Ester 4 - Kari Utux Baro Seediq Tgyada

Rmengo Ester Ddayo na ka Mardakay

¹ Mardakay ge, klaun na kana ka noda so nii ciida, smgaliq lukus ma mlukus lukus mbasi, murus qbulic tunux ma, tddiras lmingis tnooda mkkesa ckceka alang.

² Dehuk berah rhengun qbsuran paru de ini teme papak na, ado gaya we ini tduwa mremux sapah qbsuran paru ka seediq mlukus lukus mbasi.

³ Kana ani inu gaga dxeral nyusan gaga dhekan pnosa kari patis qbsuran paru nii ka seediq Yudaya we, gisu naqah ba kuxul, ini ekan ma, lmingis csdaring. Hbaro ba ka seediq gisu mlukus lukus mbasi ma sbaang ckceka qbulic.

⁴ Dmqedil mdayo Ester mqedil qbsuran paru ma dgnbgaxan we, srengo daha Ester ka oda nii, kiya de naqah ba kuxul na ma, pdesan na lukus ka Mardakay ppririh na lukus mbasi we, ini angal ka heya.

⁵ Kiya de Ester we mlawa Hatak taxa heyi gmbgaxan mdayo heya. Kiya de skgulan Ester mmaha qmita Mardakay, mkmkela gaga hmuwa ma, maanu ka pusu na betaq so nii.

⁶ Kiya de mosa ka Hatak, mosa qmita Mardakay gaga nganguc alang berah rhengun qbsuran paru hiya.

⁷ Mardakay ge, kana so noda we srengo na heya. Dungal we ririh pphuqil na seediq Yudaya betaq smruwa mege ging pkrana egu bale dnoi repun qlhangan ka Haman we, srengo na heya kana.

⁸ Dungal we sbege na Hatak ka patis pnseeru pnosa kari sgarang daha alang Susan hiya ka quri pqhedu pkuuka seediq Yudaya. Drunan na, sai pqita Ester, tgsai ka heya ma, druni bale osa qmita qbsuran paru, saani snnangi rmengo qbsuran paru pkuudus dseediq ta berah qbsuran paru hiya.

⁹ Mbrinah ka Hatak ma srengo na Ester ka kari rnengo Mardakay.

¹⁰ Kiya de posa kari Hatak rrengo na Mardakay ka Ester:

¹¹ “Ida mkela niqan 1 gaya ka kana dqbsuran mdudul qbsuran paru ma, dseediq kana qlhangan, nasi ini plaani, mmhemuc mosa mremux qmita qbsuran paru we, ani rseno ma mqedil, ida asi ka phqilun. Asi ka shmkero hukuc king ka qbsuran paru, ini so kiya de uxe pkuudus ka seediq kiya. Kiya de wada 30 ali, ini plawa kenan osa mu berah qbsuran paru ka yaku da.”

¹² Srengo daha Mardakay ka kari Ester.

¹³ Cmiyuk paadis kari Ester ka Mardakay: “Iya kesa ga su meniq sapah qbsuran paru ka isu ge, mgkala su kana seediq Yudaya ma, uxe su mphuwa ka isu.

¹⁴ Nasi su mgmelux saya ka isu we, mpeeyah icil ka mdayo ma pkuudus seediq Yudaya. Mpuuka kana ka isu ma tnsapah su, ngalan su mqedil qbsuran paru we, uxe saya ka ooda so nii peni?”

¹⁵ Cmiyuk paadis kari Mardakay ka Ester:

¹⁶ “Osa ma sai psseli kana ka seediq Yudaya gaga Susan ma, ririh kenan we iya ekan hnpure mk3 ali ani keeman ani diyan iya ekan ma iya imah. Yaku ma dmqedil mdayo kenan uri we ida mntena so nii uxe miyan meekan uri. Kiya de maha ku tbrinah gaya, maha ku qmita qbsuran paru. Netun ku so phqilun de mphuqil ku!”

¹⁷ Kiya de Mardakay we, muyu kana rnengo Ester mooda ka heya.