Ester 8 - Kari Utux Baro Seediq Tgyada

Gmciyuk ka Seediq Yudaya

¹ Ali ciida, Axasreros qbsuran paru we sbege na Ester mqedil qbsuran paru ka dnoi sapah Haman pais seediq Yudaya. Meyah berah qbsuran paru ka Mardakay, ado wada srengo Ester maanu ka pnuglubal na Mardakay.

² Qbsuran paru we ngalun na peeyah baga na ka pqecul baga tnberih na mangal peeyah Haman ma sbege na Mardakay. Ester we pqlhangun na Mardakay ka dnoi sapah Haman.

³ Mnpusal mosa berah qbsuran paru dungal ka Ester ma, tgtemaq berah papak na. Tnglingis mesa hhetur daha pphuqil seediq Yudaya mnoda sneengan Haman seediq Agag.

⁴ Hmkero hukuc king na mquri Ester ka qbsuran paru. Kiya ka mtutuy ka Ester ma, mheyu berah qbsuran paru.

⁵ Rmengo: “Nasi su smruwa, nasi ku mangal gnhuwe berah su, malu mesa su ma, qqrasun su ka so nii we, ptasi patis ma pkuuka ka patis Haman laqi Hamdata seediq Agag. Patis nii we pqhedu na seediq Yudaya gaga meniq kana dxeral nyusan qlhangan qbsuran paru.

⁶ Huwa mu kesun qmita betaq wada mhuqil ka ddyami ho? Huwa mu kesun qmita wada pkuuka ka dseediq miyan ho?”

⁷ Rmengo Ester mqedil qbsuran paru ma Mardakay seediq Yudaya ka Axasreros qbsuran paru: “Ado migin phqilan seediq Yudaya ka Haman we, qtai! Wada mu sbege Ester ka dnoi na ma, wada mu psduyun bobo eruc qhuni ka Haman uri da.

⁸ Puyu so lnglungan namu, pooda ngayan qbsuran paru ma, bntaqan ngayan pnskraya pqecul baga qbsuran paru matis patis quri seediq Yudaya. Ado pnooda ngayan qbsuran paru ma, bntaqan ngayan pnskraya pqecul baga qbsuran paru ka patis we ini tduwa sresun kiya.”

⁹ 3 idas, kiya ka 23 ali idas Siwang ciida, pssliun daha ka dmptpatis qbsuran paru. Ida so kana pnosa kari Mardakay, pdesan daha patis ka seediq Yudaya, qbsuran mpqlahang kana ma qbsuran mdudul 1'27 nyusan dxeral peeyah Hodu betaq Kusu. Patis psaun nii we kari knkingal nyusan dxeral ma kari seediq Yudaya.

¹⁰ Mardakay ge, ptasan na ngayan Axasreros qbsuran paru ka patis ma, btaqan na ngayan pnskraya pqecul baga qbsuran paru. Patis nii we ptgehun na paadis snkgulan taapa msliko ba dapa dmay nsapah qbsuran paru.

^11-12 Qbsuran paru we smruwa smmalu pnspuwan knkingal alang pqlahang daha dheya nanak ka seediq Yudaya, meeniq cenga 1 ali, idas Adar, kiya ka 13 ali idas Adar ciida. Meeniq knkingal alang Axasreros qbsuran paru mpqlahang knuudus daha peeyah dsupi meeyah pkuuka, phuqil, smeeliq ma, gmeluk dmqedil, lqlaqi ma, dnoi daha ka dheya.

¹³ Patis pnsaan nii we pntena so gaya pgkela mosa betaq klaun kana seediq nyusan dxeral ma mpgkeela klegan seediq. So klaan psramal seediq Yudaya, ali ciida cciyuk daha pais daha.

¹⁴ Kiya de snkgulan mhaduc patis we muyu pnosa kari qbsuran paru paapa msliko ba dapa dmay nqbsuran paru mosa hmaduc patis. Dehuk kana alang Susan ka pnosa kari nii.

¹⁵ Mlukus lukus qbsuran paru mtlawa ma bhege ka Mardakay ma, knbunuh paru bunuh king qbsuran paru. Dungal we psbaro mlukus mtgdiyuc tninun malu nuqah ma, mlatac peeyah berah qbsuran paru. Kiya de tqqaras kana ka lualang alang Susan.

¹⁶ Seediq Yudaya we, niqan knledax, mqaras bale ma, spruun ba.

¹⁷ Lualang dhekan kari pnosa qbsuran paru ma gaya pgkela we, mqqaras bale ka seediq Yudaya ma, smmalu uqan qqrasan. Ngalan daha ali malu ba ka ali ciida. Hbaro ba ka seediq tndxeral hiya we, miicu seediq Yudaya ma tuumal ppatis ngayan seediq Yudaya.