Hosea 1 - Kari Utux Baro Seediq Tgyada

¹ Mqbsuran paru Yehudah ka Ujiyah, Yotam, Axaj ma Yexijqiya ma, Yarabeam laqi Yehoas ka mqbsuran paru Israel ciida, kari Utux Tmninun we dehuk Hosea laqi Beeri.

Mqedil Hosea ma Laqi Na

² Utux Tmninun we tgplaale ba rmengo Hosea. Rmengo heya ka Utux Tmninun: “Osa, ngali mqedil su ka mqedil mmhemuc msuupu, dlaqi pneeyah mmhemuc msuupu we angal kiya uri. Ado dxeral nii we mmhemuc msuupu ma, malix Utux Tmninun.”

³ Kiya de, mosa mangal Gumir weewa Diblayim ka Hosea. Mchedil ka heya de, pcingan na 1 laqi rseno ka Hosea.

⁴ Rmengo Hosea ka Utux Tmninun: “Yijreel kesa tmngayan ka heya. Ado uxe mu beyo pkdraun ka sapah Yehu mnoda qnquwan noda psdara seediq meeniq Yijreel ma, qhdeun mu ka qnlhangan tnsapah Israel uri.

⁵ Betaq ali ciida, ida mu gremun ka budi Israel meeniq brenux Yijreel.”

⁶ Mchedil dungal ka Gumir ma dmoi laqi mqedil. Rmengo Hosea ka Utux Baro: “Lo Ruxamah kesa tmngayan ka heya. Ado ida ku uxe mpnpusal gmaalu sapah seediq Israel ma, uka ssruwa mu dheya da.

⁷ Kiya de seediq Yehudah we gaalu mu. Mpstama Utux Tmninun, Utux Baro daha mpkuudus ka dheya. Uxe mu pdaun budi, hlmadac, mccebu, dapa dmay ma, supi mpaapa dapa dmay pkuudus ka dheya.”

⁸ Malix nunuh ka Lo Ruxamah de, mchedil ka Gumir dungal we dmoi 1 laqi rseno dungal.

⁹ Rmengo ka Utux Tmninun: “Lo Amiy kesa tmngayan ka heya. Ado uxe seediq mu ka yamu ma, uxe Utux Baro namu ka yaku uri.”

Mptutuy ka Israel

¹⁰ Kiya de, seediq Israel we mpkrana so bnaquy rcilung ini sqlingi smeung ma uka spegan. Cuxal, mneeniq inu rmnengo dheya: “Uxe namu seediq mu” we, kiya ka meeniq hiya mprengo dheya: “Laqi Utux Baro muudus ani knuwan ka yamu”.

¹¹ Mpskingal msuupu ka sapah Yehudah ma sapah Israel ma, mpheyu 1 “Tunux” daha nanak pneeyah dxeral. Ado paru ali ka ali Yijreel.