Ester 3 - Kari Utux Baro Seediq Tgyada

Migin Phqilan Dseediq Yudaya ka Haman

¹ Bobo na mnoda so nii, Axasreros qbsuran paru we spruun na qmita ka Haman laqi Hamdata seediq Agag ma, hmrinas kana ngalan qbsuran sapah qbsuran paru.

² Meniq rhengun qbsuran paru we, tmbqelic thmuku Haman ka kana tnqliyan. Ado pnoda kari pnosa qbsuran paru ka nii. Kiya de ini tmbqelic thmuku ka Mardakay.

³ Rmengo Mardakay ka dqbsuran ma dtnqliyan gaga rhengun qbsuran paru hiya: “Ma su ini qbahang pnosa kari qbsuran paru?”

⁴ Rmengo heya klaali ka dheya we ida ini qbahang ka Mardakay. Kiya de rngagan daha Haman ma, so maha hmuwa mesa ka Mardakay. Ado rmnengo dheya, seediq Yudaya ka heya.

⁵ Haman ge, qmita ini tmbqelic thmuku heya ka Mardakay we sqama seang na.

⁶ Srengo daha Haman ka klegan seediq Mardakay. Phuqil nanak Mardakay we ini baka kiya ma, kmphuqil kana seediq Yudaya gaga qlhangan Axasreros qbsuran paru, kiya ka dseediq Mardakay ka heya.

⁷ 1 idas tg12 knkawas mqbsuran paru ka Axasreros, kiya ka idas Nisan. Meyah blebil qreti Puru berah Haman ka seediq. Puru nii we kiya ka ngngalun blebil qreti migin ali ma idas ooda daha. Bnlebil daha we 12 idas, kiya ka idas Adar.

⁸ Rmengo Axasreros ka Haman: “Kklegan seediq ckceka kana qlhangan su we niqan 1 klegan seediq gaga msaasu meniq hiya, ini bale pntena. Kari pndakar daha we, ini bale pntena kari pndakar klegan seediq. Ini qbahang pnosa kari qbsuran paru uri. Kiya de nasi asi pniqi hiya ka dheya nii we uxe mpkmalu qbsuran paru.

⁹ Nasi su smruwa we ptasi patis pkuuka dheya, kiya de mbege ku 1 mang tarantu ging sbege mu seediq mpqlahang dooyun pila ma, psaun mu repun qbsuran paru.”

¹⁰ Kiya de qbsuran paru we ngalun na peeyah baga na ka pqecul baga ma sbege na pais seediq Yudaya, Haman laqi Hamdata seediq Agag.

¹¹ Rmengo Haman ka qbsuran paru: “Bege mu sunan ka kana ging nii ma, dseediq nii. Seung nanak lnglungan su qmita dheya.”

¹² 13 ali 1 idas ciida, splawa na kana ka dmptpatis qbsuran paru ma, muyu kari rnengo Haman, spatis daha kari knkingal klegan seediq lualang qlhangan nii. Patis nii we nii spooda ngayan Axasreros qbsuran paru pgkela ma gaga btaqan ngayan pnskraya pqecul baga qbsuran paru. Bbege daha kana dqbsuran alang, mdudul qbsuran ma dmpqlahang.

¹³ Ptgehun phaduc snkgulan quri kana qnlhangan dxeral nyusan ka patis nii. Kiya de 13 ali idas Adar, kiya ka 12 idas ka 1 ba ali ciida, qhdei pkuuka ma phuqil, ani rdrudan, mqedil ma, lqlaqi ka seediq Yudaya. Dungal we gleki kana ka dnoi daha.

¹⁴ Ngalun daha pnosa kari qbsuran paru matis spgkela daha kana dxeral qnlhangan ma klegan seediq, ppsramal daha ali nii.

¹⁵ Mnoda pnosa kari qbsuran paru ma wada asi osa nhari ka seediq snkgulan. Sgarang pgkela alang Susan hiya ka pnosa kari nii. Msuupu mimah sino qbsuran paru ka Haman, kiya we mrrudu ba ka alang Susan ciida.