beyax ma knledax paapa plabu meyah ka laqi seediq.

²⁷ Ciida, mpskagul snkgulan baro, mpsseli gneegan na seediq peeyah 4 bgihur, peeyah puting dxeral betaq puting karac.”

Pnungalan Kari Tnugesa Qhuni Nunuh

²⁸ “Slhai ka pnungalan kari quri qhuni nunuh. Smtasin qhuni ciida ma hmeru waso de, klaun namu nii smdaling ka rbagan da.

²⁹ Mntena so nii. Taan namu meyah ka so ooda nii de, klaun namu smdaling ba da, gaga rhengun da.

³⁰ Bale ba rngage maku. Ini hrinas ciida na ka mknexal saya, maha mooda kana ka so nii.

³¹ Mpkuuka ka karac ma dxeral. Kiya de kari mu we uxe mpkuuka ani betaq knuwan.”

Uka Seediq Mkela ka Ali Kiya

³² “Ali ciida ma knuwan we ani ima ini kela. Ani snkgulan ga baro uri ma Laqi seediq uri we ini kela. Wano Tama nanak ka mkela.

³³ Qlhangi, kiiyo ka yamu. Ado ini namu klai meeyah knuwan ka ali ciida.

³⁴ Mntena so 1 seediq smwaye sapah ma mosa theya. Biqan na pusu beyax ka dtnqliyan na ma knkingal we biqan na qpahun daha. ‘Kiiyo’ kesun na rmengo ba ka mpqlahang rhengun uri.

³⁵ So kiya de, yamu we kiiyo. Ado ini namu klai meeyah knuwan ka tnpusu sapah. Ye gbiyan ho? Ye ceka rabi ho? Qgquwan rodux ho? Mgrebu ho?

³⁶ Uxe uri we asi lux meyah, taan namu na nii mtaqi.

³⁷ Kari srengo mu yamu we, kari rnengo mu kana seediq uri, Yamu we, kiiyo!”