Ester 6 - Kari Utux Baro Seediq Tgyada

Mege Malu Ngayan Mardakay ka Qbsuran Paru

¹ Keeman ciida, ini osa tnqiyan na ka qbsuran paru, kiya de posa kari paangal patis ndaan, kiya ka pnatis ndaan qbsuran ma pspegun na berah na.

² Slayan daha gaga spatis hiya ka mesa: Niqan 2 heyi, Bigtan ma Teres gmbgaxan mpqlahang rhengun, dheya we kmphuqil Axasreros qbsuran paru. Mardakay ka wada pgkela noda nii.

³ Rmengo ka qbsuran paru: “Mnoda so oda nii ka Mardakay we, gaga biqan mmaanu ngayan ma qbsranan ka heya ho?” Cmiyuk heya ka tnqliyan qbsuran paru: “Ini biqi ani maanu ka heya.”

⁴ Rmengo ka qbsuran paru: “Ima ka gaga nganguc gaga?” Ciida, nii meyah mremux nganguc sapah qbsuran paru ka Haman, kiya de rrengo na qbsuran paru ppsduduy na Mardakay ka eruc pnsramal na.

⁵ Cmiyuk heya ka tnqliyan na: “Qtai! Gana mheyu nganguc hiya ka Haman.” Rmengo ka qbsuran paru: “Peeyah toma hini ka heya.”

⁶ Kiya de mremux toma ka Haman. Rmengo heya ka qbsuran paru: “Huwa mu kesun ka seediq kuxul mu ma qmbiqun mu malu ngayan ho?” Ciida, lmngelung ka Haman: “Kuxul ma qmbiqun malu ngayan qbsuran paru we, wano ba yaku ma, ima dungal peni?”

⁷ Rmengo qbsuran paru ka Haman: “Seediq kuxul ba qmbiqun malu ngayan qbsuran paru we,

⁸ Pdesi ka lukus gaga plkusun qbsuran paru ma, adis ka dapa dmay pnpaan qbsuran paru pkbunuh bunuh qbsuran paru.

⁹ Biqi taxa qbsuran mdayo qbsuran paru ka lukus qbsuran paru ma, ppai dapa dmay dduli pooda alang ka heya. Rengo berah na: Seediq kuxul ba qmbiqun malu ngayan qbsuran paru we asi ka so nii.”

¹⁰ Kiya de rmengo Haman ka qbsuran paru: “Ida so nkari su, sai mege nhari Mardakay seediq Yudaya gaga tleung rhengun qbsuran paru ka lukus qbsuran paru ma dapa dmay nii. Kana rnengo su we, iya ba srhuqi ani kingal.”

¹¹ Kiya de Haman we, plkusun na lukus qbsuran paru ka Mardakay ma, spaapa na dapa dmay ddulun na mkkesa lualang psliyan ma, rmengo berah na: “Seediq kuxul ma qmbiqun malu ngayan qbsuran paru we asi ka so nii.”

¹² Ida mbrinah rhengun qbsuran paru ka Mardakay ma, ini qqaras mubung tunux na ka Haman ma, asi nugaaguh mosa sapah na ka Haman.

¹³ Haman we, srengo na Jeres mqedil na ma, ddangi na kana ka noda na. Rmengo heya ka dniqan knkela ma Jeres mqedil na: “Gisu su prading ini baka meniq berah Mardakay ka isu. Seediq Yudaya ka heya we, uxe su knklaan mangal ka heya ma, maha su ini baka berah na.”

¹⁴ Pkelu nii ba mpprengo Haman ciida ka dheya, meyah ptbeyax mnais Haman ka dgnbgaxan sapah qbsuran paru ma, desun daha uqan mqaras pnsramal Ester.