Markos 10 - Kari Utux Baro Seediq Tgyada

Quri Ptaalix

¹ Mtutuy heyi na mlatac peeyah hiya ka Yesu, dehuk dxeral Yudaya, sipo Yarden. Msseli ssiyo heya dungal ka hbaro ba seediq. So noda na klaali tmgesa dheya ka heya.

² Meyah ppseung Yesu ka duma seediq Parisay, smiling heya: “Malix mqedil ka rseno we ye malu ho?”

³ Cmiyuk rmengo dheya ka Yesu: “Maanu dnurun na yamu ka Moseh ho?”

⁴ Rmengo ka dheya: “Smruwa ka Moseh, matis patis mtaalix de tduwa malix mqedil.”

⁵ Rmengo ka Yesu: “Ado mkere ka lhebun namu, kiya ka spatis na yamu ka kari nii ka Moseh.

⁶ Peeyah pnrdingan smalu seediq ka Utux Baro, smlean na rseno ma mqedil.

⁷ Maanu so kiya de, asi ka mswaye peeyah tama ma bubu na ka seediq ma, msuupu mqedil na.

⁸ 2 heyi we mpkingal heyi. So kiya de uxe 2 seediq ka dheya, 1 ba heyi da.

⁹ Maanu so kiya de pnsterung Utux Baro ge, ini tduwa mswaye.”

¹⁰ Mremux sapah, smiling nii dungal ka tnugsaan na.

¹¹ Rmengo ka Yesu: “Ani ima malix mqedil ma mangal mqedil dungal, kika mmhemuc msuupu ma smeeliq mqedil na.

¹² Nasi qmada rseno na ka mqedil, mosa mqedil seediq dungal we kika wada moda mmhemuc msuupu uri.”

Smbleyaq Lqlaqi Biciq

¹³ niqan seediq, maadis lqlaqi mosa Yesu hiya. So ttlungun Yesu ka dheya. Kiya de mseang rmengo dseediq nii ka tnugsaan na.

¹⁴ Mita ka Yesu de mseang. Rmengo tnugsaan na: “Peeyah kenan hini ka laqi, iya htrani. Ado so nii ka seediq ga meniq qnlhangan Utux Baro.

¹⁵ Bale ba rngage maku. Ani ima maangal qnlhangan Utux Baro we nasi ini pntena so laqi we ida uxe mpteme.”

¹⁶ Kiya ka Yesu de dooyun na ka laqi, psaun na heyi daha ka baga na, smbleyaq dheya.

Migin Uka Psteqan Knuudus ka Seediq Mbleyaq

¹⁷ Hani ba mosa elu ka Yesu ciida, niqan 1 ka seediq tmalang meyah. Tmbqelic berah na ma smiling heya: “Malu mptgesa, asi ku ka qmeepah maanu kika tduwa ku mangal uka psteqan knuudus ho?”

¹⁸ Cmiyuk heya ka Yesu: “Ma sa ku kesun malu ka yaku ho? Wano 1 ba Utux Baro, uka ani 1 ka kesun malu.

¹⁹ Klaun su ka gaya pndakar: Iya phuqil seediq, iya mmhemuc msuupu, iya geeguy, iya qberiq pgkela, iya kraki, sprui ka tama ma bubu su.”

²⁰ Rmengo Yesu ka heya: “Mptgesa, kana so nii we wada mu ndwaun ba moda peeyah ku laqi da.”

²¹ Qmita heya ka Yesu, sgaalu na ka heya. Kiya de rmengo: “Niqan 1 ka ini su pttuku: Sai gmbaruy ka ani maanu qyqeya su, bqani qrinuc seediq. So kiya de mpniqan qnbleyaq dnoi su meniq karac baro hiya. Kiya de eyah smnegul kenan.”

²² Ado so nii ka kari Yesu we asi ksurung dqeras ma naqah kuxul na wada da. Ado egu ba qnbleyaq dnoi na ka heya.

²³ Mita ssiyo ka Yesu, kiya de rngagan na ka tnugsaan na: “Mpteme qnlhangan Utux Baro ka mbleyaq seediq we teyal ba mqriqu!”

²⁴ Mskluwi bale kari na ka tnugsaan na. Rmengo dheya dungal ka Yesu: “Lqlaqi, Mremux qnlhangan Utux Baro we mqriqu wa!

²⁵ Mremux qnlhangan Utux Baro ka seediq mbleyaq we nuuqu msleexan pooda beling qumi ka dapa bukung!”

²⁶ Mskluwi bale ka dheya duma mpprengo: “So kiya de ima ka mtduwa pkdusun di?”

²⁷ Mita dheya ka Yesu, rmengo: “Ini tklai seediq, uxe so kiya ka Utux Baro. Utux Baro we tklaan na kana.”

²⁸ Rmengo Yesu ka Petros: “Tai, wada miyan laxan ka kana ma smnegul miyan sunan.”

²⁹ Rmengo ka Yesu: “Bale ba rngage maku. Ririh yaku ma ririh malu kari wada malix sapah, mtswai rseno, mtswai mqedil, bubu, tama, laqi ma, qnpahan ka ani ima we

³⁰ uka ka uxe maangal mrana 1'00 kdesan nii saya. Kiya ka sapah, mtswai rseno, mtswai mqedil, bubu, laqi, qnpahan ma mooda ptraqil. Maangal uka psteqan knuudus kdesan mmeyah.

³¹ Kiya de hbaro ka ga plaale we mpthiti, ga mghiti we mpgeela.”

Mn3 Rmengo Kari Pgeela Mqraqil ma Mpkuudus ka Yesu

³² Ida mkkesa berah daha ka Yesu mkleelu mosa Yerusalem ciida. Mkluwi ka tnugsaan na, miicu ka seediq smnegul heya uri. Desun na ssiyo dungal ka 12 tnugsaan, rmengo dheya quri strengun na:

³³ “Tai, saya ka maha ta Yerusalem. Bbege daha baga niqan beyax msapuh ma dmptpatis ka Laqi seediq. Slmeun daha qnnaqah pphuqil ka dheya, bege daha seediq icil.

³⁴ Phlisun daha, truqun daha, sbetun daha, phqilun daha uri. Bobo mk3 ali, mpkuudus peeyah hnqilan ka heya.”

Mpbukung ma Mptqliyan

³⁵ Meyah Yesu hiya ka daha laqi Cebeday, Yohane ma Yakobu, rmengo heya: “Mptgesa, ani maanu pnesa miyan sunan, kesi miyan hiya moda.”

³⁶ Rmengo ka Yesu: “Maanu ka qqpahun mu sunan gaga namu lnglungan ho?”

³⁷ Rmengo ka dheya: “Meniq knledax su hiya, braho su biqi miyan tluungan narac su ka 1, ptlengi iril su ka 1.”

³⁸ Rmengo dheya ka Yesu: “Ini namu klai gaga namu mesa maanu ka yamu. Pngerah mahan mu we mtduwa namu mahun peni? Pntgaya smino mu we mtduwa namu ngalun ho?”

³⁹ Rmengo ka dheya: “Mtduwa.” Rmengo ka Yesu: “Pngerah mahan mu we ida namu mahun. Pntgaya smino mu we ida namu ngalun uri.

⁴⁰ Kiya ge, ptleung narac ma iril mu we uxe yaku ka tduwa mege. Pnsramal ima ge kiya ka sbege heya.”

⁴¹ Mbahang ka 10 heyi tnugsaan de mseang Yakobu ma Yohane ka dheya.

⁴² Kiya de, mlawa dheya ka Yesu ma rngagan na: “Klaun namu, niqan tgqbsuran paru dmudul qmlahang dheya ka seediq icil qnlhangan, niqan qbsuran paru qmlahang dheya.

⁴³ Ckceka namu we uxe maha so kiya. Ani ima mpkparu ckceka namu ge, asi ka mtnqliyan yamu.

⁴⁴ Ani ima mpqbsuran ckceka namu ge, asi ka mtnqliyan kana namu.

⁴⁵ Ani sun Laqi seediq uri we uxe meyah pqeepah seediq ka heya, seediq ka sqeepah na ka heya. Spririh na dungal ka knuudus na gmberih maruy hbaro seediq.”

Bartimay Mbudu

⁴⁶ Dehuk Yerixo ka dheya. Yesu ma tnugsaan na ma msuupu hbaro seediq mlatac peeyah Yerixo ciida, niqan ka mbudu doriq mpesa uqun tleung ssiyo elu. Heya we Bartimay laqi Timay.

⁴⁷ Wada mbahang sa seediq Najare Yesu ka heya de, mdiras mlawa. Rmengo: “Yesu, laqi Dawid! Glaani ku!”

⁴⁸ Mseang heya ka hbaro seediq, gmelux kesun daha ma, krinah mdiras mlawa ka heya: “Laqi Dawid, glaani ku!”

⁴⁹ Mheyu ka Yesu de, rmengo: “Plaani ka heya.” Mosa mlawa mbudu doriq ka dheya, rmengo: “Kmbeyax! Tutuy, ga mlawa isu ka heya da.”

⁵⁰ Qmada lukus na baro ka mbudu, milo mstaril, mkkesa mosa Yesu hiya.

⁵¹ Rmengo heya ka Yesu: “Maanu ka qqeepah mu sunan ho?” Rmengo ka heya: “Mptgesa, mqmita ku.”

⁵² Rmengo heya ka Yesu: “Osa. Snhiyan su ka wada dmoi baga sunan!” Wada asi qita ka seediq mbudu, mkleelu smnegul Yesu.