Markos 12 - Kari Utux Baro Seediq Tgyada

Kari Peeyah Seediq Mpqeepah Naqah

¹ Prading paangal kari rmengo dheya ka Yesu: “Niqan 1 seediq, kmbgurah qnpahan lipas. Qlangan na ssiyo, kmari beling psaan beyuq lipas ma smalu paga qlhangan. Skbarux na dmpqeepah ma mosa theya nganguc da.

² Dehuk ka ali, skgulan na ka 1 tnqliyan na mosa dmpqeepah heya ma maha mangal duma heyi lipas nangal daha.

³ Qrapun daha ka tnqliyan na ma psruwan daha. Ini daha pdesi ani maanu pbrinah.

⁴ Smkagul 1 tnqliyan na mosa dmpqeepah dungal ka tnpqpahan. Plqihan daha tunux ma tsyaxan daha.

⁵ Smkagul 1 dungal ka tndxeral. Wada daha phqilun kiya di. So kiya dungal smkagul hbaro tnqliyan na. Duma we psruwan daha. Duma we wada daha phqilun.

⁶ Niqan taxa na tduwa na skgulun ka tnpqpahan. Kiya ka laqi sgaalu na. Tnhtian na ba smkagul mosa dheya hiya ma rmengo: ‘Ida maha daha spruun qmita ka laqi mu.’

⁷ Kiya de mpprengo ka dmpqeepah: ‘Nii ka rmirih na da! Aguh, phqilo ta. Kiya de mmaha nita kana ka hniti na da.’

⁸ Kiya de qrapi daha ma phqili daha. Sqada daha nganguc qnpahan lipas.

⁹ So nii, mphuwa mesa ka tnpqpahan lipas ho? Heya we yahun na phuqil ka dmpqeepah lipas ma bege na taxa ka qnpahan lipas.

^10-11 ‘Btunux qnada mpsmalu sapah ge wada ma pusu bale muxi sapah da. Qneepah Bukung ka nii, meeniq ckceka doriq ta we sklwiun bale.’ Uxe namu smpegan ka Patis Mrtaso nii peni?”

¹² Spaangal na rmengo kari nii ka Yesu ge, mkela sa gaga rmengo ita ka dheya. Kiya ka kmpqerac heya. Ado miicu hbaro seediq. Kiya de hmiti malix Yesu ma wada da.

Pila Bbege Kaisar

¹³ Kiya de skgulan daha ka duma Parisay ma qnpruhan Hrodes mosa Yesu hiya. Maha migin kari qnuuqu rnengo na.

¹⁴ Meyah ka dheya de rmengo Yesu: “Mptgesa, klaun nami, isu ge ini su qberiq ka isu. Ini su psaanak ani ima seediq. Ini su qita dqeras seediq uri. Wano bale ba elu Utux Baro ka stgesa su seediq. Ye malu mege pila Kaisar qbsuran Ruma?

¹⁵ Ya ta mege ka ita ho?” Mkela ka Yesu nii su mnnangi ka dheya. Kiya de rmengo dheya: “Ma namu pseung kenan? Adis 1 hbangan, qtae mu.”

¹⁶ Kiya de desun daha. Smiling dheya ka Yesu: “Hnyegan ima ma ngayan ima ka nii ho?” Cmiyuk ka dheya: “NKaisar.”

¹⁷ Rmengo dheya ka Yesu: “Qyqeya nKaisar we bqani Kaisar. Qyqeya nuUtux Baro we bqani Utux Baro.” Kiya de mskluwi ba kana ka dheya.

Mpkuudus Peeyah Hnqilan

¹⁸ Meyah Yesu hiya ka seediq Sadokay. Uka ka kkuudus peeyah hnqilan mesa ka dheya. Kiya de smiling Yesu:

¹⁹ “Mptgesa, ado ita mnatis kari nii ka Moseh: ‘Nasi wada mhuqil ka taxa qbsuran na, hmiti mqedil ma ini hiti laqi. Asi ka ngalun mtswai na, peeniq laqi lmutuc qbsuran na.’

²⁰ Cbeyo, niqan ka 7 mtswai. Mangal mqedil ka qbsuran ba, wada mhuqil ma ini hiti laqi.

²¹ Mangal heya ka tg2 smnegul qbsuran, wada mhuqil ma ini hiti laqi. So nii ka tg3 mtswai na dungal.

²² So kiya, 7 mtswai we ini hiti laqi kana. Tthiti de wada mhuqil ka mqedil uri da.

²³ Muudus peeyah hnqilan ciida ka dheya de mmaha mqedil nima ka mqedil nii di? Ado mnangal heya kana ka 7 mtswai.”

²⁴ Rmengo dheya ka Yesu: “Qnuuqu namu da. Kiya we, ado ini namu kela Patis Mrtaso, ini namu klai lmngelung ka beyax Utux Baro uri.

²⁵ Mpkuudus peeyah hnqilan ciida, uxe maangal mqedil ma uxe maha rseno uri. Maha so mntena snkgulan ga baro.

²⁶ Quri mpkuudus peeyah hnqilan ka seediq we, ini namu spegi ka patis Moseh pnatis na Patis Quri Pako? Wada hmuwa mesa rmengo Moseh ka Utux Baro peni? Rmengo ka Heya: ‘Yaku we Utux Baro nuAbraham, Utux Baro nuYijxaq, Utux Baro nuYakobu.’

²⁷ Uxe Utux Baro dseediq mhuqil ka Heya. Utux Baro dseediq gaga muudus ka Heya. Qnuuqu namu bale da!”

Tgpusu ba Gaya Pndakar

²⁸ Meyah ka 1 mptpatis, mnbahang pnrngagan daha, taan na malu ba cniyuk Yesu de smiling heya: “Ga inu ka tgpusu ba ckceka gaya pndakar?”

²⁹ Cmiyuk ka Yesu: “Tgpusu ba we so nii: ‘Tg1: Israel! Qbahang ka yamu! Bukung, 1 ba Bukung, kiya ka Utux ta Baro.

³⁰ Asi ka kana lhebun, kana lnglungan, kana knkela, kana beyax su glaani Bukung, Utux Baro su.’

³¹ Tg2 we so nii: ‘Asi ka gmaalu su ssiyo pntena gmalu su sunan.’ Uka ani maanu ka mgkala tgpusu ba daha gaya pndakar nii.”

³² Rmengo Yesu ka mptpatis: “Mptgesa, bale ba kiya. Malu ba rnengo su. Utux Baro we ida 1 ba. Wano heya, uka ka utux da.

³³ Asi ka kana lhebun, kana knkela, kana beyax gmalu heya. Asi ka so gmaalu su sunan glaanun ka ssiyo su uri. Mgkala kana bnege snapuh ka nii.”

³⁴ Taan na niqan ba knkela na cmiyuk ka heya de, rmengo heya ka Yesu: “Ini su stheya qnlhangan Utux Baro da.” Kiya de uka ka seediq kmsiling rmengo heya.

Pnluban Kiristo ma Dawid

³⁵ Tmgesa seediq Sapah Thmkuwan ciida ka Yesu, rmengo dheya: “Ma rmengo, lqlaqi mslutuc Dawid ka Kiristo, mesa ka dmptpatis ho?

³⁶ Stngayan Bgihur Utux rmengo ka Dawid: ‘Rmengo tnpusu sapah mu ka Bukung: Tleung narac mu, betaq mu psaun toma papak su ka pais su.’

³⁷ Ida ‘Bukung’ kesun na ka Heya ma lux lqlaqi mslutuc Dawid ka Kiristo dungal?” Mqqaras ba mbahang rnengo Yesu ka hbaro bale seediq hiya.

Mseang Dmptpatis

³⁸ Rmengo seediq ciida ka Yesu, rmengo: “Qlhangi ka dmptpatis. Dheya we smkuxul mlukus rila mkkesa. Smkuxul pthmuku seediq dheya meniq pssliyan.

³⁹ Smkuxul pusu malu tluungan sapah pssliyan ma paru tluungan uqan mqaras.

⁴⁰ Dheya we gmeeluk maangal dnoi sapah mqedil mqrinuc ma pqita bbaro dnurun. Maha krinah mgkala ngalun mndungus pkdraun ka dheya!”

Bnege Mqedil Mqrinuc

⁴¹ Tleung sipo psaan pila ka Yesu, ga mita hmuwa mesa posa pila daha ka hbaro seediq. Hbaro ba mbleyaq seediq we egu pnosa daha pila.

⁴² Meyah ka 1 qrinuc mqedil mqrinuc, posa 2 pila biciq. Kiya ka paru ba pila na.

⁴³ Mlawa tnugsaan na ka Yesu, rmengo dheya: “Bale ba rngage maku. Pnosa na pila psaan pila hiya ka qrinuc mqedil mqrinuc nii ge, mgkala pnosa kana seediq.

⁴⁴ Ado msngari psaun daha kana ka seediq. Kiya de mqedil mqrinuc nii we ani nanak ini pttuku wada na sbege kana ka dnoi na. Kiya kana kkuudus na ka wada na psaun.”