Ester 7 - Kari Utux Baro Seediq Tgyada

Phqilun ka Haman

¹ Madis Haman mosa uqan mqaras Ester mqedil qbsuran paru ka qbsuran paru.

² Tg2 ali uqan mqaras mimah sino ciida, rmengo Ester ka qbsuran paru: “Ester mqedil qbsuran paru! Maanu ka pgsaun su, bege mu sunan. Ani maanu ka pnesa su, ani dmeka qlhangan we bege mu sunan uri.”

³ Cmiyuk ka Ester mqedil qbsuran paru: “Qbsuran paru! Nasi saku srwaun ma, malu mesa su we cyuki ku hiya ka pnesa mu, kiya we knuudus mu we pbrnahi ku hiya. Pnesa mu, kiya ka mesa ku dseediq mu.

⁴ Ado wada sbege ka yaku ma klegan seediq mu. Mpkuuka, pphqilun ma pqhdeun. Nasi wada sbaruy mtnqliyan rseno ma mqedil ka yami we mpgmelux ku. Kiya de we, pntnaun ta wada sliqan qbsuran paru ka mqraqil miyan we, uka ani maanu kiya.”

⁵ Smiling Ester mqedil qbsuran paru ka Axasreros qbsuran paru: “Ima ba ka mkmoda so nii? Seediq nii we gaga inu?”

⁶ Cmiyuk ka Ester: “Pais mptraqil we Haman naqah seediq nii!” Pkrkerang bale berah qbsuran paru ma berah mqedil qbsuran paru hiya ka Haman.

⁷ Mseang paru bale ka qbsuran paru, asi latac peeyah uqan mosa nganguc gaga phmaan phepah. Klaun Haman ida mpkdira heya ka qbsuran paru de, meniq sapah Ester ma, lmabu ppkuudus heya.

⁸ Mpbrinah peyah phmaan phepah meyah uqan mqaras hiya ka qbsuran paru, gisu na taan nii tgtemaq tlengun sbangan Ester hiya ka Haman. Rmengo ka qbsuran paru: “Betaq su so nii mpkmhemuc mqedil qbsuran paru berah mu sapah qbsuran paru hini ho?” Rmengo so nii kari ka qbsuran paru ciida, asi daha bungi dqeras ka Haman.

⁹ Rmengo ka 1 gmbgaxan Xarbona kesun: “Qtai! Smnalu 50 sese knbragan eruc qhuni gaga phyegun sapah na Haman, ddooyun na Mardakay wada pgkela ma, pkuudus knuudus qbsuran paru.” Rmengo ka qbsuran paru: “Sai qmeya eruc qhuni hiya ka Haman.”

¹⁰ Kiya de wada qyaanun eruc qhuni pnsramal na Mardakay ka Haman. Kiya ka hani wada malix ka seang qbsuran paru.