Epesos 1 - Kari Utux Baro Seediq Tgyada

Smbeyax Kari

¹ Mnoda lnglungan Utux Baro ngalan ku na snkgulan Yesu Kiristo ka yaku Poro we yamu dsnheyi mtduwa stmaan dseediq Kiristo Yesu Epesos heya ka pdesun mu patis nii.

² Tai so meeniq yamu ka huwe ma mmsbleyaq pneeyah Utux Baro Tama ta ma Yesu Kiristo qbsuran.

Pnbleqan Bgihur Utux nKiristo

³ So kana tdhuwan sbege ta Utux Baro Tama Yesu Kiristo Bukung ta! Heya we sooda na Kiristo mege ita ka kana smbleqan Bgihur Utux baro hiya.

⁴ Ado berah snlmean na bobo dxeral we wada tana geegan mnoda Kiristo so ba bgurah meniq ta berah na kkuuka luqah stenge ba gnaalu berah na.

⁵ Sooda na Yesu Kiristo pgeela smeung ita mangal ngayan laqi na. Nii we spooda na nanak qnara lnglungan na.

⁶ So ngalun tndhuun ka knledax na. Gnhuwe na ita nii we mnoda laqi sgaalu na tseengan na mege ita!

⁷ Meniq ta heya wada tana ptrwahun dara na. Kiya de wada na srwaan ka qnnaqah ta. Nii we spntena na so qnbleyaq huwe na.

⁸ Spooda na knkela lmngelung wada mttuku ba mege ita.

⁹ Ado spgkela na ita ka lnglungan na lneing. Spntena na so dngusan lnglungan na sneengan na mnoda Kiristo.

¹⁰ Spooda bnkegan na mttuku ka ali sneengan na de pskingal meniq Kiristo ka kana ga baro, bobo dxeral ma kana ani manu.

¹¹ Meniq ta Kiristo wada ta mangal pusu dnoi. Ado muyu sneengan lnglungan na nanak pttuku kana ani maanu ka Utux Baro we mooda pndungus na pgeela gmao ita.

¹² Lnglungan na we so ka ita wada plaale smatang quri Kiristo ka maha tmdahu knledax na!

¹³ Meniq namu Kiristo hiya wada namu qbhangan ka kari quri bale ba ma wada namu snhii heya. Kari quri bale ba we malu kari pkuudus yamu. Maanu so kiya de wada namu na pskrean Bgihur Utux sntangan.

¹⁴ Bgihur Utux nii we pnugeela na mege ngngalun ta betaq tana pttkuun ptraguh. Kiya de so maha tndhuun ka knledax Utux Baro.

Dnurun Poro

¹⁵ Maanu so kiya de ado wada mu qbhangan ka snhiyan namu Yesu Bukung ma gnaalu namu quri kana dsnheyi we

¹⁶ yamu ka ini mu pstqani mqaras Utux Baro pooda ku dmurun yamu ciida.

¹⁷ So nii ka dnurun mu. Utux Baro nuYesu Kiristo qbsuran ta ka Tama niqan knledax we so na bbege yamu ka Bgihur Utux. Bgihur Utux we bege na yamu ka lnglungan kkela namu lmngelung ma kkela namu pntuura na. Kiya de kkela namu heya.

¹⁸ So ppledax doriq lhebun namu, ppkela namu so maanu ka sntangan bbege na mnlawa yamu meniq ckceka mrtaso tnugsaan na msngari mangal pusu knledax.

¹⁹ Kiya uri we kkela ta mquri ita seediq nii snhii, paru bale pntuura na ita. Nii we pnooda qneepah paru beyax na ka kiya.

²⁰ Paru beyax nii sqeepah na quri Kiristo wada na pkuudus peeyah hnqilan ma wada na ptluungun narac na baro.

²¹ Kiya uri ma Kiristo we pbragun bale peniq kana mpqlahang, mdoi beyax kkuudus, beyax qnlahang, qbsuran ma kana ga tnanun paru ngayan. So nii we uxe wano saya, betaq nexal uri.

²² Wada na ptrmaun papak Kiristo ka kana ani maanu. Kiya de pnssliyan na wada mpusu pnlaale kana ani maanu uri.

²³ Pssliyan nii we kika heyi na. Kiya ka stenge Kiristo mstenge kana ani maanu.