Ester 5 - Kari Utux Baro Seediq Tgyada

Peekan Uqan Mqaras Qbsuran Paru ma Haman ka Ester

¹ Tg3 ali, mlukus lukus qbsuran paru ka Ester ma mosa mheyu tgtruma nganguc berah bale sapah qbsuran paru. Qbsuran paru we tleung berah ba rhengun sapah qbsuran paru.

² Qmita Ester mqedil qbsuran paru gaga mheyu nganguc hiya ka qbsuran paru ciida, gmaalu heya ma asi na hkragi heya ka hukuc king na. Kiya de mosa smdaling ka Ester ma tmelung ludux hukuc.

³ Rmengo heya ka qbsuran paru: “Ester, mqedil qbsuran paru! Maanu ooda pgsaun su ho? Ani maanu ka pgsaun su we bege mu kana. Ani yaa dmeka qlhangan ida mu bege sunan uri.”

⁴ Cmiyuk ka Ester: “Qbsuran paru, nasi su smruwa we, phngedi ku uqan mqaras ma adis ka Haman meeyah mekan pnsramal mu qbsuran paru.”

⁵ Rmengo ka qbsuran paru: “Nhari muyu kari Ester moda kesa ka Haman.” Kiya de madis Haman mosa uqan pnsramal Ester ka qbsuran paru.

⁶ Gisu mimah sino ciida, rmengo Ester ka qbsuran paru: “Maanu ka pgsaun su we bege mu kana. Ani manu ka pnesa su, ani yaa dmeka qlhangan we ida mu bege sunan uri.”

⁷ Cmiyuk ka Ester: “Kmpesa ku, mkdmurun ku we, nn...

⁸ Nasi saku ghwayun we srwai ku hiya ka pnesa mu ma, dnurun mu. Kiya ka qbsuran paru ma Haman we eyah dungal uqan mqaras pnsrmalan mu yamu. Ida ku mpuyu kari qbsuran paru mooda kusun.”

Migin Phqilan Mardakay ka Haman

⁹ Ali ciida, mqaras bale ka Haman ma, mqqaras ba meyah nganguc. Kiya de qtaan na ini heyu ma ini klgelu gaga rhengun qbsuran paru ka Mardakay de, sqama seang na.

¹⁰ Kiya de meruc seang na ma mosa sapah ka Haman ma, mlawa duma ddangi na ma Jeres mqedil na.

¹¹ Haman ge, srengo na dheya kana ka paru qnbleyaq na, knhbragan laqi na, snpruwan qmita qbsuran paru heya, phrnasan na qbsranan qbsuran mdudul ma dqbsuran mdayo qbsuran paru ka heya.

¹² Kiya de rmengo dungal ka Haman: “Ester mqedil qbsuran paru ge, gaga psramal uqun mqaras, wano ba yaku ma, ini na pspui qbsuran paru mosa mekan ani ima. Kusun we, mlawa kenan mpsuupu ku qbsuran paru mosa uqun mqaras dungal.

¹³ Wano ba qmita ku Mardakay seediq Yudaya gaga tleung rhengun qbsuran paru we, uka ririh na kana ka nii da.”

¹⁴ Rmengo heya ka Jeres mqedil na ma, kana ddangi na: “Pttui 50 sese knbragan eruc, mgrebu kusun de pgsai ka qbsuran paru so pqyaun psduduy bobo hiya ka Mardakay. Kiya ka maha su mqqaras msuupu qbsuran paru mosa mekan uqun.” Mndungus lnglungan Haman ka kari nii ma, mlawa seediq smmalu eruc.